ឥណ្ឌាព្យាយាមរក្សាតុល្យភាពភូមិសាស្ត្រនយោបាយ និងសេដ្ឋកិច្ចក្នុងវិបត្តិសង្រ្គាមរុស្ស៊ី-អ៊ុយក្រែន
ពេលរុស្ស៊ីទើបបើកការឈ្លានពានអ៊ុយក្រែនដំបូងៗ សហរដ្ឋអាមេរិកព្រមានឥណ្ឌាប្រឆាំងនឹងការទិញប្រេងបន្ថែមពីរុស្ស៊ី ដោយនិយាយថាក្រុងញូវដែលីអាចប្រឈមនឹង «ហានិភ័យខ្ពស់»។
ប៉ុន្តែស្របពេលដែលសង្រ្គាមបន្តអូសបន្លាយ ឥណ្ឌាត្រូវបានគេរាយការណ៍ថាបង្កើនការនាំចូលប្រេងរុស្ស៊ីរបស់ខ្លួនរហូតដល់លើសពី៨១៩ ០០០បារ៉ែល/ថ្ងៃនាខែឧសភា។ ៤ ខែក្រោយការឈ្លានពាន លោកខាងលិចដែលនាំគ្នាជាន់កសេដ្ឋកិច្ចរុស្ស៊ី បែរជាបង្ហាញការបន្ទន់ជំហរ ដោយសង្កត់ធ្ងន់ថា ថាឥណ្ឌាមិនចាំបាច់ជ្រើសរើសភាគីណាទេ។
ក្រៅពីការបន្ទន់ជំហរចុះរបស់បស្ចិមលោកជំហានផ្សេងៗរបស់ឥណ្ឌាក្នុងអំឡុងវិបត្តិរុស្ស៊ីបានឆ្លុះបញ្ចាំងពីការព្យាយាមរបស់រដ្ឋាភិបាលក្រុងញូវដែលីក្នុងការធ្វើឱ្យខ្លួនឯងមានតុល្យភាពលើបញ្ហាភូមិសាស្រ្តនយោបាយខណៈទាញយកឱកាសនៃផលប្រយោជន៍សេដ្ឋកិច្ច។ចាប់តាំងពីការចាប់ផ្តើមជីវិតសាធារណៈរដ្ឋ ការមិនចូលបក្សសម្ព័ន្ធ និងអព្យាក្រឹតភាពបានបម្រើកេរ្តិ៍ឈ្មោះ និងកិត្យានុភាពរបស់ឥណ្ឌាបានយ៉ាងល្អ។
លោកនាយករដ្ឋមន្រ្តី ណារិនដ្រា ម៉ូឌី ដែលក្រុមប្រទេសអ្នកមានទាំង៧(G-៧)អញ្ជើញឱ្យចូលរួមកិច្ចប្រជុំកំពូលមួយនៅអាល្លឺម៉ង់នាសប្តាហ៍នេះបានធ្វើកិច្ចព្រមព្រៀងស្តីពីសកម្មភាពនិងការអភិវឌ្ឍន៍អាកាសធាតុរួមគ្នាជាមួយគេឯងដែរខណៈបន្តបដិសេធការថ្កោលទោសរុស្ស៊ីចំពោះការឈ្លានពានអ៊ុយក្រែន។
ឥណ្ឌាព្យាយាមលើកខ្លួនថាជាសម្លេងសម្រាប់ប្រទេសក្រីក្រផ្សេងទៀតផងដែរ ដោយលើកហេតុផលថាទណ្ឌកម្មបស្ចិមលោកលើរុស្ស៊ីធ្វើឱ្យប៉ះពាល់ដល់ប្រទេសកំពុងអភិវឌ្ឍខ្លាំងបំផុត។ក្រោយនិយាយថា លោកខាងលិចមិនគួរយកការនាំចូលប្រេងរុស្ស៊ីរបស់ខ្លួនធ្វើជារឿងនយោបាយ ក្រសួងប្រេង និងឧស្ម័នធម្មជាតិឥណ្ឌានិយាយកាលពីខែមុនថា ការទិញប្រេងរុស្ស៊ីរបស់ឥណ្ឌាមិនត្រឹមតែជួយសម្រាលបន្ទុកក្នុងប្រទេសនោះទេ ប៉ុន្តែថែមទាំងជួយសម្រាលកំណើនខ្លាំងនៃអតិផរណាលើពិភពលោកផងដែរ។
ទន្ទឹមនឹងនោះ លោក ម៉ូឌីនិយាយនៅក្នុងកិច្ចប្រជុំ G-៧កាលពីថ្ងៃចន្ទថា៖ «អ្នកទាំងអស់គ្នាក៏នឹងយល់ស្របនឹងរឿងដែលថាការទទួលបានថាមពលមិនគួរតែជាឯកសិទ្ធិរបស់ប្រទេសអ្នកមានប៉ុណ្ណោះទេ។ប្រទេសក្រីក្រក៏មានសិទ្ធិដូចគ្នាលើថាមពលដែរ»។លោកបន្តថា៖ «នៅពេលនេះ ខណៈដែលតម្លៃថាមពលឡើងខ្ពស់កប់ពពក ដោយសារភាពតានតឹងផ្នែកភូមិសាស្ត្រនយោបាយ វាជារឿងសំខាន់ជាងក្នុងការចងចាំរឿងនេះ»។
កត្តាផ្សេងៗដែលជួយឱ្យឥណ្ឌារក្សាជំហរអព្យាក្រឹត្យរបស់ខ្លួន។ អ្នកវិភាគនិយាយថាស្របពេលដែលសហរដ្ឋអាមេរិកចង់បង្កើនសម្ពាធជាសកលប្រឆាំងនឹងរុស្ស៊ី វាក៏មិនអាចប្រថុយនឹងកាត់ផ្ដាច់សម្ព័ន្ធមិត្តដូចជាឥណ្ឌាដែរ។ ឥណ្ឌាត្រូវការឥណ្ឌាជាថ្នូរនឹងបញ្ហាផ្សេងៗទៀត ជាពិសេសយុទ្ធសាស្ត្រទប់ទល់នឹងចិន ដែលតែងប៉ះទង្គិចជាមួយឥណ្ឌានៅតាមព្រំដែនជួរភ្នំហិមាល័យ។
មុនកិច្ចប្រជុំកំពូលG-៧ លោក ចន ឃឺរប៊ី (John Kirby)អ្នកសម្របសម្រួលក្រុមប្រឹក្សាសន្តិសុខជាតិសហរដ្ឋអាមេរិកពណ៌នាឥណ្ឌាថាជា«ដៃគូយុទ្ធសាស្ត្រសំខាន់នៅក្នុងតំបន់ឥណ្ឌូប៉ាស៊ីហ្វិក»។ក្នុងកិច្ចប្រជុំដដែលលោកប្រធានាធិបតីចូ បៃដិនក៏ប្រកាសផ្តល់មូលនិធិហេដ្ឋារចនាសម្ព័ន្ធអន្តរជាតិចំនួន៦០០ ប៊ីលានដុល្លារដើម្បីទប់ទល់នឹងគម្រោងគំនិតផ្តួចផ្តើមខ្សែក្រវាត់ និងផ្លូវរបស់ចិន ហើយឥណ្ឌានឹងស្ថិតក្នុងចំណោមអ្នកទទួលផលដំបូងគេ។
លើសពីនេះ អ្នកវិភាគនិយាយថា ប្រេងគឺជាស្នូលនៃជំហរតុល្យភាពរបស់ឥណ្ឌាជុំវិញវិបត្តិសង្រ្គាមនៅអឺរ៉ុប ខណៈដែលពិភពលោកប្រឈមនឹងតម្លៃថាមពលឡើងថ្លៃ ដែលជំរុញអតិផរណា។
កាលពីខែមីនា មន្ត្រីសហរដ្ឋអាមេរិក រួមទាំងលោកបៃដិន ជំរុញកុំឱ្យឥណ្ឌាបង្កើនការទិញថាមពលពីរុស្ស៊ី ប៉ុន្តែត្រូវឥណ្ឌាមិនអើពើ ហើយបង្កើនការនាំចូល។ ឥណ្ឌាទិញប្រេងឆៅលក់បញ្ចុះតម្លៃពីរុស្ស៊ីប្រហែល៧៦លានបារ៉ែលក្នុងរយៈពេល៤ខែ ដោយតម្លៃនោះថោកជាងតម្លៃប្រេងសកលរហូតដល់ ៣០ ភាគរយនៅខែឧសភា និងដើមខែមិថុនា។
មន្ត្រីឥណ្ឌាការពារម្តងហើយម្តងទៀតនូវការទិញទាំងនេះថាជាមធ្យោបាយមួយដើម្បីបញ្ចៀសផលប៉ះពាល់នៃតម្លៃអាហារ និងឥន្ធនៈខ្ពស់សម្រាប់ប្រជាជន។រដ្ឋមន្ត្រីប្រេងឥណ្ឌា លោក Hardeep Singh Puri និយាយថា៖ «យើងមិនទាន់ងើបស្រួលបួលពីជំងឺរាតត្បាតទេ» ដោយលើកឡើងថា ឥណ្ឌានៅតែត្រូវផ្ដល់អាហារដល់មនុស្សរាប់រយលាននាក់ និងឧបត្ថម្ភធនលើវ៉ាក់សាំង។លោកបន្ថែមថា៖«យើងត្រូវតែមើលថែផលប្រយោជន៍ខ្លួនយើង»។
ពេលសហរដ្ឋអាមេរិក ក៏ដូចជាសហភាពអឺរ៉ុបពិចារណាលើការដាក់ទណ្ឌកម្មរុស្ស៊ី មានការព្រួយបារម្ភកាន់តែខ្លាំងឡើងថា ការធ្លាក់ចុះជំរុញឱ្យមានបញ្ហាស្រេកឃ្លានដ៏គួរឱ្យព្រួយបារម្ភ និងវិបត្តិថាមពល។ លោកខាងលិចកំពុងចាប់ផ្តើមទទួលស្គាល់ថា ទណ្ឌកម្មធ្វើឱ្យខូចខាតយ៉ាងធ្ងន់ធ្ងរនៅទូទាំងពិភពលោក ដោយមិនធ្វើឱ្យខូចម៉ាស៊ីនសង្រ្គាមរបស់វិមានក្រឹមឡាំងនោះទេ ខណៈក្រុងម៉ូស្គូមានសម្ព័ន្ធមិត្តដូចជាចិន និងឥណ្ឌាជួយទិញប្រេង។ឥឡូវនេះ សហរដ្ឋអាមេរិកកំពុងជំរុញឱ្យមានការកំណត់តម្លៃលើប្រេងរុស្ស៊ី ដើម្បីនាំចូលជាដំណោះស្រាយលើវិបត្តិថាមពេល ខណៈកំពុងស្វែងរកវិធីថ្មីដើម្បីដាក់ទណ្ឌកម្មទីក្រុងម៉ូស្គូ។
កន្លងមកឥណ្ឌាតែងរិះគន់ការលាក់ពុតម្តងហើយម្តងទៀតនៃតម្រូវការប្រេងរបស់លោកខាងលិច ខណៈអឺរ៉ុបផ្ដល់ដង្ហើមសេដ្ឋកិច្ចដោយបន្តទទួលឧស្ម័នធម្មជាតិភាគច្រើនពីរុស្ស៊ី។យោងតាមមជ្ឈមណ្ឌលស្រាវជ្រាវថាមពល និងខ្យល់ស្អាតក្នុងរយៈពេល១០០ ថ្ងៃដំបូងនៃសង្រ្គាម ប្រាក់ចំណូលនៃការលក់ឥន្ធនៈហ្វូស៊ីលរបស់រុស្ស៊ីប្រហែល៣/៤ បានមកអឺរ៉ុបហើយតិចជាង៥ ភាគរយបានមកពីឥណ្ឌា។
លោក Subrahmanyam Jaishankar រដ្ឋមន្ត្រីការបរទេសឥណ្ឌានិយាយនៅកាលពីដើមខែថា៖ «ការទិញហ្គាសរុស្ស៊ីមិនផ្ដល់មូលនិធិដល់សង្រ្គាមទេឬ?។ អឺរ៉ុបគួរចៀសពីផ្នត់គំនិតដែលថាបញ្ហារបស់អឺរ៉ុបគឺជាបញ្ហារបស់ពិភពលោក ប៉ុន្តែបញ្ហារបស់ពិភពលោកមិនមែនជាបញ្ហារបស់អឺរ៉ុប»។
ក្នុងកិច្ចប្រជុំកំពូលដដែលជាមួយប្រទេសG-៧ លោកModi នៅតែបន្តបង្ហាញជំហររក្សាអព្យាក្រឹតចំពោះសង្គ្រាមនៅអ៊ុយក្រែន ដោយអំពាវនាវឱ្យមានដំណោះស្រាយតាមរយៈការទូត និងកិច្ចចរចា។
តាមវិធីជាច្រើន លោកម៉ូឌីនឹងរក្សាជំហរស្វ័យភាពជាយុទ្ធសាស្ត្ររបស់ឥណ្ឌា។លោកHafeez ullah Khanជំនួយការសាស្រ្តាចារ្យផ្នែកវិទ្យាសាស្ត្រនយោបាយនៃសាកលវិទ្យាល័យAbdul Wali Khanប្រទេសប៉ាគីស្ថាន សរសេរនៅក្នុងអត្ថបទវិភាគរបស់លោកចុះផ្សាយកាលពីដើមខែថា៖ «រុស្ស៊ីមានសារៈសំខាន់ខ្លាំងសម្រាប់ផលប្រយោជន៍ជាតិឥណ្ឌា។ ឥណ្ឌាមិនព្រមថ្កោលទោសរុស្ស៊ីមិនត្រឹមតែដោយសារគោលការណ៍អព្យាក្រឹតភាពប៉ុណ្ណោះទេ ប៉ុន្តែក៏ដោយសារតែការពឹងលើរុស្ស៊ីហួសហេតុដែរ»។
ទំនាក់ទំនងជាមួយរុស្ស៊ី មានតាំងពីដើមពេលឥណ្ឌាទើបទទួលឯករាជ្យ ហើយជាច្រើនឆ្នាំមកនេះ រុស្ស៊ីតែងគាំទ្រឥណ្ឌានៅអង្គការសហប្រជាជាតិ លើសំណួរជុំវិញជម្លោះនៅតំបន់កាស្មៀរ។ ក្រៅពីនេះ រុស្ស៊ីក៏ជាអ្នកផ្គត់ផ្គង់សព្វាវុធឱ្យឥណ្ឌាដ៏សំខាន់ផងដែរ។ យោងតាមអត្ថបទស្រាវជ្រាវរបស់មជ្ឈមណ្ឌលស្រាវជ្រាវStimson នៅទីក្រុងវ៉ាស៊ីនតោន ចុះផ្សាយកាលពីខែមីនាប្រហែល ៨៥ % នៃសម្ភារៈយោធារបស់ឥណ្ឌាបានមកពីប្រទេសរុស្ស៊ី ឬមានប្រភពមកពីសហភាពសូវៀត។
ទន្ទឹមនឹងការថ្កោលទោសរុស្ស៊ីរបស់បស្ចិមលោក លោកKhanនិយាយថា៖«តាមទស្សនៈរបស់ឥណ្ឌា រុស្ស៊ី និងអាមេរិកគឺជាមហាអំណាចពិភពលោក និងជាសម្ព័ន្ធមិត្តដ៏សំខាន់។ ការជ្រើសរើសភាគីម្ខាងជុំវិញបញ្ហាអ៊ុយក្រែននឹងបំផ្លាញទំនាក់ទំនងទ្វេភាគីដ៏មានតម្លៃជាមួយសម្ព័ន្ធមិត្តមួយក្នុងចំណោមសម្ព័ន្ធមិត្តទាំង២»។
ប្រភព៖ New York Times
