ប៊ុលហ្គារីបណ្ដេញបុគ្គលិកការទូតរុស្ស៊ី៧០នាក់ចេញ ជុំវិញចារកម្ម
ប៊ុលហ្គារីនិយាយកាលពីថ្ងៃអង្គារថា ខ្លួននឹងបណ្តេញបុគ្គលិកការទូតរុស្ស៊ី៧០នាក់ ជុំវិញការព្រួយបារម្ភអំពីចារកម្ម ហើយបានកំណត់ទំហំនៃការតំណាងរបស់ទីក្រុងម៉ូស្គូថាជាភាពតានតឹងរវាងប្រទេសទាំង២ដែលធ្លាប់ជាសម្ព័ន្ធមិត្តជិតស្និទ្ធហើយត្រូវបែកបាក់កាន់តែខ្លាំងក្រោយការឈ្លានពានអ៊ុយក្រែន។
ជំហានដែលប្រកាសឡើងដោយក្រសួងការបរទេសនិងនាយករដ្ឋមន្ត្រី គឺជាការបណ្តេញអ្នកការទូតរុស្ស៊ីដ៏ធំបំផុតដោយរដ្ឋាភិបាលក្រុងសូហ្វ៊ីយ៉ាក្នុងប៉ុន្មានឆ្នាំថ្មីៗនេះ។
នាយករដ្ឋមន្ត្រីប៊ុលហ្គារី លោក គីរីល ភិតកូវ (Kiril Petkov)ដែលត្រូវបានសភាបោះឆ្នោតដកសេចក្ដីទុកចិត្តកាលពីសប្ដាហ៍មុន និយាយថា៖«ថ្ងៃនេះ យើងបណ្តេញអ្នកការទូតរុស្ស៊ីចំនួន៧០នាក់។ពួកគេជាច្រើនបានធ្វើការដោយផ្ទាល់សម្រាប់សេវាកម្ម[ស៊ើបការណ៍] ហើយតួនាទីការទូតរបស់ពួកគេគឺដូចជាការបិទបាំង»។
ក្រសួងការបរទេសប៊ុលហ្គារីនិយាយថា ការសម្រេចចិត្តបណ្តេញបុគ្គលិកការទូតរុស្ស៊ីជាច្រើននាក់នេះ ត្រូវបានរៀបចំឡើង ដើម្បីទម្លាក់ទំហំនៃបេសជនរបស់ទីក្រុងម៉ូស្គូឱ្យស្មើនឹងអ្នកតំណាងរបស់ប៊ុលហ្គារីនៅទីក្រុងម៉ូស្គូ។ ក្រសួងថា វាក៏ជាការឆ្លើយតបទៅនឹងអ្វីដែលខ្លួនហៅថាសកម្មភាពខុសពីអនុសញ្ញាទីក្រុងវីយែន ស្តីពីទំនាក់ទំនងការទូត ឬភាសាផ្លូវការហៅថា «ចារកម្ម»។
គិតត្រឹមព្រឹមថ្ងៃពុធមិនមានការឆ្លើយតបភ្លាមៗរបស់រុស្ស៊ីចំពោះការចោទប្រកាន់ចារកម្មនោះទេ។ ប៉ុន្តែប្រភពមិនបញ្ចេញឈ្មោះប្រាប់ទីភ្នាក់ងារសារព័ត៌មានTASS របស់រុស្ស៊ីថា ទីក្រុងម៉ូស្គូដែលផ្តាច់ហ្គាសទៅប៊ុលហ្គារីកាលពីខែមេសាដោយសារមិនព្រមទូទាត់ជាប្រាក់រូប្លិ៍ នឹងធ្វើការឆ្លើយតបវិញចំពោះការបណ្ដេញអ្នកការទូតរបស់ខ្លួន។
លោក ភិតកូវប្រកាន់ជំហរខ្លាំងខុសពីធម្មតាប្រឆាំងនឹងរុស្ស៊ី ដែលធ្លាប់មានទំនាក់ទំនងជិតស្និទ្ធជាមួយប៊ុលហ្គារីក្នុងសម័យកុម្មុយនិស្ត ដោយថែមទាំងគាំទ្រការដាក់ទណ្ឌកម្មរបស់សហភាពអឺរ៉ុបប្រឆាំងនឹងទីក្រុងម៉ូស្គូ។លោកបណ្តេញរដ្ឋមន្ត្រីការពារជាតិចេញពីតំណែងកាលពីខែកុម្ភៈចំពោះការបដិសេធមិនហៅសកម្មភាពរបស់រុស្ស៊ីថាជា«សង្គ្រាម»។
លោកភិតកូវ រៀបរាប់ការបណ្តេញចេញថ្មីនេះថា៖«នេះមិនមែនជាទង្វើឈ្លានពានលើប្រជាជនរុស្ស៊ីទេ។នៅពេលដែលរដ្ឋាភិបាលបរទេសកំពុងព្យាយាមជ្រៀតជ្រែកក្នុងកិច្ចការផ្ទៃក្នុងរបស់យើង យើងមានស្ថាប័នដែលនឹងឆ្លើយតប»។ លោកបន្តថា៖ «នៅថ្ងៃអាទិត្យ យើងរំពឹងថា យន្តហោះពេញមួយដែលមាន៧០ កៅអី នឹងហោះទៅកាន់ទីក្រុងម៉ូស្គូ»។
ប្រទេសជាច្រើននៅអឺរ៉ុបបានបណ្តេញអ្នកការទូតរុស្ស៊ីបន្ទាប់ពីការឈ្លានពានអ៊ុយក្រែនកាលនៅចុងខែកុម្ភៈហើយរុស្ស៊ីបានឆ្លើយតបវិញនូវជំហានដូចគ្នា។ ក្នុងនោះដែរប៊ុលហ្គារីបានបណ្ដេញអ្នកការទូតរុស្ស៊ី១០នាក់កាលពីខែមីនា។ ទំនាក់ទំនងរវាងប្រទេសទាំង២ក្លាយជាជូរចត់ ក្រោយរឿងអាស្រូវចារកម្មជាបន្តបន្ទាប់ចាប់តាំងពីឆ្នាំ ២០១៩។
ប្រភព៖ Reuters
