ម៉ូស្គូ៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានពិភាក្សាអំពីវិបត្តិ អ៊ុយក្រែន និងទីផ្សារស្បៀងអាហារពិភពលោក ព្រមទាំងទំនាក់ទំនង សេដ្ឋកិច្ចទ្វេភាគីជាមួយនាយករដ្ឋមន្រ្តីឥណ្ឌាលោក ណារិនដ្រា ម៉ូឌី តាមប្រព័ន្ធទូរស័ព្ទនៅថ្ងៃសុក្រសប្តាហ៍នេះ។

វិមានក្រឹមឡាំងបានបញ្ជាក់នៅក្នុងសេចក្តីថ្លែងការណ៍មួយថា លោក ពូទីន បាននិយាយថា អ៊ុយក្រែន និង អ្នកឧបត្ថម្ភនៅលោកខាងលិច របស់ខ្លួនកំពុងបង្កើនវិបត្តិអ៊ុយក្រែន ក៏ដូចជារំខានដល់កិច្ចខិតខំ ប្រឹងប្រែងដើម្បីដោះស្រាយបញ្ហានេះតាមលក្ខណៈការទូត។ លោក ពូទីន បន្តថា ស្ថានភាពបច្ចុប្បន្ននៃទីផ្សារម្ហូបអាហារពិភពលោក គឺជាលទ្ធផលនៃកំហុសជាប្រព័ន្ធដោយប្រទេសមួយចំនួន ដែលបាន រំខានដល់ពាណិជ្ជកម្មសេរី នៃផលិតផលម្ហូបអាហារ និងបង្កឱ្យមាន ការកើនឡើងតម្លៃ។

លោក ពូទីន បន្ថែមថា ទោះបីជាមានស្ថានភាពលំបាក ដែលកាន់តែ ស្មុគស្មាញដោយ “ទណ្ឌកម្មប្រឆាំងរុស្ស៊ីខុសច្បាប់” ក៏ដោយ ក៏រុស្ស៊ី នៅតែជាអ្នកផលិត និងអ្នកផ្គត់ផ្គង់ដែលអាចទុកចិត្តបាននៃ ដំណាំ ធញ្ញជាតិ និងជី ព្រមទាំងក្រុមហ៊ុនដឹកជញ្ជូនថាមពលដល់ដៃគូឥណ្ឌា ក្នុងចំណោមអ្នកផ្សេងទៀត។

បើតាមសេចក្តីថ្លែងការណ៍របស់ក្រសួងកិច្ចការបរទេសឥណ្ឌា លោក ម៉ូឌី បានរំលឹកឡើងវិញនូវជំហរដ៏យូរអង្វែងរបស់ឥណ្ឌា ក្នុងការពេញ ចិត្តចំពោះការសន្ទនា និងការទូតពាក់ព័ន្ធនឹងវិបត្តិនេះ។

សេចក្តីថ្លែងការណ៍របស់វិមានក្រឹមឡាំងបានបន្ថែមថា មេដឹកនាំទាំង ពីរបានអះអាងជាថ្មីនូវការប្តេជ្ញាចិត្តរបស់ពួកលោក ក្នុងការពង្រឹងភាព ជាដៃគូយុទ្ធសាស្ត្រដែលមានឯកសិទ្ធិពិសេសរវាងរុស្ស៊ី និងឥណ្ឌា ហើយ បានពិភាក្សាអំពីការអភិវឌ្ឍន៍ទំនាក់ទំនងពាណិជ្ជកម្ម និងសេដ្ឋកិច្ចទ្វេភាគី៕
ប្រភព៖ ស៊ីនហួរ ប្រែសម្រួល៖ ទីណា និងបុត្រា