ក្រុមបាតុករស្រីលង្កាសម្រុកចូលផ្ទះប្រធានាធិបតី បង្ខំឱ្យមេដឹកនាំភៀសខ្លួនចេញ
បាតុករស្រីលង្ការាប់ម៉ឺននាក់ដែលទាមទារឱ្យលោកប្រធានាធិបតី ហ្គូតាបាយ៉ា រ៉ាចាប៉ាស្កា (Gotabaya Rajapaksa) ចុះចេញពីដំណែង បានសម្រុកចូលទៅក្នុងផ្ទះមេដឹកនាំរូបនេះក្នុងរដ្ឋធានីកូឡ៊ុំបូទាំងកំហឹងកាលពីថ្ងៃសៅរ៍។ នេះបើតាមការចុះផ្សាយរបស់ទីភ្នាក់ងារសារព័ត៌មានផ្សេងៗគ្នា។
ទីភ្នាក់ងារសារព័ត៌មានAFPស្រង់សម្ដីប្រភពមន្រ្តីក្រសួងការពារជាតិថា ហេតុការណ៍នេះបង្ខំឱ្យលោក រ៉ាចាប៉ាស្កាដែលបដិសេធមិនចុះចេញពីដំណែងម្ដងហើយម្ដងទៀតនោះ ជម្លៀសខ្លួនចេញទៅទីសុវត្ថិភាព។
ក្នុងបាតុកម្មរ៉ាំរៃប៉ុន្មានសប្ដាហ៍ចុងក្រោយនេះ កងកម្លាំងស្រីលង្កាបានបាញ់គ្រាប់កាំភ្លើងទៅលើមេឃ ដើម្បីព្យាយាមការពារក្រុមបាតុករពីការសម្រុកចូលផ្ទះលោកប្រធានាធិបតី។ ប៉ុន្តែទីបំផុត ក្រុមបាតុកររាប់រយនាក់ក៏ទម្លុះចូលបានខណៈជាង ១០០ ០០០ នាក់ផ្សេងទៀតនៅឈរខាងក្រៅបន្តការតវ៉ារបស់ខ្លួន។ នេះបើតាមប៉ូលីសស្រីលង្កា។
មន្ទីរពេទ្យជាតិស្រីលង្កា (NHSL)និយាយថា ភាពចលាចលកាលពីថ្ងៃសៅរ៍ បណ្ដាលឱ្យមនុស្សយ៉ាងហោចណាស ៣១ នាក់ រួមទាំងប៉ូលីស២រូប រងរបួសក្នុងការប៉ះទង្គិចគ្នា ដោយមាន២នាក់រងរបួសធ្ងន់។
ឆ្លើយតបនឹងហេតុការណ៍នេះ លោកនាយករដ្ឋមន្រ្តីRanil Wickremesinghe បានកោះហៅកិច្ចប្រជុំបន្ទាន់មួយជាមួយមេដឹកនាំបក្ស ដើម្បីពិភាក្សាអំពីស្ថានភាពបច្ចុប្បន្ន និងរកដំណោះស្រាយ។
កោះស្រីលង្កា បានធ្លាក់ចូលទៅក្នុងវិបត្តិសេដ្ឋកិច្ចដ៏អាក្រក់បំផុតមិនធ្លាប់មានក្នុងរយៈពេលរាប់ទសវត្សរ៍មកនេះ ដោយធ្វើឱ្យមានកង្វះខាតប្រេងឥន្ធនៈ ថ្នាំពេទ្យនិងស្បៀងអាហារយ៉ាងខ្លាំង ខណៈតម្លៃនៃតម្រូវការទាំងនេះហក់ឡើងជាគំហុក។ វិបត្តិបានបង្ខំឱ្យប្រជាជនស្រីលង្ការាប់សែននាក់ ប្រមូលផ្តុំគ្នាធ្វើបាតុកម្មប៉ុន្មានខែចុងក្រោយនេះ ដោយទាមទារឱ្យលោករ៉ាចាប៉ាស្កាចុះចេញពីដំណែងក្រោមបទចោទប្រកាន់គ្រប់គ្រងសេដ្ឋកិច្ចខុស។
ប៉ុន្តែមេដឹកនាំដដែល បានបន្ទោសវិបត្តិសេដ្ឋកិច្ចរបស់ប្រទេសទៅលើការរាតត្បាតនៃជំងឺកូវីដ និងសង្រ្គាមអ៊ុយក្រែនចុងក្រោយបំផុត ហើយបដិសេធមិនចុះចេញពីដំណែង បើទោះបីជាមន្រ្តីកំពូលៗនៃគ្រួសារត្រកូលរ៉ាចាប៉ាស្កាមួយចំនួនធ្វើដូច្នេះក្ដី។
លោកWickremesinghe ឯណោះវិញនិយាយថាស្រីលង្កាបានចូលពិភាក្សាជាមួយមូលនិធិរូបិយវត្ថុអន្តរជាតិ (IMF) ដើម្បីស្តារសេដ្ឋកិច្ចរបស់ប្រទេសឡើងវិញ។ ប៉ុន្តែលោកនិយាយប្រាប់សភាកាលពីថ្ងៃអង្គារថា ការពិភាក្សាជាមួយIMF គឺពិបាកណាស់ដោយសារតែស្រីលង្កាចូលរួមក្នុងនាមជាប្រទេសក្ស័យធន មិនមែនជាប្រទេសកំពុងអភិវឌ្ឍ។
ប្រភព៖ DW
