លោក បៃដិន ពិបាកនឹងកំណត់របៀបវារៈ មុនដំណើរទស្សនៈកិច្ចទៅអារ៉ាប៊ីសាអូឌីត
ខណៈសង្រ្គាមនៅអ៊ុយក្រែនធ្វើឱ្យប្រេងឥន្ធនៈឡើងថ្លៃកាន់តែខ្លាំងនៅសហរដ្ឋអាមេរិក និងទូទាំងពិភពលោក ការផលិតប្រេងនឹងក្លាយជាចំណុចមួយនៃរបៀបវារៈរបស់លោកប្រធានាធិបតី ចូ បៃដិន ក្នុងដំណើរទស្សនកិច្ចទៅអារ៉ាប៊ីសាអូឌីតនាពាក់កណ្ដាលខែកក្កដានេះ។
ដំណើរទស្សនកិច្ចនេះ ត្រូវបានគេមើលឃើញថាជាការផ្លាស់ប្ដូរផ្នែកការទូតយ៉ាងខ្លាំងសម្រាប់លោក បៃដិន ដែលធ្លាប់ប្ដេជ្ញាចិត្តក្នុងការធ្វើឱ្យក្រុងរីយ៉ាដក្លាយជារដ្ឋ «ដាច់ចេញពីគេ» ជុំវិញការចោទប្រកាន់សម្លាប់អ្នកកាសែតលោកចាម៉ាល ខាសហូកជី (Jamal Khashoggi) ដែលគេចោទថារជ្ជទាយាទព្រះអង្គម្ចាស់ម៉ូហាម៉េដ ប៊ីន សាលម៉ាន (Mohammed bin Salman) ជាអ្នកបញ្ជា។
ប៉ុន្តែខណៈដែលដំណើរទស្សនកិច្ចខិតកាន់តែកៀក លោក បៃដិន និងជំនួយការកំពូលរបស់លោកត្រូវបានគេរាយការណ៍ថា គេចចេញពីការទទួលស្គាល់ថាវិបត្តិថាមពលជាកត្តាសំខាន់ដែលជំរុញឱ្យអាមេរិកព្យាយាមចាប់ដៃអារ៉ាប៊ីសាអូឌីត។ ផ្ទុយទៅវិញ បញ្ហាជាច្រើនត្រូវបានរំពឹងថានឹងយកទៅពិភាក្សា ចាប់តាំងពីការធ្វើប្រក្រតីភាវូបនីកម្មទំនាក់ទំនងជាមួយអ៊ីស្រាអែល រហូតដល់ការបញ្ចប់សង្រ្គាមនៅយេម៉ែន ការស្វែងរកដំណោះស្រាយជាមួយអ៊ីរ៉ង់បញ្ហាអាកាសធាតុ និងការបង្កើតយុទ្ធសាស្ត្រ«ប្រឆាំងភេរវកម្ម»។
ក្រុមអ្នកវិភាគនិយាយថា រូបភាពបែបនេះបង្ហាញពីការស្ទាក់ស្ទើររបស់លោកបៃដិន ជាមួយអារ៉ាប៊ីសាអូឌីតចំពេលមានការព្រួយបារម្ភអំពីបញ្ហាសិទ្ធិមនុស្ស ក៏ដូចជាកិច្ចខិតខំប្រឹងប្រែងរបស់រដ្ឋបាលរបស់លោកក្នុងការទប់ទល់នឹងការរិះគន់ពីសមាជិកសភានៅក្រុងវ៉ាស៊ីនតោន។
លោកKristian Coates Ulrichsenអ្នកសិក្សាពីមជ្ឈិមបូព៌ានៅវិទ្យាស្ថានគោលនយោបាយសាធារណៈBakerនៃសាកលវិទ្យាល័យ Rice និយាយប្រាប់សារព័ត៌មានAl Jazeeraថា៖ «វាអាចថា ការផ្ដោតលើប្រក្រតីភាវូបនីកម្មទំនាក់ទំនង និងការព្យាយាមធ្វើឱ្យមានស្ថិរភាពឬនាំមកនូវសន្តិភាពដល់តំបន់គឺជាវិធីមួយដើម្បីព្យាយាម និងផ្លាស់ប្តូរការនិយាយដែលថាដំណើរទស្សនកិច្ចនេះមានលក្ខណៈជាមិត្តខាងនយោបាយសម្រាប់សេតវិមាន»។
ដូចនឹងអ្វីដែលលោក Ulrichsenនិយាយ ខណៈដែលសមាជិកជាច្រើននៃបក្សប្រជាធិបតេយ្យរបស់លោកបៃដិនមានមន្ទិលសង្ស័យលើការពង្រឹងទំនាក់ទំនងកាន់តែស៊ីជម្រៅជាមួយក្រុងរីយ៉ាដ មានការឯកភាពគ្នាស្ទើរតែទាំងស្រុងនៅក្រុងវ៉ាស៊ីនតោនចំពោះការគាំទ្រលើប្រក្រតីភាវូបនីកម្មទំនាក់ទំនងរវាងសម្ព័ន្ធមិត្តអ៊ីស្រាអែល និងបណ្ដាប្រទេសអារ៉ាប់។
កន្លងមក លោកបៃដិន បាននិយាយអំពីអ៊ីស្រាអែល និងសន្តិភាព នៅពេលសួរពីដំណើរទស្សនកិច្ច។ លោកប្រាប់ក្រុមអ្នកយកព័ត៌មានកាលពីពាក់កណ្ដាលខែមិថុនាថា៖ «វាទាក់ទងនឹងសន្តិសុខជាតិសម្រាប់ពួកគេ សម្រាប់ជនជាតិអ៊ីស្រាអែល។ វាទាក់ទងនឹងបញ្ហាធំជាងបញ្ហាថាមពល» ទោះបីជារដ្ឋបាលរបស់លោកធ្លាប់ទទូចសុំឱ្យអារ៉ាប៊ីសាអូឌីត បង្កើតការផលិតប្រេងក្ដី។
តាមការប្រកាសរបស់សេតវិមានដំណើរទស្សនៈកិច្ចដែលនឹងធ្វើឡើងចន្លោះពីថ្ងៃទី ១៣ ដល់ ថ្ងៃទី ១៦ ខែកក្កដានេះលោក បៃដិន នឹងជួបជាមួយព្រះអង្គម្ចាស់ប៊ីន សាលម៉ានដែលបដិសេធថា អារ៉ាប៊ីសាអូឌីតមិនដឹងពីការបញ្ជាណាមួយលើការសម្លាប់លោក ខាសហូកជីក្នុងឆ្នាំ ២០១៨ នៅតួកគីនោះទេ។
ជុំវិញបញ្ហានេះ លោក បៃដិន ធ្លាប់និយាយកាលពីដើមខែមិថុនា អំពីដំណើរទស្សនៈកិច្ចថា៖«ខ្ញុំនឹងមិនផ្លាស់ប្តូរទស្សនៈរបស់ខ្ញុំលើសិទ្ធិមនុស្សទេ។ ប៉ុន្តែក្នុងនាមជាប្រធានាធិបតីសហរដ្ឋអាមេរិក ការងាររបស់ខ្ញុំគឺនាំមកនូវសន្តិភាព ប្រសិនបើខ្ញុំអាចធ្វើបាន។ ហើយនោះជាអ្វីដែលខ្ញុំនឹងព្យាយាមធ្វើ»។
លោកShibleyTelhamiសាស្រ្តាចារ្យសម្រាប់សន្តិភាពនិងការអភិវឌ្ឍន៍នៅសាកលវិទ្យាល័យMaryland និយាយប្រាប់Al Jazeeraថា មានការគណនានយោបាយលើការសង្កត់ធ្ងន់នៃទំនាក់ទំនងក្នុងតំបន់របស់អ៊ីស្រាអែលចំពោះដំណើរទស្សនៈរបស់លោកបៃដិន។ លោកនិយាយថា វាជាការគណនាខុសមួយ ព្រោះប្រក្រតីភាវូបនីកម្មទំនាក់ទំនងអ៊ីស្រាអែល-អារ៉ាប៊ីសាអូឌីតទទួលការគាំទ្រខ្លាំងក្នុងសភា ប៉ុន្តែអ្នកបោះឆ្នោតឱ្យបក្សប្រជាធិបតេយ្យកាន់តែមានទំនោរទៅប៉ាឡេស្ទីន ជាជាងអ៊ីស្រាអែលឥឡូវនេះ។
យ៉ាងណាមិញលោក Juan Cole សាស្ត្រាចារ្យប្រវត្តិសាស្រ្តនៅសាកលវិទ្យាល័យMichigan និយាយថា ការលើកកម្ពស់ទំនាក់ទំនងក្នុងតំបន់របស់អ៊ីស្រាអែលមុនដំណើរទស្សនកិច្ចទៅអារ៉ាប៊ីសាអូឌីតត្រូវគ្នានឹងការគាំទ្ររបស់លោកបៃដិនចំពោះក្រុងហ្សេរ៊ុយសាឡិម និងផលប្រយោជន៍នយោបាយរបស់លោក។ លោក Coleបានលើកឡើងពីការលេចធ្លោលើការគាំទ្រចំពោះលោក បៃដិន ក្នុងចំណោមអ្នកបោះឆ្នោតដែលជាអ្នកគាំទ្រអ៊ីស្រាអែល។
លោកCole បន្ថែមថា ប្រសិនបើការផ្តោតជាសាធារណៈរបស់សេតវិមានមានតែលើប្រេង នោះវានឹងបង្ហាញថាលោកបៃដិនកំពុង«គោរពតាមលក្ខខណ្ឌសេដ្ឋកិច្ច»និងបោះបង់ចោល«ជំហរសីលធម៌» របស់លោកលើទំនាក់ទំនងជាមួយក្រុងរីយ៉ាដ ដែលរដ្ឋបាលលោកបៃដិន បង្ហាញកង្វល់ពីបញ្ហាសិទ្ធិមនុស្ស។
ក្នុងអត្ថបទចុះផ្សាយនៅលើកាសែតវ៉ាស៊ីនតោនបុស្តិ៍កាលពីថ្ងៃសៅររ៍ លោក បៃដិន និយាយថា៖ «ខ្ញុំដឹងថាមានមនុស្សជាច្រើនមិនយល់ស្របនឹងការសម្រេចចិត្តរបស់ខ្ញុំ ក្នុងការធ្វើទស្សនៈកិច្ចទៅអារ៉ាប៊ីសាអូឌីត។ ទស្សនៈរបស់ខ្ញុំអំពីសិទ្ធិមនុស្សគឺច្បាស់លាស់ និងយូរអង្វែង ហើយសេរីភាពជាមូលដ្ឋានតែងតែមាននៅក្នុងរបៀបវារៈរបស់ខ្ញុំពេលធ្វើទស្សនកិច្ចទៅបរទេស»។
សម្រាប់ពេលនេះ វាមិនហាក់បីដូចជាលោក បៃដិននឹងធានានូវទំនាក់ទំនងការទូតពេញលេញរវាងអារ៉ាប៊ីសាអូឌីត និងអ៊ីស្រាអែលក្នុងអំឡុងពេលទស្សនកិច្ចរបស់លោកនោះទេ ទោះបីជាមានការព្យាករផ្សេងៗលើបញ្ហានេះក្ដី។
យ៉ាងណាមិញ ក្នុងរូបភាពមួយ អ្នកវិភាគនៅតែគិតថាលោក បៃដិន កំពុងពិបាកទាំងកំណត់របៀបវារៈ និងលទ្ធផលក្នុងការសម្រេចបាន។ ទោះបីអ្នកវិភាគមានការយល់ស្របថាការផលិតប្រេងនឹងក្លាយជាអាទិភាពចម្បងរបស់លោកបៃដិនក្នុងដំណើរទស្សនៈកិច្ចក្ដី មន្ត្រីសេតវិមានសង្កត់ធ្ងន់ថា បញ្ហាថាមពលគ្រាន់តែចំណុចមួយនៃ«របៀបវារៈធំ»មួយប៉ុណ្ណោះ។
យ៉ាងណាមិញលោក Cole និយាយថា ការកាត់បន្ថយតម្លៃប្រេងមានសារៈសំខាន់ណាស់សម្រាប់លោកបៃដិនទាំងក្នុងស្រុក និងក្នុងលក្ខខណ្ឌនៃគោលនយោបាយការបរទេស។លោកថា ប្រសិនបើមិនមែនបញ្ហាប្រេងទេលោក បៃដិន នឹងមិនធ្វើដំណើរទស្សនកិច្ចទៅអារ៉ាប៊ីសាអូឌីតនោះឡើយ។
ប្រភព៖ Aljazeera
