ការភ័យខ្លាចថាសាំងនឹងឡើងថ្លៃម្ដងទៀត ជំរុញឱ្យរដ្ឋបាលបៃដិន ស្វែងរកការកំណត់លើតម្លៃប្រេងរុស្ស៊ី
ខណៈតម្លៃសាំងនៅសហរដ្ឋអាមេរិកដែលហក់ឡើងហួស ៥ ដុល្លារ/ហ្គាឡុងក្នុងខែមិថុនា ធ្លាក់ចុះស្ទើរតែ ២៥ សេនគិតត្រឹមសប្ដាហ៍មុនក៏មានការព្រួយបារម្ភដែលថា តម្លៃថាមពលហ្វូស៊ីលនេះនឹងហក់ឡើងសារជាថ្មីឡើងវិញ។
មន្ត្រីសេតវិមានបារម្ភថា ការដាក់ទណ្ឌកម្មថ្មីរបស់អ៊ឺរ៉ុប ដែលមានបំណងទប់ស្កាត់លំហូរប្រេងរបស់រុស្ស៊ី នៅចុងឆ្នាំ អាចនឹងធ្វើឱ្យតម្លៃថាមពលកើនឡើងជាថ្មីដែលនឹងធ្វើឱ្យសហរដ្ឋអាមេរិក និងសេដ្ឋកិច្ចនៃប្រទេសផ្សេងទៀតធ្លាក់ចុះធ្ងន់ធ្ងរ។
ដើម្បីទប់ស្កាត់លទ្ធផលនោះ មន្ត្រីអាមេរិកបានអនុវត្តផែនការដែលមិនធ្លាប់មានពីមុនមក ក្នុងគោលបំណងធ្វើឱ្យតម្លៃប្រេងពិភពលោកធ្លាក់ចុះ ដែលជាគម្រោងមួយបំពេញបន្ថែមលើទណ្ឌកម្មរបស់អឺរ៉ុបដោយអនុញ្ញាតឱ្យលំហូរប្រេងឆៅរុស្ស៊ីទៅកាន់ទីផ្សារពិភពលោកបន្តធ្វើទៅបានក្នុងតម្លៃថោកខ្លាំង។
អឺរ៉ុបដែលបន្តនាំចូលប្រេងរុស្ស៊ីច្រើនជាង២លានបារ៉ែល/ថ្ងៃ គ្រោងនឹងដាក់បម្រាមលើការនាំចូលទាំងនោះនៅចុងឆ្នាំនេះ រួមជាមួយនឹងជំហានផ្សេងទៀតដែលមានបំណងធ្វើឱ្យស្មុគស្មាញដល់កិច្ចខិតខំប្រឹងប្រែងរបស់រុស្ស៊ីក្នុងការនាំចេញប្រេងឥន្ធនៈជាសកល។
ខណៈលោកប្រធានាធិបតី ចូ បៃដិន ជំរុញឱ្យអឺរ៉ុបកាត់ផ្តាច់ប្រេងរុស្ស៊ីសម្រាប់ទណ្ឌកម្មចំពោះការឈ្លានពានអ៊ុយក្រែន អ្នកព្យាករណ៍មួយចំនួន រួមជាមួយនឹងជំនួយសេដ្ឋកិច្ចកំពូលរបស់ប្រធានាធិបតី ឥឡូវនេះមានការភ័យខ្លាចថាគោលនយោបាយបែបនេះអាចបណ្តាលឱ្យមានបរិមាណដ៏ច្រើននៃប្រេងរបស់រុស្ស៊ី ដែលផ្គត់ផ្គង់ជាង ១/១០ នៃតម្រូវការសកល នឹងត្រូវដកចេញពីទីផ្សារពិភពលោកភ្លាម។
អ្នកវិភាគប៉ាន់ស្មានថា ការថយចុះការផ្គត់ផ្គង់បែបនេះ អាចធ្វើឲ្យតម្លៃប្រេងកើនឡើងដល់ ២០០ ដុល្លារ/បារ៉ែល ឬច្រើនជាងនេះ ដែលមានន័យថា ប្រជាជនអាមេរិកចំណាយ ៧ ដុល្លារ/ហ្គាឡុងសម្រាប់ប្រេងសាំង។
គ្រោះនៃការឡើងថ្លៃប្រេងជាថ្មី ដែលធ្វើឱ្យប៉ះពាល់ដល់សេដ្ឋកិច្ចពិភពលោក និងការបោះឆ្នោតពាក់កណ្ដាលអាណត្តិនៅសហរដ្ឋអាមេរិកជំរុញឱ្យរដ្ឋបាលលោកបៃដិន ព្យាយាមបញ្ចុះបញ្ចូលរដ្ឋាភិបាល និងមេដឹកនាំអាជីវកម្មជុំវិញពិភពលោកនានាឱ្យព្រមព្រៀងកំណត់តម្លៃប្រេងរបស់រុស្ស៊ី។
មន្ត្រីរដ្ឋបាល និងលោក បៃដិននិយាយថា គោលដៅបែបនេះមាន ២ យ៉ាងគឺ៖ ដើម្បីបង្អាក់ម៉ាស៊ីនសង្គ្រាមរបស់រុស្ស៊ី ដែលមានសេដ្ឋកិច្ចពឹងផ្អែកលើការនាំចេញប្រេងនិងកាត់បន្ថយសម្ពាធលើអ្នកប្រើប្រាស់ថាមពលជុំវិញពិភពលោកដែលកំពុងប្រឈមនឹងការកើនឡើងតម្លៃប្រេងឥន្ធនៈ។
ដើម្បីដឹកជញ្ជូនប្រេងរបស់ខ្លួនទៅកាន់ទីផ្សារ រុស្ស៊ីទាញយកការផ្តល់ហិរញ្ញប្បទាន កប៉ាល់ និងការធានារ៉ាប់រងពីចក្រភពអង់គ្លេស អឺរ៉ុប និងសហរដ្ឋអាមេរិក។ទណ្ឌកម្មរបស់អឺរ៉ុប មិនត្រឹមតែកាត់រុស្ស៊ីចេញពីទីផ្សារប្រេងភាគច្រើននៅអឺរ៉ុបប៉ុណ្ណោះទេ ប៉ុន្តែក៏កាត់ផ្ដាច់ពីកន្លែងដែលអឺរ៉ុបគាំទ្រផងដែរ។ ប្រសិនបើអនុវត្តយ៉ាងតឹងរ៉ឹង វិធានការទាំងនោះអាចបិទក្រុងម៉ូស្គូពីការដឹកជញ្ជូនប្រេងរបស់ខ្លួន យ៉ាងហោចណាស់ក៏បណ្ដោះអាសន្នដែរ។
សំណើរបស់រដ្ឋបាលបៃដិននឹងមិនប៉ះពាល់ដល់ការហាមឃាត់របស់អឺរ៉ុបទេប្រសិនបើប្រេងរុស្ស៊ីលក់បានក្នុងតម្លៃមិនលើសពីតម្លៃកំណត់ដោយសហរដ្ឋអាមេរិក និងសម្ព័ន្ធមិត្តប៉ុន្តែវានឹងបន្ធូរបន្ថយការរឹតបន្តឹងមួយចំនួនទៀត។
អ្នកសេដ្ឋកិច្ច និងអ្នកជំនាញឧស្សាហកម្មប្រេងមួយចំនួនមានការសង្ស័យថា ផែនការនេះនឹងដំណើរការ ទាំងជាមធ្យោបាយកាត់បន្ថយប្រាក់ចំណូលសម្រាប់វិមានក្រឹមឡាំង ឬដើម្បីជំរុញឱ្យតម្លៃប្រេងធ្លាក់ចុះ។ ពួកគេព្រមានថា ផែនការនេះភាគច្រើនអាចបង្កើនក្រុមហ៊ុនចម្រាញ់ប្រេង ហើយអាចនឹងត្រូវបង្រ្កាបដោយរុស្ស៊ី និងសម្ព័ន្ធមិត្ត។ លើសពីនោះក្រុងម៉ូស្គូក៏អាចបដិសេធមិនលក់ក្នុងតម្លៃកំណត់។
រដ្ឋលេខាធិការរតនាគារJanet L. Yellen ដែលជាអ្នកផ្ដួចផ្ដើមនៃគម្រោងនេះ ជំរុញឱ្យមានការគាំទ្របន្ថែមទៀត នៅពេលអ្នកស្រីជួបជាមួយរដ្ឋមន្ត្រីហិរញ្ញវត្ថុផ្សេងទៀតមកពីក្រុមប្រទស២០រួមទាំងរុស្ស៊ីផងដែរ នៅអាស៊ីក្នុងសប្តាហ៍នេះ។តែមន្ត្រីរតនាគារនិយាយថា គណៈប្រតិភូអាមេរិកនឹងមិនមានការទាក់ទងជាមួយរុស្ស៊ីទេ។
ប៉ុន្តែសូម្បីតែអ្នកមានមន្ទិលសង្ស័យមួយចំនួននិយាយថា ការកំណត់តម្លៃអាចរក្សាការបូមប្រេងរបស់រុស្ស៊ីឱ្យបានគ្រប់គ្រាន់ ដើម្បីជៀសវាងការឡើងថ្លៃដែលបង្កឱ្យមានវិបត្តិសេដ្ឋកិច្ចរបស់ប្រទេស។
មន្ត្រីរដ្ឋបាលនិយាយប្រាប់កាសែតញូវយ៉កថែមស៍ថាមានសញ្ញានៅក្នុងទីផ្សារប្រេង សំណើរកំណត់កំពុងជួយធានាដល់ពាណិជ្ជកររួចហើយថាពិភពលោកអាចជៀសវាងការបាត់បង់ប្រេងរុស្ស៊ីរាប់លានបារ៉ែលក្នុងមួយថ្ងៃភ្លាមៗនៅចុងឆ្នាំនេះ។
លោកWally Adeyemo អនុលេខាធិការរតនាគារនិយាយក្នុងបទសម្ភាសន៍មួយថា៖ «យើងគិតថារឿងមួយដែលមានប្រសិទ្ធភាពបំផុតដែលយើងអាចធ្វើដើម្បីដោះស្រាយកង្វល់ដែលយើងមានគឺការអនុវត្តតម្លៃកំណត់ ព្រោះវាកាត់បន្ថយហានិភ័យនៃការធ្លាក់ចុះរបស់ពិភពលោក» និងអ្វីដែលសំខាន់បំផុតសម្រាប់សេដ្ឋកិច្ចដំណើរការទៅមុខ។
អ្នកស្រាវជ្រាវនៅក្រុមហ៊ុនស្រាវជ្រាវHigh Frequency Economics ប៉ាន់ប្រមាណក្នុងកំណត់ត្រាមួយដល់អតិថិជនកាលពីសប្តាហ៍មុនថា វិបត្តិសេដ្ឋកិច្ចកំពុងចាប់ផ្តើមនៅទូទាំងអឺរ៉ុប អង់គ្លេស និងជប៉ុនរួចហើយ។
យ៉ាងណាមិញជំនួយការសេដ្ឋកិច្ចជិតស្និទ្ធបំផុតរបស់លោក បៃដិនទទូចថា សេដ្ឋកិច្ចអាមេរិកមិនទាន់មានវិបត្តិសេដ្ឋកិច្ចនៅឡើយទេ ទោះបីជាឆ្លងកាត់កំណើនអវិជ្ជមានក្នុងត្រីមាស២ជាប់ៗគ្នាក្ដី។ មន្ត្រីរដ្ឋបាលក៏មើលឃើញពីហេតុផលសុទិដ្ឋិនិយមមួយ គឺការធ្លាក់ចុះនៃតម្លៃប្រេងជិត២៥ សេនកាលពីសប្ដាហ៍ ពីតម្លៃខ្ពស់ជាង ៥ ដុល្លារ/ហ្គាឡុងពីខែមុន។
ការកើនឡើងតម្លៃប្រេងសាំងកន្លងមក គឺជាផលវិបាកផ្ទាល់នៃការឈ្លានពានអ៊ុយក្រែនរបស់រុស្ស៊ី និងការឆ្លើយតបរបស់លោកខាងលិច ដឹកនាំដោយសហរដ្ឋអាមេរិក ក្នុងការហាមឃាត់ការនាំចូលប្រេងរុស្ស៊ី។
អ្នកជំនាញខ្លះសង្ស័យថាសំណើកំណត់តម្លៃនឹងនៅតែផ្តល់ឱ្យរុស្ស៊ីរកប្រាក់ចំណូលពីថាមពលបានច្រើន។ តាមវិធីមួយចំនួនផែនការរបស់រដ្ឋបាលបៃដិន គឺជាការទទួលស្គាល់ថាទណ្ឌកម្មកន្លងទៅមិនសម្រេចបានដូចបំណងនោះទេ ខណៈដែលរុស្ស៊ីនៅតែកើបលុយរាប់ពាន់លានពីចិន និងឥណ្ឌា ដែលបង្កើនការទិញប្រេងរបស់រុស្ស៊ីក្នុងតម្លៃទាបជាងប្រេងអន្តរជាតិ។
តាមការរាយការណ៍របស់សារព័ត៌មានផ្សេងៗ ខណៈតម្លៃប្រេងអន្តរជាតិផ្សេងហក់ឡើងដល់ ១២០ ដុល្លារ/បារ៉ែលនៅខែមិថុនា រុស្ស៊ីលក់ប្រេងរបស់ខ្លួនឱ្យចិន និងឥណ្ឌាទាបជាងតម្លៃនោះពី ២០ ទៅ ៣០ដុល្លារ។ហើយបើតាមការចុះផ្សាយកាលពីសប្ដាហ៍មុនរបស់សារព័ត៌មានBloombergដែលស្រង់សម្ដីប្រភពដឹងពីព័ត៌មាននិយាយជាអនាមិកថាសហរដ្ឋអាមេរិក និងសម្ព័ន្ធមិត្តបានពិភាក្សាអំពីការព្យាយាមកំណត់តម្លៃប្រេងរុស្ស៊ីចន្លោះពី ៤០ ទៅ ៦០ ដុល្លារ/បារ៉ែល។
ប្រភព៖ New York Times
