ក្រុមហ៊ុនរុស្ស៊ីចាប់ផ្តើមការដឹកជញ្ជូនតាមសមុទ្រជាទៀងទាត់ទៅកាន់ប្រទេសឥណ្ឌាចិន
ក្រុមហ៊ុនរបស់ប្រទេសរុស្សីចាប់ផ្តើមនាំចេញទំនិញចាំបាច់សំខាន់តាមផ្លូវសមុទ្រទៅកាន់ប្រទេសឥណ្ឌា និងប្រទេសចិនដែលជាប្រទេសមហាអំណាចក្នុងតំបន់អាស៊ី មិនអនុវត្តទណ្ឌកម្មប្រឆាំងប្រទេសរុស្ស៊ី។
កាសែត The Economic Times ដែលមានមូលដ្ឋាននៅប្រទេសឥណ្ឌា បានផ្សាយនៅចន្ទថា ក្រុមហ៊ុនរុស្ស៊ីបានចាប់ផ្តើមការដឹកជញ្ជូនទំនិញតាមសមុទ្រជាទៀងទាត់ដើម្បីចែកចាយទំនិញសំខាន់ៗទៅកាន់ប្រទេសឥណ្ឌា និងប្រទេសចិនចំពេលមានការដាក់ទណ្ឌកម្មរបស់លោកខាងលិច។
ទីភ្នាក់ងារព័ត៌មានរុស្ស៊ី TASS ក៏បានផ្សារបន្តពីសកម្មភាពដឹកជញ្ជូនទំនិញនៃកញ្ចប់ទីមួយ ពីប្រទេសរុស្ស៊ីត្រូវបានដឹកតាមរយៈប្រទេសអ៊ីរ៉ង់បានមកដល់កំពង់ផែឥណ្ឌាមួយនៅលើច្រករបៀងដឹកជញ្ជូនខាងជើង-ខាងត្បូង (INSTC) ដែលកំពុងសាងសង់។
ប្រភពបានបង្ហាញថា ក្រុមហ៊ុនដឹកជញ្ជូនទំនិញរុស្ស៊ី Inteco និង Swift Transport Group ដែលមានមូលដ្ឋាននៅប្រទេសចិន បានបង្កើតក្រុមហ៊ុនបុត្រសម្ព័ន្ធរួមគ្នាសម្រាប់សេវាកម្មដឹកជញ្ជូនកុងតឺន័ររវាង Vostochny នៅតំបន់ Far East របស់រុស្ស៊ី និងកំពង់ផែក្នុងប្រទេសចិន។
យោងតាមកាសែត The Economic Times ការដឹកជញ្ជូនលើកនេះគឺជាផលិតផលធញ្ញជាតិចាំបាច់សម្រាប់ការប្រើប្រាស់ បន្ទាប់ពីប្រទេសនានារួមទាំងអង្គការសហប្រជាជាតិផង បានអំពាវនាវឲ្យប្រទេសរុស្ស៊ីបើកច្រកសមុទ្រសម្រាប់ការនាំចេញស្បៀងអាហារ ដើម្បីកាត់បន្ថយអតិផរណានិងការស្រេកឃ្លាន។ ប្រទេសចិនបានចំណាយប្រហែល ១៩ ពាន់លានដុល្លារដើម្បីទិញប្រេង ឧស្ម័ន និងធ្យូងថ្មរបស់រុស្ស៊ីក្នុងរយៈពេល ៣ខែរហូតដល់ចុងខែឧសភា ពោលគឺស្ទើរតែទ្វេដងនៃបរិមាណកាលពីឆ្នាំមុន។ ប្រទេសឥណ្ឌាបានចំណាយប្រាក់ចំនួន ៥,១ពាន់លានដុល្លារក្នុងរយៈពេលដូចគ្នា ច្រើនជាង៥ដងនៃតម្លៃកាលពីឆ្នាំមុន៕
ប្រភព៖ TASS
