បន្ទាប់ពីឈ្នះឆ្នោតនៅសភាជាន់ខ្ពស់ នាយករដ្ឋមន្ត្រីជប៉ុនប្តេជ្ញាសម្រេចឲ្យបាននូវលទ្ធផលបង្កើនមូនធនសម្រាប់ស្រោចស្រង់វិស័យសេដ្ឋកិច្ច និងវិស័យយោធា
មេដឹកនាំជប៉ុនបានបង្ហាញការប្តេជ្ញាចិត្តកាន់តែខ្លាំងលើការសម្រេចបាននូវគោលនយោបាយរបស់លោកដែលបានលាតត្រដាងក្នុងពេលកន្លងមកសម្រាប់ការបង្កើនមូលនិធិ និង ការបង្កើនការចំណាយសម្រាប់វិស័យការពារជាតិ។
ជ័យជំនះទទួលបានពីការបោះឆ្នោតព្រឹទ្ធសភាកាលពីថ្ងៃអាទិត្យគឺរយៈពេលតែ២ថ្ងៃបន្ទាប់ពីមរណៈភាពលើអតីតនាយករដ្ឋមន្ត្រី ស៊ីនហ្សូ អាបេ នឹងធ្វើឲ្យនាយករដ្ឋមន្ត្រីជប៉ុន ហ្វួមីអូ កិសិដា (Fumio Kishida) អាចសម្រួចផែនការគោលនយោបាយរបស់លោកដើម្បីបង្កើនមូលធន និងបង្កើនការចំណាយសម្រាប់វិស័យការពារជាតិ ដែលប្រឈមការគំរាមកំហែងក្នុងតំបន់យ៉ាងខ្លាំង។
សារព័ត៌មានជប៉ុន The Japanese Times បានផ្សាយថា គណបក្សប្រជាធិបតេយ្យសេរី (LDP) និងបក្សKomeito បានឈ្នះកៅអីចំនួន៧៦នៃអាសនៈប្រកួតប្រជែងចំនួន១២៥ ខណៈដែលគណៈបក្ស LDP តែមួយឈ្នះ៦៣ បានធ្វើឲ្យបក្សនេះអាចសម្រេចលើផែនការនានា ដោយមិនចាំបាច់ទទួលបានការគាំទ្រពីបក្សផ្សេង។
នាយករដ្ឋមន្ត្រីជប៉ុន Fumio Kishidaដែលឈានជើងចូលការិយាល័យអស់រយៈពេល៩ខែ ហាក់បង្ហាញពីកម្លាំងចិត្តដ៏មុតស្រួចរបស់លោកដោយសម្លឹងទៅរកការសម្រេចផែនការបង្កើតមូលនិធិថ្មី និងការចំណាយលើវិស័យការពារជាតិ បន្ទាប់ពីឃើញជ័យជម្នះដ៏ច្រើនសន្ធឹកសន្ធាប់កាលពីថ្ងៃអាទិត្យ។
នាយករដ្ឋមន្ត្រី Kishida បាននិយាយថា៖«ខ្ញុំប្តេជ្ញាថានឹងសម្រេចឲ្យបាននូវលទ្ធផលដែលជាផ្នែកនៃគំរូសេដ្ឋកិច្ចមូលធននិយមថ្មីរបស់ខ្ញុំ ដែលមានគោលបំណងជាចម្បងក្នុងការធ្វើឱ្យសេដ្ឋកិច្ចមានភាពរស់រវើកឡើងវិញ។ ទន្ទឹមនឹងនោះ ខ្ញុំនឹងចាត់វិធានការជាជំហានៗ ដើម្បីបន្តការងាររបស់យើងលើផ្នែកការទូត សន្តិសុខ និងវិសោធនកម្មរដ្ឋធម្មនុញ្ញ»។
ភ្នាក់ងារព័ត៌មានរបស់សារព័ត៌មាន The Straits Times បានដកស្រង់សម្តីលោកនាយករដ្ឋមន្ត្រីដូចដែលបាននិយាយថា៖«ខ្ញុំចង់នាំយកលទ្ធផលសម្រាប់មូលធនប្រភេទថ្មីដែលខ្ញុំបាននិងកំពុងលើកកម្ពស់។ យើងនឹងចាត់វិធានការដើម្បីដោះស្រាយនូវការឈឺចាប់ពីអតិផរណា និងសម្លឹងទៅរកការដំឡើងប្រាក់ឈ្នួល»។
នាយករដ្ឋមន្ត្រីជប៉ុនរូបនេះនឹងត្រៀមជំរុញផែនការហិរញ្ញវត្ថុដែលមានលក្ខណៈស្និទ្ធស្នាលនឹងទីផ្សារ ហើយលោក ក៏បានស្នើផែនការដើម្បីបង្កើនប្រាក់ចំណូលផ្អែកលើទ្រព្យសកម្មទ្វេដងក្នុងកិច្ចខិតខំប្រឹងប្រែងដើម្បីជំរុញសន្ទុះសម្រាប់ជំរុញការវិនិយោគក្នុងចំណោមគ្រួសារដែលតែងតែផ្តោតលើការសន្សំប្រាក់កន្លងមក។ ជាងពាក់កណ្តាលនៃទ្រព្យសកម្មគ្រួសារ ១៥,៣៩ពាន់ពាន់លានដុល្លាររបស់ប្រទេសជប៉ុននៅតែស្ថិតក្នុងគណនីសន្សំគិតត្រឹមខែមីនា។ នេះបើយោងតាមធនាគារកណ្តាលជប៉ុន។
The Japanese Times អះអាងថា ផែនការកាត់បន្ថយការបំភាយឧស្ម័នកាបូន (decarbonization)ទៅក្នុងលំហរបរិយាកាសក៏ជាអាទិភាពមួយនៅក្នុងគោលនយោបាយនេះ ដោយរដ្ឋាភិបាលរបស់លោកមានសំណើជំរុញឱ្យមានកិច្ចសហប្រតិបត្តិការបន្ថែមទៀតរវាងវិស័យសាធារណៈ និងឯកជន និងការអំពាវនាវឱ្យមានការបណ្តាក់ទុនពាក់ព័ន្ធចំនួន ១៥០ពាន់ពាន់លានយ៉េនក្នុងរយៈពេល១០ឆ្នាំខាងមុខ។
ប្រទេសជប៉ុនក៏នឹងផ្តល់អាទិភាពសំខាន់លើវិស័យការពារជាតិ នៅពេលដែលស្ថានភាពភូមិសាស្ត្រនយោបាយកាន់តែមានភាពតានតឹងឡើង បន្ទាប់ពីសង្គ្រាមរវាងប្រទេសរុស្ស៊ីដែលលើកកងទ័ពចូលលុកលុយប្រទេសអ៊ុយក្រែន ដោយមេដឹកនាំរុស្ស៊ីចោទប្រកាន់រដ្ឋាភិបាលអ៊ុយក្រែនបច្ចុប្បន្នថា បានប្រព្រឹត្តអំពើប្រល័យពូជសាសន៍លើប្រជាជនដែលនិយាយភាសារុស្ស៊ី។
ភាពតានតឹងលើភូមិសាស្រ្តនយោបាយក្នុងតំបន់ដែលបង្កក្តីបារម្ភដល់ប្រទេសជប៉ុននោះគឺដោយប្រទេសចិននិងកូរ៉េខាងជើងដែលជាប្រទេសប្រកាន់របបដឹកនាំបែបកុម្មុយនីសក៏បង្កើនឥទ្ធិពលយ៉ាងខ្លាំង ដោយប្រទេសចិនហាក់រថើនចង់បានកោះតៃវ៉ាន់ រីឯ កូរ៉េខាងជើងវិញក៏បង្កើនការសាកល្បងបាញ់មីស៊ីលរយៈចំងាយឆ្ងាយ។
មេដឹកនាំជប៉ុនបច្ចុប្បន្នមើលឃើញស្ថានការណ៍សន្តិសុខពិភពលោកក៏ដូចជាតំបន់អាស៊ី-ប៉ាស៊ីហ្វិកមានភាពផុយស្រួយខ្លាំងណាស់សម្រាប់ការបង្កើនសមត្ថភាពយោធានិងការពង្រឹងសម្ព័ន្ធមិត្តយោធានៅក្នុងតំបន់។
ក្នុងកិច្ចប្រជុំកំពូលសន្តិសុខតំបន់អាស៊ី-ប៉ាស៊ីហ្វិកកាលពីសប្តាហ៍ទី២នៃខែមិថុនា នាយករដ្ឋមន្ត្រីជប៉ុន Fumio Kishida បានប្រកាសពីផែនការជំនួយសន្តិសុខសម្រាប់បណ្តាប្រទេសឥណ្ឌូប៉ាស៊ីហ្វិកដោយមានទឹកប្រាក់២ពាន់លានដុល្លារក្នុងរយៈពេលបីឆ្នាំខាងមុខ។
ការផ្តល់ហិរញ្ញវត្ថុនោះនឹងផ្តោតលើសកម្មភាពពង្រឹងទូកល្បាត និងហេដ្ឋារចនាសម្ព័ន្ធដឹកជញ្ជូនតាមសមុទ្រ ខណៈពេលដែលការវិនិយោគលើធនធានមនុស្សចាំបាច់ ដូចជាការបណ្តុះបណ្តាល និងការអប់រំ។ នេះបើផ្អែកតាម japantimes បណ្តាញសារព័ត៌មានមានមូលដ្ឋាននៅប្រទេសជប៉ុន។
រដ្ឋបាលរបស់លោកនាយករដ្ឋមន្ត្រី Kishida ក៏កំពុងរៀបចំធ្វើសេចក្តីព្រាងគោលនយោបាយសន្តិសុខជាតិថ្មី ដោយរំលឹកឡើងវិញនូវជំរុញការចំណាយលើវិស័យការពារជាតិ និងបន្តពង្រឹងសមត្ថភាពយោធារបស់ប្រទេស។
នាយករដ្ឋមន្ត្រីជប៉ុនរូបនេះបានពិពណ៌នាផែនការនោះថា៖«ចាំបាច់បំផុត» បើជប៉ុនត្រូវរស់រានមានជីវិតក្នុងសករាជថ្មី។
លោក បន្តថា៖ «ខ្ញុំនឹងស្វែងរកការកសាងសណ្តាប់ធ្នាប់អន្តរជាតិប្រកបដោយស្ថិរភាពតាមរយៈការសន្ទនា មិនមែនការប្រឈមមុខដាក់គ្នានោះទេ។ ទោះយ៉ាងណាក៏ដោយ ក្នុងពេលជាមួយគ្នានេះ យើងត្រូវតែត្រៀមខ្លួនសម្រាប់ការលេចចេញនូវអង្គភាពដែលជាន់ឈ្លីសន្តិភាព និងសន្តិសុខរបស់ប្រទេសដទៃដោយការគំរាមកំហែងដោយកម្លាំង ដោយមិនគោរពច្បាប់។ ជាមធ្យោបាយនៃការទប់ស្កាត់ស្ថានភាពបែបនេះ និងការការពារខ្លួនយើង យើងត្រូវពង្រឹងការរារាំង និងការឆ្លើយតបរបស់យើង»។
លទ្ធផលឆ្នោតកាលពីថ្ងៃអាទិត្យក៏បានផ្តល់ឱ្យលោកនាយករដ្ឋមន្ត្រីជប៉ុននូវកូរ៉ុមគ្រប់គ្រាន់ក្នុងព្រឹទ្ធសភាដើម្បីបន្តនូវសុបិនដែលមិនបានសម្រេចរបស់ អតីតនាយករដ្ឋមន្ត្រី អាបេ នៃការកែប្រែរដ្ឋធម្មនុញ្ញសន្តិភាពនិយម (pacifist Constitution) ជាលើកដំបូងចាប់តាំងការអនុម័តដំបូងបំផុតនៅឆ្នាំ១៩៤៧ ពោលគឺ២ឆ្នាំក្រោយការប្រកាសចាញ់សង្គ្រាមរបស់ជប៉ុនក្នុងសម័យសង្គ្រាមលោកលើកទី២។
រដ្ឋធម្មនុញ្ញរបស់ប្រទេសជប៉ុន ដែលមានអាយុកាលយូរជាងរដ្ឋធម្មនុញ្ញដទៃទៀតនៅក្នុងពិភពលោក ដោយគ្មានវិសោធនកម្ម ឬកែប្រែនោះ បានទទួលកិត្តិនាមថាជា «រដ្ឋធម្មនុញ្ញសន្តិភាពនិយម»។ នេះគឺដោយសារមាត្រា ៩ នៃរដ្ឋធម្មនុញ្ញ និងការប្តេជ្ញារបស់ខ្លួនថានឹង «លះបង់សង្គ្រាមជាសិទ្ធិអធិបតេយ្យភាពរបស់ជាតិ»។ នេះបើយោងតាមអត្ថបទស្រាវជ្រាវដែលផ្សាព្វផ្សាយដោយគេហទំព័រ isdp។
បណ្តាញសារព័ត៌មាននានាបានបរិយាយអំពីភាពបរាជ័យរបស់ អតីតនាយករដ្ឋមន្ត្រី ស៊ីនហ្សូ អាបេ ដែលមិនអាចសម្រេចផែនការធ្វើវិសោធនកម្មរដ្ឋធម្មនុញ្ញចាប់តាំងពីលោកចាប់ផ្តើមចូលកាន់ការិយាល័យនាយករដ្ឋមន្ត្រីតាំងពីឆ្នាំ២០១៣ម្ល៉េះ។
លទ្ធផលឆ្នោតដែលផ្សព្វផ្សាយតាមទូរទស្សន៍សាធារណៈ NHK បាននិយាយថា គណបក្សប្រជាធិបតេយ្យសេរី (LDP) និងដៃគូវ័យក្មេងរបស់ខ្លួន Komeito ឈ្នះលើការបោះឆ្នោតសភាជាន់ខ្ពស់នេះ នឹងបើកផ្លូវឲ្យនាយករដ្ឋមន្ត្រីបច្ចុប្បន្នធ្វើអ្វីក៏បាន៕
ប្រភព៖ The Straits Times
