អាមេរិក៖ អ៊ីរ៉ង់នឹងបញ្ជូនដ្រូនប្រដាប់អាវុធទៅរុស្ស៊ីដើម្បីប្រើក្នុងសង្រ្គាមឈ្លានពានអ៊ុយក្រែន
សេតវិមាននិយាយថា ប្រទេសរុស្ស៊ីកំពុងងាកទៅរកអ៊ីរ៉ង់ ដើម្បីឱ្យជួយផ្ដល់នូវយន្តហោះគ្មានមនុស្សបើក (ដ្រូន) រាប់រយគ្រឿង រួមទាំងដ្រូនប្រដាប់អាវុធ សម្រាប់ប្រើប្រាស់ក្នុងការឈ្លានពានដែលកំពុងបន្តរបស់ខ្លួននៅអ៊ុយក្រែន។
ទីប្រឹក្សាសន្តិសុខជាតិអាមេរិក លោកជេកស៊ូលីវ៉ាន់ (Jake Sullivan)និយាយកាលពីថ្ងៃចន្ទថា វាមិនច្បាស់ទេថា តើអ៊ីរ៉ង់ផ្តល់ដ្រូនប្រភេទណាមួយដល់រុស្ស៊ីរួចហើយឬក៏អត់ ប៉ុន្តែសហរដ្ឋអាមេរិកមាន«ព័ត៌មាន» ដែលបង្ហាញថា អ៊ីរ៉ង់កំពុងរៀបចំបណ្តុះបណ្តាលការប្រើប្រាស់ដល់កងកម្លាំងរុស្ស៊ីឱ្យបានឆាប់ក្នុងខែនេះ។
លោកប្រាប់អ្នកយកព័ត៌មានថា៖ «ព័ត៌មានរបស់យើងបង្ហាញថា រដ្ឋាភិបាលអ៊ីរ៉ង់កំពុងរៀបចំផ្តល់ឱ្យរុស្ស៊ីនូវដ្រូនជាច្រើនរយគ្រឿង រួមទាំងដ្រូនដែលអាចបំពាក់អាវុធ»។ លោកបន្តថា វាគឺជាភស្តុតាងដែលថា ការទម្លាក់គ្រាប់បែកដ៏លើសលប់របស់រុស្ស៊ីនៅអ៊ុយក្រែន នៅភាគខាងកើតអ៊ុយក្រែនក្នុងរយៈពេលប៉ុន្មានសប្ដាហ៍ថ្មីនេះផ្ដល់នូវផលវិបាកលើការទ្រទ្រង់ផ្នែកសព្វាវុធរបស់ខ្លួនធ្វើឱ្យអស់ដ្រូនប្រដាប់អាវុធ។
ការលាតត្រដាងរបស់លោកស៊ូលីវ៉ាន់ ធ្វើឡើងមុនថ្ងៃលោកប្រធានាធិបតី ចូ បៃដិន ធ្វើដំណើរទស្សនៈកិច្ចទៅកាន់ប្រទេសអ៊ីស្រាអែល និងអារ៉ាប៊ីសាអូឌីត ដែលនឹងពិភាក្សាលើប្រធានបទសំខាន់ៗរួមបញ្ចូលទាំងកម្មវិធីនុយក្លេអ៊ែររបស់អ៊ីរ៉ង់ និងគោលនយោបាយក្នុងតំបន់។
លោកស៊ូលីវ៉ាន់កត់សម្គាល់ថា អ៊ីរ៉ង់បានផ្តល់ដ្រូនស្រដៀងគ្នានេះ ដល់ក្រុមឧទ្ទាមហ៊ូធី(Houthi)របស់យេម៉ែន ដើម្បីវាយប្រហារអារ៉ាប៊ីសាអូឌីត មុនពេលបទឈប់បាញ់សម្រេចឡើងនៅដើមឆ្នាំនេះ។
ដ្រូនដើរតួនាទីយ៉ាងសំខាន់សម្រាប់ភាគីទាំងទាំងសងខាងនៃការប្រយុទ្ធគ្នានៅអ៊ុយក្រែនរាប់តាំងពីការបាញ់មីស៊ីលពីចម្ងាយ រហូតដល់ការទម្លាក់គ្រាប់បែកតូចៗលើគោលដៅ ធ្វើការឈ្លបយកការណ៍សម្រាប់កងកម្លាំងកាំភ្លើងធំ និងកងទ័ពជើងគោក។
កងកម្លាំងរបស់អ៊ុយក្រែន ទទួលជោគជ័យជាពិសេសក្នុងការប្រើប្រាស់ដ្រូនប្រយុទ្ធប្រដាប់អាវុធBayraktar ដែលផលិតដោយតួកគី ហើយសហរដ្ឋអាមេរិក និងសម្ព័ន្ធមិត្តផ្សេងទៀតផ្គត់ផ្គង់ទីក្រុងកៀវនូវប្រភេទដ្រូនតូចៗជាច្រើនប្រភេទ បន្ថែមពីលើសព្វាវុធផ្សេងៗដូចជាកាំភ្លើងធំ អាវុធប្រឆាំងយន្តហោះ អាវុធប្រឆាំងរថក្រោះ រថពាសដែកនិងឧទ្ធម្ភាគចក្រជាដើម ដែលសរុបជារួមក្នុងតម្លៃរាប់ពាន់ប៊ីលានដុល្លារ។
លោក ស៊ូលីវ៉ាន់និយាយថា៖ «តាមទស្សនៈរបស់យើង យើងនឹងបន្តធ្វើការងាររបស់យើង ដើម្បីជួយទ្រទ្រង់ការការពារអ៊ុយក្រែនប្រកបដោយប្រសិទ្ធភាព និងដើម្បីជួយប្រជាជនអ៊ុយក្រែនបង្ហាញថា កិច្ចខិតខំប្រឹងប្រែងរបស់រុស្ស៊ីក្នុងការព្យាយាមលុបអ៊ុយក្រែនចេញពីផែនទីមិនអាចទទួលបានជោគជ័យទេ»។
លោកMichael Kofman នាយកកម្មវិធីស្រាវជ្រាវកម្មវិធីសិក្សាពីរុស្ស៊ីនៅមជ្ឈមណ្ឌលវិភាគកងទ័ពជើងទឹកនិយាយប្រាប់សារព័ត៌មានPolitico ថា ទាហានរុស្ស៊ីអាចត្រូវបានបណ្តុះបណ្តាលឱ្យប្រើបច្ចេកវិទ្យាយ៉ាងឆាប់រហ័ស។ ប៉ុន្តែបើគ្មានចំណេះដឹងជាក់លាក់អំពីដ្រូនទេ វាពិបាកក្នុងការកំណត់ពេលវេលាច្បាស់លាស់។
លោក Kofman និយាយទៀតថា៖ «កងកម្លាំងរុស្ស៊ីបានបាត់បង់ដ្រូនឈ្លបយកការណ៍ក្នុងចំនួនដ៏ច្រើន។ សមត្ថភាពផលិតដ្រូនប្រដាប់អាវុធផ្ទាល់របស់រុស្ស៊ី នៅតែរីកចម្រើន។ ពួកគេប្រហែលជាចាប់អារម្មណ៍នឹងដ្រូនប្រយុទ្ធដែលជាវិស័យមួយដែលអ៊ីរ៉ង់អាចមានសមត្ថភាពខ្លាំង»។
មកទល់ពេលនេះ មិនទាន់មានប្រតិកម្មណាមួយពីរដ្ឋាភិបាល អ៊ីរ៉ង់ ក៏ដូចក្រុងម៉ូស្គូ ដែលកងកម្លាំងរបស់ខ្លួនកំពុងសម្រុកប្រយុទ្ធនៅខេត្តដុនណិតស្ក៍នៃតំបន់ដុនបាសរបស់អ៊ុយក្រែននោះទេ។ ប៉ុន្តែបើការចោទប្រកាន់របស់អាមេរិកជាការពិតការទិញដ្រូនអ៊ីរ៉ង់ បង្ហាញសញ្ញាថារុស្ស៊ីកំពុងស្រវេស្រវាខ្វះជម្រើស ដោយសារភាពឯកោផ្នែកសេដ្ឋកិច្ច។ នេះបើយោងតាមមន្ត្រីអាមេរិកដែលដឹងអំពីស្ថានការណ៍នេះ។
កាលពីពាក់កណ្ដាលខែមិថុនា កាសែតជំនួញរុស្ស៊ីKommersantបានចុះផ្សាយថារុស្ស៊ីបានជួបប្រទះនឹងការខ្វះខាតដ្រូនពាណិជ្ជកម្ម ដែលអាចប្រើសម្រាប់ការស៊ើបការណ៍សម្ងាត់ ការឃ្លាំមើល និងការឈ្លបយកការណ៍ខណៈតម្រូវការពីយោធាកើនឡើង ហើយចិនចេញពីទីផ្សារផ្គត់ផ្គង់។ យោងតាមលោកRuslan Pukhov ប្រធានមជ្ឈមណ្ឌលសម្រាប់ការវិភាគយុទ្ធសាស្ត្រ និងបច្ចេកវិទ្យាដែលមានមូលដ្ឋាននៅទីក្រុងម៉ូស្គូដ្រូនពាណិជ្ជកម្មជាច្រើនត្រូវបញ្ជូនទៅជួយទាហានរុស្ស៊ីនៅភាគខាងកើតអ៊ុយក្រែន ខណៈអ៊ុយក្រែនត្រូវបានគេរាយការណ៍ថាប្រើដ្រូនប្រភេទនេះជាង ៦ ០០០ គ្រឿងក្នុងសមរភូមិ។
តាមការប្រកាសរបស់លោក ស៊ូលីវ៉ាន់កាលពីថ្ងៃចន្ទ វាមិនមែនជាលើកទី១ទេដែលអ៊ីរ៉ង់រងការចោទប្រកាន់ថាអាចនឹងបញ្ជូនសព្វាវុធទៅឱ្យរុស្ស៊ីក្រោយការឈ្លានពានអ៊ុយក្រែន។ កាលពីពាក់កណ្ដាលខែមេសា កាសែត ឌឹហ្គាដៀន បានរាយការណ៍ ដោយស៊ើបព័ត៌មានពីសមាជិកនៃកងជីវពលអ៊ីរ៉ាក់ដែលគាំទ្រដោយអ៊ីរ៉ង់ និងសេវាស៊ើបការណ៍ក្នុងតំបន់ថា រុស្ស៊ីបានទទួលបានគ្រឿងផ្ទុះ និងសម្ភារៈយោធាផ្សេងទៀតរួមទាំងមីស៊ីលប្រឆាំងរថក្រោះនិងប្រព័ន្ធបាញ់រ៉ុក្កែតពីអ៊ីរ៉ាក់ តាមជំនួយពីបណ្តាញរត់ពន្ធអាវុធរបស់អ៊ីរ៉ង់ ដើម្បីយកទៅប្រើនៅអ៊ុយក្រែន។ យ៉ាងណាមិញស្ថានទូតរុស្ស៊ីប្រចាំទីក្រុងតេអេរ៉ង់បដិសេធការចោទប្រកាន់ថាអ៊ីរ៉ង់មិនពាក់ព័ន្ធក្នុងការផ្គត់ផ្គង់អាវុធពីអ៊ីរ៉ាក់ដល់រុស្ស៊ីទេ ហើយព័ត៌មាននៃការចោទប្រកាន់គឺក្លែងក្លាយ។
រហូតមកទល់ពេលនេះអ៊ីរ៉ង់មិនថ្កោលទោសការឈ្លានពានអ៊ុយក្រែនរបស់រុស្ស៊ីទេដោយបានត្រឹមតែអំពាវនាវឲ្យមានកិច្ចចរចាការទូតដើម្បីបញ្ចប់«ជម្លោះ»ប៉ុណ្ណោះ។ហើយសូម្បីប្រព័ន្ធផ្សព្វផ្សាយរបស់ទីក្រុងតេអេរ៉ង់ ក៏មិនប្រើពាក្យឈ្លានពាននៅពេលនិយាយអំពីសង្គ្រាមដែរ។
ការចោទប្រកាន់របស់សហរដ្ឋអាមេរិកនៅពេលនេះ នឹងមានផលប៉ះពាល់ក្នុងឆាកនយោបាយរបស់អ៊ីរ៉ង់។ អតីតមន្ត្រី និងអ្នកវិភាគជាច្រើន រិះគន់ទំនាក់ទំនងជិតស្និទ្ធរបស់ទីក្រុងតេអេរ៉ង់ជាមួយទីក្រុងម៉ូស្គូ និងការពឹងផ្អែកលើរុស្ស៊ី ខណៈដែលកិច្ចចរចានុយក្លេអ៊ែរជាមួយសហរដ្ឋអាមេរិកបានជាប់គាំង។
នាពេលនេះសេដ្ឋកិច្ចរបស់អ៊ីរ៉ង់ស្ថិតក្នុងវិបត្តិ ខណៈដែលទណ្ឌកម្មរបស់អាមេរិកនៅតែបន្ត ហើយអ្នករិះគន់និយាយថា ជំនួសឱ្យកិច្ចព្រមព្រៀងជាមួយទីក្រុងវ៉ាស៊ីនតោន រដ្ឋាភិបាលកាន់តែខិតទៅជិតទីក្រុងម៉ូស្គូ។
ប្រភព៖ TRT World
