អាហ្សង់ទីននៅអាមេរិកខាងត្បូងរំពឹងចូល BRICS ដើម្បីការអភិវឌ្ឍសេដ្ឋកិច្ច
ប្រទេសអាហ្សង់ទីនដែលស្ថិតនៅអាមេរិកខាងត្បូងបានបង្ហាញចំណាប់អារម្មណ៍ចូលជាសមាជិកនៃ BRICS ដែលជាក្រុមប្រទេសកំពុងអភិវឌ្ឍសេដ្ឋកិច្ចចំនួនប្រាំ ដោយសង្ឃឹមថា ការចូលរួមជាមួយ BRICS នឹងជួយដល់ការអភិវឌ្ឍន៍ពហុភាគីរបស់ខ្លួន ហើយកំពុងទន្ទឹងរង់ចាំសមាជិកភាព។ នេះបើតាមការចេញផ្សាយរបស់ទីភ្នាក់ងារសារព័ត៌មានរុស្ស៊ី TASS។
លោក Eduardo Zuain ឯកអគ្គរដ្ឋទូតអាហ្សង់ទីនប្រចាំទីក្រុងម៉ូស្គូ បានប្រាប់បណ្តាញព័ត៌មានខាងលើថា៖«បំណងប្រាថ្នាមួយរបស់យើងគឺត្រូវចាប់ផ្តើមធ្វើការរួមគ្នាជាមួយបណ្តាប្រទេសធំៗ [BRICS] ហើយអធិការបតីរបស់យើង (រដ្ឋមន្ត្រីការបរទេសអាហ្សង់ទីន Santiago Cafiero)បានបង្ហាញពីទស្សនៈដូចគ្នានេះ។ យើងទន្ទឹងរង់ចាំថ្ងៃដែលទីបំផុតយើងចូលរួមក្រុមនេះ ហើយ ការអភិវឌ្ឍពហុភាគីនឹងជួយយើងឱ្យឆ្ពោះទៅមុខ»។
BRIC គឺជាពាក្យកាត់សម្រាប់ហៅប្រទេសកំពុងអភិវឌ្ឍន៍ដូចជា ប្រេស៊ីល រុស្ស៊ី ឥណ្ឌា និងចិន។ មេដឹកនាំនៃប្រទេសទាំងនេះខ្លះជឿថា BRIC នឹងក្លាយជាអ្នកផ្គត់ផ្គង់ទំនិញផលិត សេវាកម្ម និងវត្ថុធាតុដើមដ៏សំខាន់នៅឆ្នាំ២០៥០។
ក្រោយពីកិច្ចប្រជុំជាច្រើនលើករបស់មន្ត្រីបច្ចេកទេសចាប់ពីឆ្នាំ២០០៦ BRIC បានបើកកិច្ចប្រជុំដំបូងកំពូលដំបូងក្នុងឆ្នាំ២០០៩ ហើយ មួយឆ្នាំក្រោយមក ពោលគឺ ឆ្នាំ២០១០ ប្រទេសអាហ្រ្វិកខាងត្បូងបានចូលរួមជាមួយក្រុមនេះ ហើយវាត្រូវបានគេសរសេរកាត់ថា«BRICS»។ នេះបើយោងតាម brics2021.gov.in។
ឯកអគ្គរដ្ឋទូតបានបដិសេធមិនព្យាករអំពីពេលវេលានៃការចូលរួម។ ដោយនិយាយអំពីការរំពឹងទុកសម្រាប់ការពង្រីកទម្រង់ BRICS អ្នកការទូតបានសង្កត់ធ្ងន់ថា «ពិភពលោកឥឡូវនេះខ្វះបរិយាកាស និងឱកាសផ្សេងទៀតដើម្បីធ្វើការសន្ទនាផ្លូវការ» ។
TASS បានលើកឡើងថា ប្រទេសអាហ្សង់ទីន និងប្រទេសអ៊ីរ៉ង់ដែលស្ថិតនៅតំបន់មជ្ឈឹមបូព៌ាកាលពីខែមិថុនា ឆ្នាំ២០២២ បានដាក់ពាក្យចូលរួមជាមួយ BRICS ។ រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយថា ប្រទេសទាំងនេះគឺជាបេក្ខជនដែលសក្តិសមសម្រាប់ការចូលរួមជាមួយ BRICS ហើយដំណើរការរៀបចំសម្រាប់ការពង្រីកអង្គការត្រូវបានចាប់ផ្តើមរួចហើយ៕
