នៅថ្ងៃព្រហស្បតិ៍ត ទី២៦ ខែកញ្ញា ឆ្នាំ២០១៩នេះ គ្រោះរញ្ជួយដី កម្រិត៦,៥រ៉ិចទ័រ បានវាយប្រហារលើតំបន់ភាគខាងកើត ប្រទេសឥណ្ឌូណេស៊ី។ នេះបើយោងតាមទីភ្នាក់ងារឃ្លាំមើលគ្រោះរញ្ជួយដីអាម៉េរិក (USGS)។ យោងតាម USGS គ្រោះរញ្ជួយដីនេះ បានវាយប្រហារតំបន់កោះដាច់ស្រយាល Maluku ប៉ុន្តែមិនមានការប្រកាសអាសន្នពីរលកយក្សស៊ូណាមិឡើយ ហើយភ្លាមៗក៏មិនទាន់មានសេចក្ដីរាយការណ៍ ពីការបំផ្លិចបំផ្លាញ ឬជនរងគ្រោះដែរ។ USGS បានបន្ថែមទៀតថា គ្រោះរញ្ជួយដីនេះ បានកើតឡើងនៅក្នុងតំបន់ស្ថិតនៅចម្ងាយ៣៧គីឡូម៉ែត្រពីភាគឦសានទីក្រុង Ambon នៃកោះ Maluku នៅម៉ោង៨៖៤៦នាទីព្រឹកមិញនេះ (ម៉ោងនៅក្នុងតំបន់) ជាមួយជម្រៅរញ្ជួយទៅក្នុងដី២៩គីឡូម៉ែត្រ៕ម.ន