ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញបើកការដ្ឋានសាងសង់ស្ពានអាកាសថ្មីចំនួន២បន្ថែមទៀត ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ ដែលមានការកកស្ទះចរាចរណ៍ជារៀងរាល់ថ្ងៃ ។ ពិធីបើកការដ្ឋានសាងសង់ស្ពានអាកាសថ្មីចំនួនពីរនេះ នឹងធ្វើឡើងនៅព្រឹកថ្ងៃទី៣១ ខែសីហា ឆ្នាំ២០២២ នៅក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

សូមជម្រាបថា រដ្ឋបាលរាជធានីភ្នំពេញ បានជូនដំណឹងទៅប្រជាពលរដ្ឋស្ដីពីការបញ្ចៀសចរាចរណ៍យានយន្តគ្រប់ប្រភេទជាបណ្ដោះអាសន្ន នៅកំណាត់មហាវិថី សម្ដេចតេជោ ហ៊ុន សែន (ផ្លូវ៦០ម៉ែត្រ) ក្នុងពិធីបើកការដ្ឋានសាងសង់ស្ពានអាកាស នៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្សជាមួយនឹងវិថីកងយោធពលខេមរភូមិន្ទ និងសាងសង់ស្ពានអាកាសនៅចំណុចប្រសព្វមហាវិថីសហព័ន្ធរុស្ស៊ីជាមួយនឹងមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល (ស្តុបផ្សារសេនជូរី) ។

ដើម្បីឱ្យកម្មវិធីខាងលើប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយ សាធារណៈ រដ្ឋបាលរាជធានីភ្នំពេញនឹងធ្វើការបញ្ចៀសចរាចរណ៍ និងផ្អាកចរាចរជាបណ្ដោះអាសន្នជុំវិញទីតាំងប្រារព្ធពិធី ដោយមិនអនុញ្ញាតឱ្យយានជំនិះគ្រប់ប្រភេទឆ្លងកាត់កំណាត់មហាវិថីសម្តេចតេជោ ហ៊ុន សែន (ផ្លូវ៦០ម៉ែត្រ) ចាប់ពីចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្សជាមួយនឹងវិថីកងយោធពលខេមរភូមិន្ទ (ផ្លូវលេខ២៧១) រហូតដល់ស្តុបចំណុចប្រសព្វរវាងមហាវិថីសម្តេចតេជោ ហ៊ុន សែន (ផ្លូវ៦០ម៉ែត្រ) ជាមួយនឹងមហាវិថីអ្នកឧកញ៉ាមហាភក្តីសប្បុរិសភោគាធិបតី ហ៊ុន នាង (ផ្លូវ៣០ម៉ែត្រ) រយៈពេលចំនួន០៣ថ្ងៃ ដើម្បីត្រៀមរៀបចំការងារ ។

សូមរំលឹកថា គិតមកដល់ពេលនេះ នៅរាជធានីភ្នំពេញមានស្ពានអាកាសសរុបចំនួន ៨ ហើយបូករួមទាំងពីរថ្មីដែលបើកការដ្ឋានសាងសង់នាថ្ងៃទី៣១ ខែសីហាខាងមុខនេះ រាជធានីភ្នំពេញនឹងមានស្ពានអាកាសសរុបចំនួន ១០ ដែលមានដូចជា៖ ស្ពានអាកាសក្បាលថ្នល់, ស្ពានអាកាសស្ទឹងមានជ័យ, ស្ពានអាកាស ៧មករា, ស្ពានអាកាស ៥មករា ឬស្ពានអាកាសតិចណូ, ស្ពានអាកាសស្តុបផ្សារដីហុយ លើវិថីសហព័ន្ធរុស្ស៊ី, ស្ពានអាកាសចោមចៅ និងស្ពានអាកាសចំណុចឃ្លាំងសាំងសូគីមិចលើបណ្ដោយផ្លូវជាតិលេខ៥ ដែលកំពុងសាងសង់ ក្នុងនោះមានស្ពានអាកាសថ្មីពីរដែលនឹងបើកការដ្ឋានសាងសង់រួមមាន៖ ស្ពានអាកាស នៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្សជាមួយនឹងវិថីកងយោធពលខេមរភូមិន្ទ និងសាងសង់ស្ពានអាកាសនៅចំណុចប្រសព្វមហាវិថីសហព័ន្ធរុស្ស៊ីជាមួយនឹងមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល (ស្តុបផ្សារសេនជូរី) ៕ ដោយ វណ្ណលុក