ភ្នំពេញ៖ វេលាម៉ោង ៨និង៣០នាទីព្រឹកថ្ងៃទី៣១ ខែសីហា ឆ្នាំ២០២២ កម្លាំងសមត្ថកិច្ចជំនាញ នៃមន្ទីរប្រឆាំងគ្រឿងញៀន បានសហការជាអាជ្ញាធរមូលដ្ឋាន ឆ្មក់បង្ក្រាបបទល្មើសគ្រឿងញៀនឈានដល់ការផ្ទុះអាវុធប្រមាណជាង ១០គ្រាប់ បណ្ដាលឱ្យជនសង្ស័យម្នាក់ស្លាប់ របួសមនុស្ស ៤នាក់ និងឃាត់ខ្លួនជនសង្ស័យចំនួន ២នាក់ រឹបអូសសារធាតុញៀនបានជាង ២០គីឡូក្រាម ស្ថិតនៅចំណុចផ្លូវចូលកំពង់ដស្វាយជ្រុំ តាមបណ្តោយផ្លូវកែវចិន្តា ស្ថិតក្នុងភូមិទី៣ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។

សមត្ថកិច្ចបានឱ្យដឹងថា ជនសង្ស័យចំនួន៤នាក់ (ជនជាតិថៃ) រួមមាន៖ ១-ឈ្មោះ នំ ម៉ាឡាគុណ (ចាប់ខ្លួន) ភេទប្រុស អាយុ៣៤ឆ្នាំ ២-ឈ្មោះ សែប សុីសែនសុ៑ក (ចាប់ខ្លួន) ភេទប្រុស អាយុ ២៥ឆ្នាំ , ៣-ឈ្មោះ ជេម (ស្លាប់) ភេទប្រុស អាយុប្រហែល២៨ឆ្នាំ,៤-ឈ្មោះ ណាកូ (របួស)ភេទប្រុស អាយុប្រហែល ៤៤ឆ្នាំ ។

បើតាមប្រភពព័ត៌មានបានឱ្យដឹងថា កម្លាំងជំនាញ នៃមន្ទីរប្រឆាំងគ្រឿងញៀន បានតាមប្រមាញ់មុខសញ្ញាជួញដូរគ្រឿងញៀនទ្រង់ទ្រាយធំដែលធ្វើដំណើរដោយរថយន្តចំនួន០២គ្រឿង មួយគ្រឿងម៉ាកហ្វដ ពណ៌ស ពាក់ផ្លាកលេខភ្នំពេញ 2BO-0123 ដឹកផ្កាមានបង្កប់គ្រឿងញៀនជាង២០គីឡូក្រោម ត្រូវបានកម្លាំងសមត្ថកិច្ចបាញ់បំបែកកង់រថយន្តទាំង៤ទៅមុខលែងរួច និងរថយន្តមួយគ្រឿងទៀតម៉ាក MG ពណ៌ក្រហម ពាក់ផ្លាកលេខភ្នំពេញ 2BL-7217 ជិះដោយជនសង្ស័យចំនួន៣នាក់បានព្យាយាមបើកគេច និងបាញ់រះមកលើសមត្ថកិច្ច ហើយត្រូវបានកម្លាំងសមត្ថកិច្ចបាញ់តបតទៅវិញបណ្ដាលឱ្យជនសង្ស័យម្នាក់ស្លាប់នៅក្នុងរថយន្ត និងរងរបួសម្នាក់ ចំណែក២នាក់ទៀតត្រូវបានសមត្ថកិច្ចឃាត់ខ្លួន ។ ក្នុងប្រតិបត្តិការនោះក៏បណ្ដាលឱ្យពលរដ្ឋរងរបួសចំនួន៣នាក់ គឺមនុស្សស្រី២នាក់និងបុរសម្នាក់ជាម្ចាស់ម៉ូតូកង់៣ម្នាក់ ដែលរថយន្តជនសង្ស័យ បើកបុកចំពីមុខ។

ក្រោយពេលកើតហេតុ កម្លាំងសមត្ថកិច្ចចម្រុះបានធ្វើការហ៊ុមព័ទ្ធទីតាំងកើតហេតុដើម្បីឲ្យផ្នែកជំនាញធ្វើការត្រួតពិនិត្យ និងរឹបអូសគ្រឿងញៀនជាង២០គីឡូក្រាម និងបន្តស្រាវជ្រាវរកបក្ខពួកបន្ថែមទៀតយកមកផ្ដន្ទាទោសតាមច្បាប់៕ ដោយ ៖ ជីម ភារ៉ា