ភ្នំពេញ ៖ សិស្សានុសិស្សវិទ្យាល័យចំនួន ៥ ក្នុងរាជធានីភ្នំពេញ បានធ្វើការបំប៉នសមត្ថភាពដើម្បីឈានទៅរកភាពជោគជ័យក្នុងការសិស្សាថ្នាក់ឧត្តមសិក្សា ជីវិត និងការងារ តាមរយៈកម្មវិធី “ខ្ញុំឆ្នើម” សម្រាប់សិស្សទី១២ ត្រឡប់មកវិញជាថ្មី ក្នុងឆ្នាំ២០២២ ។ កម្មវិធីនេះរៀបចំឡើងដោយក្រុមហ៊ុន ខ្មែរ ប៊ែវើរីជីសនាថ្ងៃទី ០៦ កញ្ញា ២០២២ “ខ្ញុំឆ្នើម” ឬ The Best of Me ជាថ្មីម្ដងទៀត ក្នុងឆ្នាំ២០២២ ដែលមានការចូលរួមដោយ លោកនាយក នាយករង លោកគ្រូ អ្នកគ្រូ សិស្សានុសិស្សសរុប ២០០នាក់ ពីវិទ្យាល័យទាំង ៥ នៅរាជធានីភ្នំពេញរួមមាន វិទ្យាល័យព្រះស៊ីសុវត្ថិ វិទ្យាល័យបាក់ទូក វិទ្យាល័យទួលទំពូង វិទ្យាល័យឥន្ទ្រទេវី និងវិទ្យាល័យព្រែកលៀប ។

កម្មវិធី «ខ្ញុំឆ្នើម» ត្រូវបានរៀបចំឡើងក្រោមគោលបំណង បំប៉នសមត្ថភាពសិស្សានុសិស្សវិទ្យាល័យឲ្យសម្រេចចិត្តត្រឹមត្រូវ ដើម្បីឈានទៅរកភាពជោគជ័យក្នុងការសិស្សាថ្នាក់ឧត្តមសិក្សា ជីវិត និងការងារ ។

លោកបណ្ឌិត អ៊ឹម សុធារិទ្ធ នាយកទំនាក់ទំនងសាធារណៈ ក្រុមហ៊ុន ខ្មែរ ប៊ែវើរីជីស បានឲ្យដឹងថា «មូលហេតុដែល ខ្មែរ ប៊ែវើរីជីស នៅតែបន្តរៀបចំសិក្ខាសាលា «ខ្ញុំឆ្នើម» គឺដោយសារក្មេងៗជាទំពាំងស្នងឬស្សីនៅក្នុងសង្គមជាតិ។ បើពួកគាត់ចេះប្រើប្រាស់ចំណុចខ្លាំង និងមានគំនិតវិជ្ជមាន ហើយយកទៅប្រើប្រាស់ឲ្យចំគោលដៅ នោះពួកគាត់នឹងមានអនាគតល្អ និងអាចជំរុញឲ្យប្រទេសជាតិយើងទាំងមូលមានការរីកចម្រើន។»

លោក មូល ស៊ុយហេង នាយកវិទ្យាល័យព្រះស៊ីសុវត្ថិ បានមានប្រសាសន៍ថា៖ «កម្មវិធី «ខ្ញុំឆ្នើម» នេះ នឹងអាចជួយតម្រង់ទិសសិស្សានុសិស្សជាច្រើន ដែលកំពុងត្រៀមខ្លួនសម្រាប់ការប្រឡងថ្នាក់មធ្យមសិក្សាទុតិយភូមិនៅពេលខាងមុខនេះ ឲ្យជ្រើសរើសមុខវិជ្ជាណាមួយដែលត្រឹមត្រូវ សម្រាប់ខ្លួនឯងបានយ៉ាងប្រសើបំផុត»។

គួរបញ្ជាក់ផងដែរ ក្នុងឆ្នាំ២០២២ កម្មវិធី «ខ្ញុំឆ្នើម» នឹងរៀបចំ ចំនួន ៣ដង រៀងរាល់២សប្តាហ៍ម្ដង ដែលនឹងមានការចូលរួមពីវិទ្យាល័យចំនួន ១៥ ក្នុងរាជធានីភ្នំពេញ។ ជាពិសេសជាងនេះ សម្រាប់កម្មវិធីលើកទី៣ នឹងមានការ រៀបចំតាមរយៈឌីជីថល ដោយមានការ Live ផ្ទាល់តាម Zoom និង Facebook ដូចនេះ សិស្សនុសិស្សដែលកំពុងរៀនថ្នាក់ទី១២ ពីវិទ្យាល័យផ្សេងៗក៏អាចចូលរួមបានដែរ ៕ ដោយ / គ្រី សម្បត្តិ