អ៊ីស្រាអែល៖ ក្រុមអ្នកវិទ្យាសាស្រ្តអ៊ីស្រាអែលនៅសាកលវិទ្យាល័យ Tel Aviv បានរកឃើញអង់ទីគ័រចំនួនពីរ ដែលមានសមត្ថភាព បន្សាបវីរុសកូរ៉ូណាគ្រប់ប្រភេទបំប្លែង រួមទាំងវ៉ារ្យ៉ង់ដែលតា និងអូមីក្រុង ហើយថែមទាំងអាចជួយកាត់បន្ថយការចាក់វ៉ាក់សាំង កូវីដ១៩ ដូសជំរុញផង។

ការរកឃើញនេះ ធ្វើឡើងក្រោយពេលអ្នកវិទ្យាសាស្ត្របានពិសោធ ទៅលើអង់ទីគ័រចំនួនប្រាំបួនផ្សេងគ្នា ដែលយកចេញពីអ្នកជា សះស្បើយជំងឺកូវីដ-១៩ នៅអ៊ីស្រាអែល។

លោកស្រីវេជ្ជបណ្ឌិតផ្នែកមីក្រូជីវសាស្រ្ត Natalia Freund ដែល ជាអ្នកដឹកនាំការសិក្សាអះអាងថា អង់ទីគ័រដែលរកឃើញ ត្រូវបាន យកទៅចាក់ព្យាបាលអ្នកជំងឺកូវីដ-១៩ ដែលឆ្លងវ៉ារ្យ៉ង់កូវីដ ផ្សេងៗគ្នា ហើយផ្អែកលើការលក្ខណៈក្នុងលក្ខខណ្ឌមន្ទីរពិសោធន៍ វាអាចផ្តល់ នូវការការពារខ្លាំងជាងការចាក់វ៉ាក់សាំងកូវីដដូសជំរុញទៀត។

លោកស្រី Freund អះអាងថា៖ «យោងទៅតាមការរកឃើញ របស់ យើង ប្រសិទ្ធភាពនៃអង់ទីគ័រទី ១ TAU-1109 ក្នុងការបន្សាបវ៉ារ៉្យង់ អូមីក្រុង មានប្រហែល ៩២ ភាគរយ ហើយវ៉ារ៉្យង់ដែលតា មាន ៩០ ភាគរយ។ សម្រាប់អង់ទីគ័រទី២ TAU-2310 អាចបន្សាបវ៉ារ្យ៉ង់ អូមីក្រុងក្នុងប្រសិទ្ធិភាព ៨៤ ភាគរយ និងដែលតា ក្នុងប្រសិទ្ធិភាព ៩៧ ភាគរយ»។

លោកស្រីវេជ្ជបណ្ឌិតនិយាយថា ការរកឃើញនេះមានន័យថា អ្នក ដែលទទួលវ៉ាក់សាំងរួចហើយ មិនចាំបាច់ចាក់វ៉ាក់សាំងទៀតទេ ប្រសិនបើពួកគេទទួលបានការព្យាបាលដោយប្រើអង់ទីគ័រ ដែលក្រុម អ្នកវិទ្យាសាស្រ្តរបស់លោកស្រីរកឃើញ។

សូមបញ្ជាក់ថា មូលហេតុដែលអង់ទីគ័រនេះត្រូវបានដាក់ ឈ្មោះ ផ្ដើមដោយ TAU ព្រោះអង់ទីគ័រទាំងពីរ ត្រូវបានរកឃើញ នៅ សាកលវិទ្យាល័យ Tel Aviv៕
ដោយ៖ហួន ឌីណា