អន្តរជាតិ៖ចំណូល​ដែល​បាន​មក​ពី​ការ​ជីក​កាក់ Bitcoin បាន​ធ្លាក់​ចុះ​មក​ត្រឹម​តែ ១៧.២​លាន​ដុល្លារក្នុងថ្ងៃ ខណៈ​​​ទីផ្សារ​​គ្រីប​តូ​ទាំង​មូល​កំពុង​ធ្លាក់​ចូល​ក្នុង​រដូវ​រងា(ធ្លាក់ថ្លៃ)​ និង​ដោយ​សារ​ពិភព​លោក​កំពុង​ប្រឈម​នឹង​វិបត្តិ​ថាមពល​។ ចំណូល​​នេះ ​ធ្លាក់​ចុះជា​ង៧២ភាគរយ គិតចាប់តាំងពីខែវិច្ឆិកា ឆ្នាំ២០២១ ដែល​កាល​ពីពេល​នោះ​អ្នក​ជីក​កាក់​អាច​រក​ចំណូល​​បា​ន៦២លានដុល្លារក្នុងមួយថ្ងៃ។នេះបើតាមទិន្នន័យរបស់ Blockchain.com។

កាលពីចុងឆ្នាំ២០២១ ក្រុមអ្នកជីកកាក់សម្រុកជីកកាក់ និងដាក់លក់កាក់ Bitcoin  ដែលជីកបាន នៅ​លើ​ទីផ្សារ ដោយ​​ពួក​គេ​​រក​​បា​ន​ចំណូលបាន​​គួរ​​សម​ដោយសារ​តម្លៃ​អគ្គិសនី​ថោក។ អ្វីដែល​ចាំ​បាច់​គ្រាន់​តែ​មាន​កុំព្យូទ័រ ដែល​​មា​ន​ហ្រ្កាហ្វិក​កាត​ខ្ពស់ នោះ​អាច​ដើរ​តួ​ជា​អ្នក​ដោះស្រា​យ​សមីការ​គណិត​នៅ​ក្នុង​ប្លុក​ឆេនរបស់ Bitcoin ហើយ​ទ​ទួល​បាន​កាក់Bitcoinសម្រាប់​ចំណែក​រប​ស់ពួ​កគេ។ដំណើរ​កា​រ​នេះ​គេ​ហៅ​យ៉ាងសាមញ្ញថា ជីកកាក់។

លោក Joe Burnett ប្រធានផ្នែកវិភាគនៃក្រុមហ៊ុន Blockware Solutions បានលើកឡើងថា “អ្នកជីកកាក់ Bitcoin កំពុងតែប្រឈមនឹងសម្ពាធនៃការថយចុះចំណូល តម្លៃ​កាក់ Bitcoin ធ្លាក់​ចុះ ការ​ជីក​កាក់​កាន់​តែ​ពិបាក​​ជា​ងមុន បូក​ថែម​នឹង​ថាមពល​អគ្គិសនី​កាន់​តែថ្លៃ។​” បញ្ហាទាំងនេះបានក្លាយជាបន្ទុកបន្ថែមទៀត ដល់​អ្នក​ជីកកាក់ដែលបានទិញម៉ាស៊ីជីកកាក់ថ្លៃៗ។

បច្ចុប្បន្ននេះ កាក់គ្រីបតូ Bitcoin គឺជាកាក់ ដែលមានតម្លៃមូលធនទីផ្សារ​​ជិត ៤០០ប៊ីលានដុល្លារ ហើយ​ធំជាង​គេ​នៅ​ក្នុង​ទីផ្សារ​ទាំង​មូល ដែល​មាន​ទំហំជាង ១ទ្រីលានដុល្លារ។ កាលពីសប្តាហ៍មុនកាក់គ្រីបតូ ត្រូវ​បាន​ជួញ​ដូរ​ក្នុង​តម្លៃ​ ១៩,០០០ដុល្លារអាមេរិក ធ្លាក់ចុះពី ២៥,០០០ដុល្លារអាមេរិក កាលពីខែសីហា កន្លងទៅ។ តម្លៃ​ខ្ពស់​បំផុត​របស់​កាក់ Bitcoin គឺ ៦៩,០០០ដុល្លារ កាលពីខែវិច្ឆិកា ឆ្នាំ២០២១ ខណៈនៅដើម្បី​សប្តាហ៍​ទី៣​​ ខែ​កញ្ញានេះ​ កាក់ Bitcoin បាន​ឡើង​ថ្លៃ​មក​វិញ ក្នុង​ខ្ទង់ ២០,០០០ដុល្លារ។

យ៉ាងណាក៏ដោយប្រតិបត្តិការជីកកាក់ Bitcoin គឺជាដំណើរវែងឆ្ងាយ ព្រោះកាក់ចុងក្រោយបំផុត​ ឬកាក់ទី ២១លាន នឹងត្រូវជីកបាននៅក្នុងឆ្នាំ២១៤០។

លោក William Szamosszegi ជាអគ្គនាយកក្រុមហ៊ុន Sazmining Inc បានលើកឡើងថា “នេះគឺជាពេល​វេលាដ៏​ល្អបំផុតក្នុងការប្រឡូកចូលវិស័យនេះ។ កាលពីមុនអ្នកត្រូវចំណាយជាង១ម៉ឺនដុល្លារ ដើម្បី​រៀប​ម៉ាស៊ីន​ជីក​កាក់ Bitcoin ប៉ុន្តែ​ពេល​នេះ​វា​បាន​ចុះ​ថ្លៃ​ពី​៥០ភាគរយ រហូត​ដល់​៧០ភាគរយ​ឯណោះ។​”

ជាការពិត អ្នកជីកកាក់ខ្លះ ត្រូវកាត់បន្ថយការចំណាយរបស់ពួកគេក្នុងទិញម៉ាស៊ីន ឬ​រៀប​ម៉ាស៊ីន​ជីក​កាក់​បន្ថែម​ ដែលនេះតម្រូវឲ្យក្រុមហ៊ុនផលិតម៉ាស៊ីន ឬរៀបម៉ាស៊ីនជីកកាក់ត្រូវកាត់បន្ថយថ្លៃផលិត។

ជាក់ស្តែងម៉ាស៊ីនជីកកាក់ម៉ាក S19J Pro ត្រូវបានដាក់លក់ក្នុង​តម្លៃ​ជាង ​១ម៉ឺន​ដុល្លារ កាល​ពី​ខែ​មករា​កន្លង​ទៅ​នេះ ប៉ុន្តែ​បច្ចុប្បន្ន អ្នក​លក់​បាន​បញ្ចុះ​តម្លៃ​វា​មក​ត្រឹម​តែ ៣,២០០ដុល្លារ​តែប៉ុ​ណ្ណោះ។  នេះ​បើ​តាម​ការ​បញ្ជាក់​របស់​ក្រុម​ហ៊ុន​វិភាគ​ប្លុក​ឆេន​Luxor៕ ដោយ CPA/យ៉ាន អាន