បន្ទាយមានជ័យ៖ភ្លៀងនៅបន្តធ្លាក់ជាបន្តបន្ទាប់ ជាប់ជាប្រចាំនៅ តាម វាលទីទំនាប និងប្រជុំជនក្រុងស្រុក របស់ខេត្តបន្ទាយមានជ័យ បង្កជាទឹកជំនន់។ជំនន់ទឹកភ្លៀងទាំងនេះ គំរាមពន្លិច លំនៅឋាន ពលរដ្ឋនៅទីទំនាបស្របពេលទឹកស្រុងចុះពីក្រុងស្រុកជាប់ព្រំដែនកម្ពុជាថៃ មកទីទំនាបជាប់បឹងទន្លេសាប។

ដោយឡែកទួលសុវត្ថិភាពរបស់បងប្អូនប្រជាពលរដ្ឋនៅឃុំបត់ត្រង់ ជំនន់ទឹកក៏បានគំរាមជន់ពន្លេចបង្ខំចិត្តពលរដ្ឋរងគ្រោះ ត្រូវរើមក ទីទួល សុវត្ថិភាពថ្មីលើផ្លូវជាតិលេខ៥ ស្រុកមង្គលបុរី វិញ។

ឯកឧត្ដម អ៊ុ រាត្រី អភិបាលខេត្តនិងជាប្រធានគណ:កម្មាធិការ គ្រប់ គ្រង គ្រោះមហន្តរាយខេត្តបន្ទាយមានជ័យដឹកនាំបញ្ជាផ្ទាល់កង កម្លាំងទាំងបី និងរដ្ឋបាលស្រុកមង្គលបុរី ចុះធ្វើជម្រក ភ្លើងអគ្គិសនី បង្គន់អនាម័យ ទឹកស្អាត ជូនបងប្អូនពលរដ្ឋរងគ្រោះដោយ ជំនន់ ទឹកភ្លៀងនៅចំនុចភូមិបត់ត្រង់ ដែលត្រូវប្ដូរទីទួលសុវត្ថិភាព។

លោក សុក ចាន់ថា ប្រធានមន្ទីរសាធារណការនិងដឹកជញ្ជូន ខេត្តប្រាប់ថា៖ មិនបានបិទចរាចរណ៍នៅផ្លូវជាតិលេខ៥ វាងក្រុងសិរីសោភ័ណ /មង្គលបុរី តែសូមអ្នកបើកបរបន្ថយល្បឿន បង្កើនការប្រុងប្រយ័ត្នខ្ពស់ ព្រោះពលរដ្ឋរងគ្រោះ ដោយជំនន់ ទឹកភ្លៀងបានរើមកតាំងលំនៅលើផ្លូវជាតិហើយ បន្ទាប់ ពីទឹកស្រុងលិចកន្លែងស្នាក់បណ្ដោះអាសន្នរបស់ពួកគាត់ នៅមង្គលបុរីនៅថ្ងៃទី១០ ខែតុលា។

សូមបញ្ជាក់ថា៖ ពលរដ្ឋដែលមកស្នាក់នៅ ទីទួល សុវត្ថិភាពសរុប ១៥៣គ្រួសារ (មនុស្សរាយ៥៦៤នាក់)៕
ដោយ៖ឃិន គន្ធា