ភ្នំពេញ៖ នៅរសៀលថ្ងៃទី១៧ ខែកញ្ញា ឆ្នាំ២០១៩ លោកជំទាវ ឧបនាយករដ្ឋមន្ត្រីម៉ែន សំអន តំណាង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និង  សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន បានចូលរួម ឧទ្ទិសកុសលផលបុណ្យជូនវិញ្ញាណក្ខន្ធប្រជាពលរដ្ឋស្លូតត្រង់ដែលបានស្លាប់នៅក្នុងរបបខ្មែរក្រហម និង បាននិមន្តព្រះសង្ឃ៤០អង្គ សូត្រមន្ត ចំរើនព្រះបរិត្ត បង្សុកូល រាប់បាត្រ នៅក្នុងបរិវេណគុកទួលស្លែង។ ការអញ្ជើញចូលរួមជាមួយ ប្រជាពលរដ្ឋខ្មែរ នៅទូទាំងប្រទេស ខណៈ ប្រារព្ធពិធីឧទ្ទិសកុសលតាមលក្ខណៈប្រពៃណីព្រះពុទ្ធសាសនា  នាថ្ងៃបុណ្យកាន់បិណ្ឌ-ភ្ជុំបិណ្ឌ  ប្រមុខដឹកនាំគណបក្សប្រជាជនកម្ពុជា និង ថ្នាក់ដឹកនាំនៃរាជរដ្ឋាភិបាល​ មិនដែលភ្លេចឡើយម្តងណាឡើយ ពីការស្លាប់របស់ប្រជាពលរដ្ឋស្លូតត្រង់ កាលពីក្នុងរបបប្រល័យពូជសាសន៍ ប៉ុល ពត ពិសេសអ្នកដែលបានស្លាប់ នៅក្នុងសារៈមន្ទីរប្រល័យពូជសាសទួលស្លែងនេះ ។

លោកជំទាវឧបនាយករដ្ឋមន្ត្រី ម៉ែនសំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និង អធិការកិច្ច បញ្ជាក់ថា រាជរដ្ឋាភិបាលកម្ពុជា ប្រារព្ធពិធីសែនព្រេនចំណីអាហារ និង ពិធីរាប់បាត្រព្រះសង្ឃនៅគុកទួលស្លែងនេះជារៀងរាល់ឆ្នាំ ដើម្បីឧទ្ទិកុសលបញ្ជូនទៅដល់ព្រងវិញ្ញាណក្ខន្តអ្នកស្លាប់ក្នុងរបបខ្មែរក្រហម នៅក្នុងឱកាសបុណ្យភ្ជុំ ដែលជនរងគ្រោះខ្លះបានស្លាប់ទាំងពូជទាំងអស់ រាប់ទាំងកូនចៅ ឬសាច់ញាតិ និង នៅពេលនេះ ឧទ្ទិសកុសលជូនដល់ព្រលឹងវិញ្ញាណក្ខន្ធអ្នកទាំងនោះ ដែលមិនដឹងថា កើតជាអ្វីនិង ស្រេកឃ្លានអាហារជាដើម។

សូមរំលឹកថានៅចន្លោះ​ពី​ឆ្នាំ​១៩៧៥ ដល់​ ឆ្នាំ​១៩៧៩ មាន​មនុស្ស​ប្រមាណ​ ជាង​១ម៉ឺន​នាក់ ត្រូវបាន​​ពួក​ខ្មែរក្រហម​ចាប់ខ្លួន​យក​ទៅ​ឃុំឃាំង​នៅ​ក្នុង​មន្ទីរ​ស-២១។ ក្នុង​ចំណោម​អ្នកទោស​ដែល​ត្រូវគេ​ចាប់យក​ទៅ​គុកទួលស្លែង មាន​មិនដល់ ១០នាក់​ផង ដែល​បាន​រួចជីវិត។ ហេតុដូច្នេះ​ហើយ​បាន​ជាអ្នកខ្លះ​ប្រសិទ្ធិនាម​គុកទួលស្លែង​ថា​ជា “ច្រកទ្វារនរក” ជាទី​ដែល​អ្នក​ដែល​បាន​​ចូល​ហើយ មិនអាច​មាន​ជីវិត​ចេញមកវិញបាន។ បច្ចុប្បន្ន អតីត​គុកទួលស្លែង ត្រូវបាន​​ប្រែក្លាយ​ទៅ​​ជា “សារមន្ទីរ​ឧក្រិដ្ឋកម្ម​ប្រល័យពូជសាសន៍” ដែល​ជា​និមិត្តរូប​នៃ​អំពើ​ឃោរឃៅ​ របស់​ពួក​ខ្មែរក្រហម៕