លោក ពូទីននឹងចូលរួមកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិកនៅប្រទេសថៃ
រុស្ស៊ី៖ប្រធានាធិបតីរុស្ស៊ី លោក វ្ល៉ាឌីមៀ ពូទីន បានទទួលយកការអញ្ជើញរបស់ប្រទេសថៃ ដើម្បីឱ្យចូលរួមកិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅទីក្រុងបាងកកក្នុងខែវិច្ឆិកាខាងមុខ។ នេះបើតាមការចុះផ្សាយរបស់កាសែតបាងកកបុស្តិ៍ ដែលស្រង់សម្ដីមន្រ្តីសន្តិសុខម្នាក់ជាអនាមិក។
ប្រភពបានបានអះអាងថា ក្រសួងការបរទេសថៃបានស្នើឱ្យភ្នាក់ងារសន្តិសុខ ធ្វើការរៀបចំផ្នែកសន្តិសុខ សម្រាប់កិច្ចប្រជុំដែលនឹងធ្វើឡើងចន្លោះថ្ងៃ ១៨ និង ១៩ ខែវិច្ឆិកានេះ។ ជាមួយនេះផងដែរប្រធានាធិបតីសហរដ្ឋអាមេរិក លោក បៃដិន ក៏នឹងបញ្ជូនអ្នកតំណាងសម្រាប់កិច្ចប្រជុំនោះផងដែរ ខណៈដែលមេដឹកនាំចិន លោក ស៊ី ជិនពីង មិនទាន់បញ្ជាក់ពីការចូលនៅឡើយ។
អ្នកនាំពាក្យនៃក្រសួងការបទេសថៃ លោក Tanee Sangrat បានថ្លែងប្រាប់អ្នកសារព័ត៌មានថា ប្រទេសសមាជិក APEC ចំនួន៩ ហើយ ដែលបានឆ្លើយតបជាវិជ្ជមាន ចំពោះការអញ្ជើញឱ្យចូលរួមកិច្ចប្រជុំកំពូលនេះ។ ទោះជាយ៉ាងណា បាងកកបុស្តិ៍ផ្សាយថា លោក Sangrat មិនបានបញ្ជាក់ថាប្រទេសណាឱ្យច្បាស់លាស់នោះទេ។
គួរបញ្ជាក់ថា ថៃគឺជាប្រធាន និងជាម្ចាស់ផ្ទះនៃកិច្ចប្រជុំកំពូល APEC ក្នុងឆ្នាំ ២០២២ នេះ។ កិច្ចប្រជុំនេះ នឹងរៀបចំឡើងខណៈដែលពិភពលោកប្រឈមមុខជាច្រើនទៅលើបញ្ហាផ្សេងៗ ជាពិសេសទាក់ទងនឹងវិបត្តិភូមិសាស្រ្តនយោបាយ និងសេដ្ឋកិច្ច។
សង្រ្គាមនៅអ៊ុយក្រែន បានធ្វើឱ្យកិច្ចប្រជុំនេះមានភាពស្មុគស្មាញ ជាពិសេសសម្រាប់ប្រទេសថៃ ដែលជាម្ចាស់ផ្ទះ ក្នុងការរក្សាតុល្យភាពនៃទំនាក់ទំនងរបស់ខ្លួនចំពោះការប្រឈមមុខដាក់គ្នារវាងប្រទេសមហាអំណាចធំៗក្នុងកិច្ចប្រជុំកំពូលដូចនេះ។
ចំពោះលោក ពូទីន វិញ ការចូលរួមកិច្ចប្រជុំ APEC ប្រហែលជាសំខាន់ខ្លាំងសម្រាប់លោក ជាពិសេសក្នុងកាលៈទេសៈនេះ គឺនៅពេលដែលលោកខាងលិច ព្យាយាមកាត់ផ្ដាច់រុស្ស៊ីឱ្យនៅឯកោ ក្រោយកងទ័ពរុស្ស៊ីចូលឈ្លានពានអ៊ុយក្រែន។ អ្នកវិភាគមើលឃើញថា វត្តមានរបស់លោកពូទីន គឺជាការបង្ហាញថា រុស្ស៊ីមិនឯកោនោះទេ ព្រោះសូម្បីតែប្រទេសដែលថ្កោលទោសសកម្មភាពឈ្លានពានរបស់ខ្លួន ដូចជាថៃ ក៏នៅតែរក្សាទំនាក់ទំនងជាមួយក្រុងម៉ូស្គូ។
យ៉ាងណាក៏ដោយ ថៃគឺជាប្រទេសមួយក្នុងចំណោមប្រទេសជិត ៦០ ផ្សេងទៀត ដែលបោះឆ្នោតអនុប្បវាទ លើសេចក្ដីសម្រេចចិត្តរបស់មហាសន្និបាតអង្គការសហប្រជាជាតិ ក្នុងការព្យួរទីក្រុងម៉ូស្គូពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិ (UNHRC) កាលពីដើមខែមេសា។ អ្នកវិភាគមួយចំនួនបានមើលឃើញថា ទំនាក់ទំនងថៃ-រុស្ស៊ី នៅតែមានភាពខ្លាំងបន្ទាប់ពីរុស្ស៊ីឈ្លានពានអ៊ុយក្រែន ខណៈក្រុងម៉ូស្គូព្យាយាមទាញយកផលចំណេញពីការផ្គត់ផ្គង់អាវុធ ការវិនិយោគ ទេសចរណ៍ និងជំនួយការទូតដល់ថៃ៕
ដោយ៖ហួន ឌីណា ប្រភព៖ Putin to attend Apec summit
