តៃវ៉ាន់ ថាចិនកំពុងរៀនសូត្រពីសង្រ្គាមអ៊ុយក្រែនដើម្បីអភិវឌ្ឍយុទ្ធសាស្ត្រ«សង្គ្រាមកូនកាត់»
តៃវ៉ាន់៖ប្រទេសចិន កំពុងតែសម្លឹងមើលបទពិសោធន៍នៃសង្គ្រាមនៅអ៊ុយក្រែន ដើម្បីអភិវឌ្ឍយុទ្ធសាស្ត្រសង្គ្រាមកូនកាត់ប្រឆាំងនឹងតៃវ៉ាន់ ក្នុងនោះរួមទាំងការប្រើប្រាស់យន្តដ្រូនគ្មានមនុស្សបើក និងសម្ពាធខាងផ្លូវចិត្តផង។ នេះបើតាមការឱ្យដឹងពីមន្ត្រីសន្តិសុខជាន់ខ្ពស់ជាតិតៃវ៉ាន់ម្នាក់ នៅថ្ងៃពុធ ទី១២ ខែតុលា ឆ្នាំ២០២២នេះ។
តៃវ៉ាន់ បាននិងកំពុងសិក្សាយ៉ាងយកចិត្តទុកដាក់នូវមេរៀនទាក់ទងនឹងសង្គ្រាមអ៊ុយក្រែន ដើម្បីប៉ាន់ស្មានពីប្រតិកម្មដែលចិនអាចនឹងមានចំពោះខ្លួន។
ចិន បានធ្វើសមយុទ្ធយោធានៅជុំវិញកោះតៃវ៉ាន់ក្នុងខែសីហា ដើម្បីបង្ហាញការខឹងសម្បារបស់ខ្លួនចំពោះដំណើរទស្សនកិច្ចទៅកាន់ទីក្រុងតៃប៉ិរបស់ប្រធានសភាអាមេរិកលោកស្រី ណាន់ស៊ី ប៉េឡូស៊ី។ ចាប់តាំងពីពេលនោះមក ចិនបានរក្សាសកម្មភាពយោធារបស់ខ្លួន បើទោះបីជាមានកម្រិតថមថយក៏ដោយចុះ។
ក្នុងពេលថ្លែងប្រាប់សមាជិកសភាតៃវ៉ាន់ អគ្គនាយកការិយាល័យសន្តិសុខជាតិតៃវ៉ាន់ លោក ឈិន មីងតុង (Chen Ming-tong) បាននិយាយថា ប្រទេសចិនក៏កំពុងយកចិត្តទុកដាក់ ចំពោះព្រឹត្តិការណ៍ដែលកំពុងកើតឡើងនៅក្នុងប្រទេសអ៊ុយក្រែនដែរ។ «ឆ្នាំនេះ យោធាកុម្មុយនិស្តចិន បានខ្ចីបទពិសោធន៍នៃសង្រ្គាមរុស្ស៊ី-អ៊ុយក្រែន ដើម្បីបង្កើតសង្រ្គាមកូនកាត់ ប្រឆាំងនឹងតៃវ៉ាន់ និងពង្រឹងការហ្វឹកហ្វឺនប្រយុទ្ធ ព្រមទាំងការរៀបចំខ្លួនប្រឆាំងនឹងសត្រូវខ្លាំងៗជាច្រើន»។
លោក ឈិន បន្តរៀបរាប់ទៀតថា បន្ទាប់ពីសមយុទ្ធកាលពីខែសីហា ចិនបានពង្រីកតំបន់ប្រផេះ និងសកម្មភាពកូនកាត់ (hybrid activities) ប្រឆាំងនឹងតៃវ៉ាន់ ជាពិសេសប្រើដ្រូនគ្មានមនុស្សបើកឱ្យហោះហើរទៅក្បែរទាំងកោះដែលគ្រប់គ្រងដោយតៃវ៉ាន់ ចេញពីឆ្នេរសមុទ្ររបស់ប្រទេសចិន និងទាំងចូលទៅក្នុងតំបន់កំណត់អត្តសញ្ញាណការពារដែនអាកាសរបស់តៃវ៉ាន់។
ទីក្រុងតៃប៉ិ និយាយថា យុទ្ធនាការសង្គ្រាមតំបន់ប្រផេះរបស់ចិន មានជាប់ពាក់ព័ន្ធនឹងយុទ្ធសាស្ត្រ ដើម្បីកម្ចាត់សត្រូវ ដោយមិនងាកទៅរកការប្រយុទ្ធដោយបើកចំហ ដូចជាការហោះហើរញឹកញាប់ចូលទៅក្នុងតំបន់ការពារដែនអាកាសរបស់តៃវ៉ាន់ និងបង្ខំកងទ័ពអាកាសរបស់តៃវ៉ាន់ឱ្យប្រយុទ្ធគ្នា។
អគ្គនាយកការិយាល័យសន្តិសុខជាតិនិយាយថា ចិនបានបញ្ចេញរូបភាពយោធារបស់តៃវ៉ាន់តាមអ៊ីនធឺណិត ដើម្បីបង្កាច់បង្ខូចឈ្មោះ និងវាយប្រហាររដ្ឋាភិបាលក្រុងតៃប៉ិ។ សម្តីនេះ លោក ឈិន ចង់សំដៅដល់វីដេអូដែលបានផ្សព្វផ្សាយនៅលើប្រព័ន្ធផ្សព្វផ្សាយសង្គមរបស់ចិនកាលពីខែសីហា អំពីទាហានតៃវ៉ាន់នៅលើកោះឈូងសមុទ្រដែលថតដោយដ្រូនគ្មានមនុស្សបើក។
សម្រាប់មន្ត្រីតៃវ៉ាន់ សកម្មភាពទាំងនេះគូសបញ្ជាក់ឱ្យឃើញថា បក្សកុម្មុយនិស្តចិនបានបង្កើនការយល់ដឹងផ្នែកសង្គ្រាម សកម្មភាពនៅតំបន់ប្រផេះ និងវិធីសាស្រ្តកូនកាត់ផ្សេងទៀត ដែលត្រូវបានបង្កើតបានឡើងជាទម្រង់ថ្មីនៃការគំរាមកំហែងដល់សន្តិសុខជាតិតៃវ៉ាន់៕
ដោយ៖ លី លីយ៉ា
ប្រភពព័ត៌មាន៖ Taiwan says China looking at Ukraine war to develop ‘hybrid’ strategies
