មន្ត្រីសង្គមស៊ីវិលស្នើរាជរដ្ឋាភិបាលឱ្យមានវិធានការចំពោះក្រុមហ៊ុនដែលបញ្ជូនពលករខ្មែរធ្វើការនៅបរទេស ហើយមិនមានឯកសារត្រឹមត្រូវ
ភ្នំពេញ៖មន្ត្រីអង្គការសង់ត្រាល់ប្រចាំប្រទេសថៃបាននិយាយថា ពលករមួយចំនួនដែលធ្វើការនៅក្នុងប្រទេសថៃកំពុងមានមានការព្រួយបារម្ភពេលដែលអាជ្ញាធរថៃបានរឹតបន្តឹងច្បាប់ដោយសារក្រុមហ៊ុនខ្លះបញ្ជូនពលករទៅធ្វើការនៅថៃ ដោយមិនមានឯកសារត្រឹមត្រូវ។
លោក ឡឹង សុផុន មន្រ្តីគម្រោងប្រចាំនៅប្រទេសថៃនៃអង្គការសិទិ្ធការងារកម្ពុជាសង់ត្រាល់ បានប្រាប់ថា តាមការសង្កេតមើលឃើញថា ច្បាប់ការងារប្រទេសថៃ ប្រសិនបើពលករខ្មែរដែលពួកគាត់ចូលមកធ្វើការក្នុងប្រទេសថៃ តាមរយៈប្រព័ន្ធអនុស្សរណៈ(MoU) និងប្រព័ន្ធច្បាប់ការងារត្រឹមត្រូវ គឺពលករទាំងនោះនឹងមិនមានការព្រួយបារម្ភឡើយ។ប៉ុន្តែ ពលករខ្មែរមួយចំនួន ពួកគាត់មកប្រទេសថៃដោយមិនមានឯកសារគ្រប់គ្រាន់ ដោយសារចំណាយលើការធ្វើឯកសារវាមានតម្លៃថ្លៃ ហើយនៅស្រុកពួកគាត់ក៏មិនមានការងារធ្វើ ទើបមកធ្វើការតាមបណ្ដាខេត្ត ដែលជាប់ព្រំប្រទល់ ព្រំដែនខ្មែរ-ថៃ។ប្រសិនជាប៉ូលីសឫអាជ្ញាធរត្រួតពិនិត្យឃើញថា មិនមានឯកសារគ្រប់គ្រាន់ពលករទាំងនោះក៏ត្រូវផាកពិន័យ។
លោក ឡឹង សុផុនថា៖ «ដូច្នេះពលករដែលមិនមានឯកសារគ្រប់គ្រាន់នៅថៃ រស់នៅប្រឈមច្រើន ក្នុងបញ្ហាផ្សេងៗ ពីព្រោះថារដ្ឋាភិបាលថៃបានបន្តឹង និងពិនិត្យច្រើន នៅតំបន់កន្លែងរស់នៅរបស់ពួកគាត់ ហើយពួកគាត់ក៏ជួបផលវិបាក ក្នុងការស្វែងរកការងារធ្វើ។ ជាពិសេស ការបម្លាស់ទីពីកន្លែងមួយទៅកន្លែងមួយទៀត មានភាពលំបាក ដោយកន្លែងខ្លះ ប៉ូលីសថៃ គឺគេមិនលើកលែងឡើយ ដោយធ្វើតាមច្បាប់»។
លោកបន្តថា មានក្រុមហ៊ុនមួយចំនួនដែលមិនគោរពតាមច្បាប់ការងារបានបញ្ជូនពលករខ្មែរមកប្រទេសថៃ ដោយមិនមានឯកសារត្រឹមត្រូវ និងបានសន្យាថានឹងរកការងារជូនពួកគាត់ ប៉ុន្តែបែរជាយកលុយពីពលកររួច ក៏ទុកពលករទាំងនោះចោលក្នុងប្រទេសថៃដែលជាហេតុធ្វើឱ្យពលករទាំងនោះខាតទាំងលុយ និងខាតទាំងពេលវេលា។
លោក សុផុនបន្ថែមថា៖ «សម្រាប់ពលករដែលប្រឈមមកធ្វើការនៅថៃ រដ្ឋាភិបាលគួរតែពិចារណា មានវិធានការណាមួយឱ្យបានច្បាស់ ដើម្បីជួយឱ្យប្រជាពលរដ្ឋយើងកុំឱ្យគាត់ចំណាកស្រុកដោយមិនមានសុវត្ថិភាព។ ម្យ៉ាងវិញទៀត ពលករនៅថៃក៏ច្រើនដែរ ខ្ញុំចង់ឱ្យមានការអប់រំ បងប្អូនពលករ ជាពិសេសមានវិធានការអប់រំក្រុមហ៊ុនមួយចំនួនដែលគាត់បានបញ្ជូនពលករមកបរទេសហ្នឹង គឺគាត់ត្រូវតែគោរពតាមច្បាប់ការងារឱ្យបានត្រឹមត្រូវ ពីព្រោះកន្លងមកពលករដែលមកដោយក្រុមហ៊ុន ពួកគាត់មិនឯកសារ វីសាត្រឹមត្រូវ»។
លោកបន្ថែមថា លោកចង់ឃើញរាជរដ្ឋាភិបាលប្រទេសកម្ពុជា និងរាជរដ្ឋាភិបាលប្រទេសថៃ មានការរួមគ្នាពង្រឹងវិធានការឲ្យបានច្បាស់លាស់ ដើម្បីកាត់បន្ថយបញ្ហាប្រឈមផ្សេងៗរបស់ពលករ។ ជាពិសេសទៅទៀត សុំឲ្យរាជរដ្ឋាភិបាល ជួយសម្រួលការធ្វើឯកសារស្របច្បាប់របស់ពលករ ពីព្រោះពលករថា ការធ្វើឯកសារនេះ គឺត្រូវចំណាយថវិកាច្រើន ហើយវាមានតម្លៃថ្លៃខ្លាំងណាស់។
យោងតាមរបាយការណ៍របស់ក្រសួងការងារថា ពលករកម្ពុជាដែលកំពុងធ្វើការនៅបរទេស មានចំនួនសរុបជាង១,៣លាននាក់ ក្នុងនោះ ១,២លាននាក់ធ្វើការនៅប្រទេសថៃ ជាង៤៥.០០០នាក់នៅប្រទេសកូរ៉េខាងត្បូង ២៣.០០០នាក់នៅម៉ាឡេស៊ី ១១.០០០នាក់នៅប្រទេសជប៉ុន ជាង៨០០នាក់នៅសិង្ហបុរី ២០០នាក់នៅហុងកុង និង៤៣នាក់នៅប្រទេសអារ៉ាប៊ីសាអូឌីត៕
ដោយ៖ជា សុខនី
