វ៉េឡាតា៖ កប៉ាល់ធ្វើពីឈើធ្វើដំណើរតាមមហាសមុទ្រដ៏ធំបំផុតរបស់ពិភពលោក ដែលគ្រោងនឹងទៅដល់ទីក្រុងសៀងហៃ ភាគខាងកើតប្រទេសចិន ក្នុងឆ្នាំ២០២៣ ។

នាវានេះបានធ្វើដំណើរទៅកាន់កំពង់ផែ Grand Harbor របស់ប្រទេសម៉ាល់តា ដែលជាប្រទេសជាកោ ស្ថិតនៅតំបន់សមុទ្រមេឌីទែរ៉ាណេ កាលពីចុងសប្តាហ៍មុន មុនពេលធ្វើដំណើរទៅកាន់ទីក្រុងបាសេឡូណា ប្រទេសអេស្ប៉ាញ នៅថ្ងៃអង្គារ ទី១៨ ខែតុលា ឆ្នាំ២០២២នេះ។

នាវាឈ្មោះថា Gotheborg នៃប្រទេសស៊ុយអែតមួយនេះ នឹងត្រូវចតនៅកំពង់ផែអេស្ប៉ាញ សម្រាប់រដូវរងារ មុនពេលបន្តដំណើររបស់ខ្លួនទៅកាន់ទីក្រុងសៀងហៃ។
នាវានេះស្ថិតនៅលើបេសកកម្មអាស៊ីរយៈពេលពីរឆ្នាំ ដែលមានគោលបំណងលើកកម្ពស់ពាណិជ្ជកម្មស៊ុយអែត-អាស៊ី និងបង្កើតឱកាសអាជីវកម្មថ្មីៗ។

Gotheborg ត្រូវបានដឹងថា ជាកប៉ាល់ចម្លង ចេញពីកប៉ាល់របស់ក្រុមហ៊ុនស៊ុយអែតបូព៌ានៅសតវត្សរ៍ទី ១៨ ដែលបានលិចនៅខាងក្រៅទីក្រុង Gothenburg ប្រទេសស៊ុយអែតក្នុងឆ្នាំ ១៧៤៥៕ ប្រភពពី People’s Daily, China, ដោយ៖ សារ៉ាត