ហាណូយ៖ ក្រុមហ៊ុន VinFast របស់វៀតណាម បាននិយាយថា ខ្លួននឹងប្រមូលមកវិញនូវរថយន្តអគ្គិសនីម៉ូដែល VF e34 ចំនួន ៧៣០គ្រឿង ដែលមានតែនៅលើទីផ្សារក្នុងស្រុកដើម្បីធ្វើការត្រួតពិនិត្យ និងជំនួសឧបករណ៍ចាប់សញ្ញា (sensor) ដែលគាំង។

VinFast ដែលបានចាប់ផ្តើមប្រតិបត្តិការនៅឆ្នាំ ២០១៩ គឺជាបុត្រសម្ព័ន្ធមួយនៃក្រុមហ៊ុន Vingroup ដ៏ធំបំផុតរបស់ប្រទេសវៀតណាម ហើយបានលក់រថយន្តអគ្គិសនី (EV) សរុបចំនួន ២២០៨ គ្រឿងហើយ ចាប់តាំងពីការបើកដំណើរការ កាលពីចុងឆ្នាំមុន។

VinFast បាននិយាយនៅក្នុងសេចក្តីថ្លែងការណ៍មួយថា “ឧបករណ៍ចាប់សញ្ញាគាំងចំហៀងនៃប្រព័ន្ធពោងសុវត្ថិភាពដែលបំពាក់ លើម៉ូដែល VF e34 ទំនងជាជួបប្រទះនឹងបញ្ហាមិនឆបគ្នាជាមួយនឹងឧបករណ៍បញ្ជាពោងសុវត្ថិភាព… ដូច្នេះហើយអាចនឹងបញ្ជូនសញ្ញាមិនត្រឹមត្រូវទៅកាន់ឧបករណ៍បញ្ជា”។

យ៉ាងណាក៏ដោយ ក្រុមហ៊ុនបាននិយាយថា ខ្លួនមិនបានកត់ត្រាការបែកបាក់ ឬការត្អូញត្អែរពីអតិថិជនអំពីកំហុសឧបករណ៍ចាប់សញ្ញានោះទេ។

VinFast ដែលឈប់ផលិតរថយន្តប្រើសាំង ក្នុងខែសីហា កំពុងត្រៀមពង្រីកទីផ្សារសហរដ្ឋអាមេរិក ជាទីដែលខ្លួនសង្ឃឹមថា នឹងប្រកួតប្រជែងជាមួយក្រុមហ៊ុនផលិតរថយន្តល្បីៗ និងរំពឹងចែកចាយរថយន្តស្ព័រ អគ្គិសនីទាំងអស់ ចំនួន ៥០០០គ្រឿងដំបូងរបស់ខ្លួន នៅក្នុងខែវិច្ឆិកា៕ ប្រភពពី VNexpress, ដោយ៖ សារ៉ាត