ក្រសួងសុខាភិបាលព្រមានប្រជាពលរដ្ឋកុំឱ្យប្រើប្រាស់ផលិតផលគ្រឿងសម្អាងដែលគ្មានការទទួលស្គាល់ពីស្ថាប័នជំនាញ
ភ្នំពេញ៖ក្រសួងសុខាភិបាលបានចេញសេចក្ដីប្រកាសព័ត៌មានប្រាប់ទៅប្រជាពលរដ្ឋទាំងអស់កុំឱ្យប្រើប្រាស់ផលិតផលគ្រឿងសម្អាងលក់នៅអនឡាញ ដែលមិនមានលេខប្រវេទន៍ ទទួលស្គាល់ពីក្រសួងសុខាភិបាល។
ផលិតផលគ្រឿងសម្អាងទាំងនោះមានដូចជា La Roche-Posay Anthelios Dry Touch និង La Roche-Posay CAMBO ដែលជាផលិតផលមិនមានលេខប្រវេទន៍ពីក្រសួងសុខាភិបាល ហើយត្រូវតែបញ្ឈប់ការលក់ និងចែកចាយជាបន្ទាន់។ នេះបើតាមសេចក្ដីប្រកាសព័ត៌មានចុះថ្ងៃទី១៨ ខែតុលា ឆ្នាំ២០២២។
សេចក្ដីប្រកាសព័ត៌មានដដែលបានបន្តថា ក្រសួងនឹងចាត់វិធានការនិងរឹតបណ្តឹងទៅតាមផ្លូវច្បាប់ចំពោះម្ចាស់គណនីបណ្ដាញសង្គមឈ្មោះ La Roche-Posay in Phnom Penh និងអ្នកដែលពាក់ព័ន្ធទាំងអស់ ដែលបានចែកចាយ ផ្សព្វផ្សាយ និងលក់ផលិតផលនេះ។
ជុំវិញរឿងនេះលោកវេជ្ជបណ្ឌិត នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិតសភាកម្ពុជា បានប្រាប់ថាចំពោះផលិតផលគ្រឿងសម្អាងថែរក្សាស្បែក គឺមានបែងចែកជាពីរប្រភេទទីមួយ៖ «គឺប្រភេទនាំចូលពីក្រៅប្រទេសមានដូចជា ប្រទេសថៃ កូរ៉េ វៀតណាម និងប្រទេសចិន។ ចំណែកប្រភេទទីពីរ៖ តាមដែលលោកសិក្សា គឺប្រភេទគ្រឿងសម្អាងដែលលាយនៅក្នុងស្រុក ដែលមានអាជីវករមួយចំនួន ពួគគាត់បានលាយផលិតផលគ្រឿងសម្អាងថែរក្សាសម្រស់ដូចជា ឡេលាបឲ្យសស្បែក និងឡេឲ្យសមុខជាដើម»។
លោក នុត សម្បត្តិបន្តថា៖ «ដូច្នេះផលិតផលគ្រឿងសម្អាង តុបតែងនាំចូលក្ដី និងផលិតក្នុងស្រុកក្ដី បើកាលណាមិនមានការអនុញ្ញាតពីក្រសួងសុខាភិបាល មានន័យថាជារបស់ខុសច្បាប់ ពីព្រោះថាមិនមានការបញ្ជាក់ពីគុណភាព បញ្ជាក់ពីភាពផលប៉ះពាល់ចំពោះមុខ និងយូរអង្វែង»។
លោកបន្តថា អ៊ីចឹងវាជាវត្ថុមួយដែលមិនអាចប្រើប្រាស់ ហើយប្រជាពលរដ្ឋយើងក៏មិនគួរទិញយកមកប្រើប្រាស់ដែរ ពីព្រោះថាគ្មានការទទួលខុសត្រូវ ហើយវាក៏បង្កឱ្យមានផលប៉ះពាល់ដូចជា ធ្វើឱ្យខូចស្បែក ខូចសម្រស់ និងប៉ះពាល់សុខភាព ហើយតទៅមុខវាអាចបង្កទៅជាជំងឺមហារីកស្បែក អាចនឹងស្លាប់ក៏មានដែរ»។
លោក សម្បត្តិ បន្ថែមថាក្រសួងសុខាភិបាល ក្រសួងមហាផ្ទៃ ក្រសួងប្រៃសណីយ៍ និងទូរគមនាគមន៍ និងក្រសួងពាណិជ្ជកម្មដែលមានសមត្ថកិច្ចក្នុងការគ្រប់គ្រង និងអនុញ្ញាតឱ្យមានអាជីវកម្មតាមអនឡាញហ្នឹងហើយបើមានករណីមិនប្រក្រតីណាមួយអាចធ្វើអាជីវកម្មបាន នោះបានន័យក្រសួងទាំងប៉ុន្មានដែលបានរៀបរាប់នេះ គឺត្រូវតែទទួលខុសត្រូវ។
ចំណែកលោក ផាន អូន អគ្គនាយក នៃអគ្គនាយកដ្ឋានក.ប.ប បានប្រាប់ថា លោកកំពុងជាប់ប្រជុំ ដោយឲ្យលើកសំណួរនេះទៅសួរខាងក្រសួងសុខាភិបាល។
សូមបញ្ជាក់ថា កន្លងមកក្រសួងសុខាភិបាលបានបន្តរកឃើញគ្រឿងសម្អាងមួយចំនួនដែលមិនបានចុះលេខប្រវេទន៍ត្រឹមត្រូវពីក្រសួងសុខាភិបាល ហើយបានធ្វើទីផ្សារលក់នៅលើអនឡាញ៕ ដោយ៖ ជា សុខនី
