ភ្នំពេញ៖ រថយន្តមួយគ្រឿងមិនចាំម៉ាកបើកបត់ត្រឡប់ក្រោយ ត្រូវបានបុរសម្នាក់ជិះម៉ូតូក្នុងល្បឿនលឿនអត់ពាក់មួកសុវត្ថិភាព បានជ្រុលទៅបុកចំហៀងរថយន្តយ៉ាងពេញទំហឹងបណ្តាលឲ្យដួលបោកក្បាលស្លាប់ភ្លាមៗនៅនឹងកន្លែងកើតហេតុ។ ចំណែករថយន្តបើករត់គេចខ្លួនបាត់។ ហេតុការណ៍នេះកើតឡើងកាលពីយប់ថ្ងៃ១៥ ខែកញ្ញា ឆ្នាំ២០១៩ ស្ថិតនៅតាមបណ្ដោយផ្លូវបេតុងកែងនឹងផ្លូវ អូរស៊ីអេ ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

សពជនរងគ្រោះមានឈ្មោះ ម៉ាត់ សម្រូត ភេទប្រុស អាយុ៣៦ឆ្នាំ ជនជាតិខ្មែរអ៊ិស្លាម មុខរបរកាប់គោលក់ ស្នាក់នៅភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ មានប្រពន្ធ និងកូន២នាក់នៅក្នុងបន្ទុកគ្រួសារ។យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសខាងលើជិះម៉ូតូម៉ាកខ្លីក ពណ៌ស ពាក់ស្លាកលេខភ្នំពេញ1HP-0300 បើកបរម្នាក់ឯង ដោយមិនបានពាក់មួកសុវត្តិភាព តាមបណ្ដោយផ្លូវអូរស៊ីអេទិសដៅពីកើតទៅលិច រួចបត់ឆ្វេងតាមផ្លូវបេតុង សំដៅកុងស៊ីកាប់គោ  គោលបំណងទិញគោទុកកាប់លក់ព្រឹក។

ពេលនោះ ក៏មានរថយន្តមួយគ្រឿងមិនចាំម៉ាកបើកមកពីក្រោយស្របទិសដៅគ្នាលុះមកដល់ចំណុចកើតហេតុ រថយន្តក៏បានបើកបត់ត្រឡប់ក្រោយធ្វើឲ្យជនរងគ្រោះចាប់ហ្វ្រាំងមិនទាន់បុកចំហៀងរថយន្តពេញទំហឹងពេញទំហឹង បណ្ដាលឲ្យដួលបោកក្បាលស្លាប់ក្នុងថ្លុកឈាមភ្លាមៗនៅន្លែងកើតហេតុ។ ចំណែករថយន្តបើកគេចបាត់។ ក្រោយពេលកើតហេតុ សមត្ថកិច្ចមូលដ្ឋានចុះដល់ធ្វើកំណត់ហេតុ និងប្រគល់សពជនរងគ្រោះជូនគ្រួសារសពផងដែរ៕ធ.ដ