កិច្ចប្រជុំកំពូល៖ មេដឹកនាំសហភាពអឺរ៉ុបនៅជាប់គាំងត្រឹមសេចក្តីព្រមព្រៀងកំណត់តម្លៃឧស្ម័ន
អន្តរជាតិ៖បន្ទាប់ពីមានការជជែកពិភាក្សាគ្នាដ៏យូរក្នុងកិច្ចប្រជុំកំពូលក្នុងទីក្រុងព្រុចសែល មេដឹកនាំសហភាពអឺរ៉ុបទាំង ២៧ប្រទេស នៅតែមិនទាន់ត្រូវរ៉ូវគ្នាលើកិច្ចព្រមព្រៀងកំណត់តម្លៃឧស្ម័ននៅឡើយ។ មានសមាជិក ១៥ប្រទេសយល់ស្របលើការកំណត់តម្លៃឧស្ម័នជារួម តែអាល្លឺម៉ង់ដែលជាប្រទេសនាំចូលឧស្ម័នរុស្ស៊ីច្រើនគេ បានរុញច្រានចោលគំនិតនេះ។
ប្រទេសនៅអឺរ៉ុបផ្ទាល់ ដែលកំពុងជួបការលំបាកក្នុងការស្វែងរកប្រភពថាមពលឧស្ម័នពីរុស្ស៊ី កំពុងបន្តមានតម្លៃឧស្ម័នកើនឡើង ពិសេសការខ្វះខាតឧស្ម័នប្រើប្រាស់នៅរដូវត្រជាក់ខាងមុខ។ ភាពជាប់គាំងក្នុងការរកដំណោះស្រាយបញ្ហាថាមពល ដែលបង្កចេញពីសង្គ្រាមនៅអ៊ុយក្រែននេះ គឺដោយតែមានមេដឹកនាំជាច្រើននៃប្រទេសជាសមាជិក នៅមិនទាន់ឯកភាពគ្នាលើវិធានការកំណត់តម្លៃឧស្ម័នទប់ទល់នឹងយុទ្ធសាស្ត្ររុស្ស៊ី ដែលមានចេតនាបិទការផ្គត់ផ្គង់ឧស្ម័នរបស់ខ្លួនទៅឱ្យប្លុកអឺរ៉ុប។
មានមេដឹកនាំមកពីបណ្តាប្រទេសជាសមាជិកយ៉ាងហោចណាស់ ១៥ប្រទេស បានលើកដៃយល់ស្របឱ្យកំណត់តម្លៃឧស្ម័នរួមមួយ នៅពេលដែលមានបាតុកម្មតវ៉ាខ្លាំងក្លា នៅតាមបណ្តាប្រទេសមួយចំនួនរួមមានបារាំងនិងបែលហ្ស៊ិក ដោយការកើនឡើងតម្លៃទំនិញ ជួបអតិផរណាជាតិជាដើម។
ផ្ទុយទៅវិញ អាល្លឺម៉ង់ដែលជាប្រទេសសេដ្ឋកិច្ចនាំមុខមួយនៅអឺរ៉ុប យល់ឃើញថា ការកំណត់តម្លៃឧស្ម័ននោះ ជារឿងប្រថុយគ្រោះថ្នាក់ខ្លាំងណាស់ព្រោះថា ឧស្ម័នអាចប្រឈមនឹងការស្ទះនៅលើទីផ្សារអឺរ៉ុបនិងបានបន្ថែមថា ចំណាត់ការនេះនឹងប៉ះពាល់ដល់យុទ្ធនាការកាត់បន្ថយការប្រើប្រាស់ថាមពលរបស់សហភាពអឺរ៉ុបដែលទើបបានដាក់ចេញ។
គួរបញ្ជាក់ថា បញ្ហាខ្វះឧស្ម័នប្រើប្រាស់ពីប្រទេសមួយទៅប្រទេសមួយនៅអឺរ៉ុបនេះ មានកម្រិតមិនដូចគ្នាទេ។ ជាក់ស្តែង បារាំងនិងអេស្ប៉ាញដែលមិនរំពឹងខ្លាំងលើឧស្ម័នរុស្ស៊ី មានស្តុកគ្រប់គ្រាន់ដើម្បីប្រើប្រាស់។ ខុសពីនោះ អាល្លឺម៉ង់កំពុងប្រឈមខ្លាំងជាងគេ ព្រោះបច្ចុប្បន្នអាល្លឺម៉ង់នៅបន្តទិញឧស្ម័នពីរុស្ស៊ីចំនួនជាង ៣៥% នៃតម្រូវការរបស់ខ្លួន។
តែយ៉ាងណា ការសាមគ្គីរបស់ក្រុមប្រទេសអឺរ៉ុប គឺសំដៅជួយអាល្លឺម៉ង់ ដែលជាកម្លាំងចលករនៃសេដ្ឋកិច្ចអឺរ៉ុប។ ថ្លែងនៅក្នុងកិច្ចប្រជុំកំពូលលើកនេះ លោក Charles Michel ប្រធានក្រុមប្រឹក្សាសហភាពអឺរ៉ុបបានអះអាង ការតាងចិត្តជាធ្លុងមួយរបស់អឺរ៉ុបដើម្បីសម្រេចគោលដៅដែលកំណត់លើថាមពលឧស្ម័ននោះគឺ ការបញ្ចុះតម្លៃ ការធានាការផ្គត់ផ្គង់ដោយសុវត្ថិភាព និងការបន្តធ្វើការកាត់បន្ថយតម្រូវការប្រើប្រាស់។
ទោះជានៅពុំទាន់មានលទ្ធផលជាដុំកំភួនក្នុងកិច្ចប្រជុំកំពូលលើកនេះ តែយ៉ាងណាមេដឹកនាំនៃបណ្តាប្រទេសអឺរ៉ុបទាំងនោះ បានសម្រេចចេញនូវផែនទីបង្ហាញផ្លូវដើម្បីបន្តការងារជជែកពីប្រធានបទតម្លៃថាមពលបន្តទៀត។ នេះបើតាមការឆ្លើយប្រាប់អ្នកកាសែតរបស់ប្រធានគណៈកម្មការអឺរ៉ុប អួរស៊ូឡា វ៉ុនឌែរ ឡេយែន។
គួរជ្រាបថា ក្នុងបរិបទសង្គ្រាមនៅអ៊ុយក្រែន សហភាពអឺរ៉ុបចោទរុស្ស៊ីថាមានចេតនា ឆ្លៀតឱកាសផ្អាកការបង្ហូរឧស្ម័នមកអឺរ៉ុប ដើម្បីសងសឹកនឹងទណ្ឌកម្មរបស់ក្រុមបស្ចិមលោក។ តាំងពីបើកប្រតិបត្តិការយោធាចូលឈ្លានពានអ៊ុយក្រែន នៅថ្ងៃទី ២៤កុម្ភៈ២០២២មក រុស្ស៊ីបានឈប់ផ្គត់ផ្គង់ហ្កាសឱ្យប៊ុលហ្ការី ដាណឺម៉ាក ហ្វាំងឡង់ ហូឡង់ ប៉ូឡូញនិងបារាំងជាដើម៕ ដោយ៖ បណ្តូល ពេជ្រ
