កម្មវិធី «រត់ជាមួយសាយ ៤ សែន ជំហាន» ចាប់ផ្ដើមជាផ្លូវការ ដើម្បីរៃអង្គាសថវិកាជូនដល់មន្ទីរពេទ្យកុមារអង្គរ
ភ្នំពេញ៖កម្មវិធី «រត់ជាមួយសាយ ៤ សែន ជំហាន» របស់តារាចម្រៀង លោក អ៊ួន បឋម ហៅ សាយ បានចាប់ផ្ដើមជាផ្លូវការហើយនៅថ្ងៃសៅរ៍ ទី២២ ខែតុលា ឆ្នាំ២០២២។ ជាកម្មវិធីដែលលោក អ៊ួន បឋម នឹងរត់ពីរាជធានីភ្នំពេញ ឆ្ពោះទៅកាន់ខេត្តសៀមរាប ក្នុងរយៈចម្ងាយ ៣០៣ គីឡូម៉ែត្រ ដោយប្រើរយៈពេលប្រាំបួនថ្ងៃ គឺចាប់ពីថ្ងៃទី២២ ដល់ថ្ងៃទី៣០ ខែតុលា ឆ្នាំ ២០២២។
គោលបំណងសំខាន់នៃកម្មវិធី «រត់ជាមួយសាយ ៤ សែន ជំហាន» ធ្វើឡើងដើម្បីប្រមូលថវិកាចំនួន ៤០ ម៉ឺនដុល្លារ ជួយដល់មន្ទីរពេទ្យកុមារអង្គរ សម្រាប់ទ្រទ្រង់ព្យាបាលផ្នែកមហារីក ដែលមន្ទីរពេទ្យសង្កេតឃើញថាមាននិន្នាការកើនឡើងគួរឱ្យព្រួយបារម្ភ។
សូមជម្រាបជូនថា មន្ទីរពេទ្យកុមារអង្គរ ចាប់ផ្ដើមបើកទទួលការពិនិត្យព្យាបាលនិងថែទាំកុមារដែលមានជំងឺមហារីកតាំងពីឆ្នាំ ២០១២ មក។ ក្នុង ១ ឆ្នាំៗ មន្ទីរពេទ្យកុមារអង្គរ ត្រូវការថវិកាពី ៣៥០ ០០០ ដុល្លារទៅ ៤៥០ ០០០ ដុល្លារដើម្បីទ្រទ្រង់ការពិនិត្យព្យាបាល និងថែទាំកុមារ ដែលមានជំងឺមហារីកហើយបើគិតមកទល់ពេលនេះ មន្ទីរពេទ្យកុមារអង្គរបានព្យាបាលកុមារដែលមានជំងឺមហារីកចំនួន៥០៨នាក់រួចមកហើយ។
លោកស្រី ស៊ិន កេតអរុណ ប្រធានការិយាល័យទំនាក់ទំនងសាធារណៈនៃមន្ទីរពេទ្យកុមារអង្គរបានថ្លែងថា មន្ទីរពេទ្យកុមារអង្គរ បានធ្វើរោគវិនិច្ឆ័យឃើញជំងឺមហារីកលើកុមារមានដូចជា ជំងឺមហារីកបាតភ្នែក មហារីកឆ្អឹងខ្នង មហារីកជាលិកា មហារីកខួរក្បាល និងជំងឺមហារីកគ្រាប់ឈាម។
ដ្បិតតែមន្ទីរពេទ្យកុមារអង្គរ មានវេជ្ជបណ្ឌិតដែលមានជំនាញក្នុងការព្យាបាលជំងឺ មហារីកទាំងនេះក៏ពិតមែន ប៉ុន្តែបើតាមលោកស្រីស៊ិន កេតអរុណ ការព្យាបាលជំងឺមហារីក ត្រូវការថវិកាច្រើនជាងការព្យាបាលជំងឺ ប្រភេទដទៃទៀត ដោយសារតែវាទាមទារនូវបច្ចេកទេសចាំបាច់មួយចំនួនដូចជាការវះកាត់ ការចាក់ថ្នាំគីមី ការបាញ់កាំរស្មីឡាស៊ែរ ការចាក់ថ្នាំបង្កក ជាលិកានិងការគ្រប់គ្រងការឈឺចាប់ជាដើម។
គួររំឭកដែរថា នេះមិនមែនជាលើកទី១ទេ ដែលលោក អ៊ួន បឋម ហៅ សាយ បានរៀបចំកម្មវិធីរត់ដើម្បីរៃអង្គាសថវិកាជួយដល់មន្ទីរពេទ្យកុមារអង្គរ ក្នុងខេត្តសៀមរាប។ កាលពីឆ្នាំ ២០២០ លោកអ៊ួន បឋម ហៅសាយ បានរៀបចំកម្មវិធីរត់រយៈពេល ៩៧ ថ្ងៃ ជុំវិញប្រទេសកម្ពុជា និងរៃអង្គាសប្រាក់បានចំនួន៥០ម៉ឺនដុល្លារ សម្រាប់ជួយដល់មន្ទីរពេទ្យកុមារអង្គរ ដែលប្រឈមនឹងការខ្វះខាតថវិកា ដើម្បីផ្ដល់សេវាព្យាបាលជំងឺដល់កុមារ។
រាល់ការបរិច្ចាគទាំងអស់របស់សប្បុរសជន នឹងបញ្ជូនទៅកាន់គណនីធនាគាររបស់មន្ទីរពេទ្យកុមារអង្គរដោយផ្ទាល់។ តារាចម្រៀងលោក អ៊ួន បឋម ដែលបានចាប់ផ្ដើមបោះជំហានរត់ម្ដងទៀត នៅថ្ងៃទី ២២ ខែតុលា ឆ្នាំ២០២២ បានអំពាវនាវដល់សប្បុរស ជនជាតិនិងអន្ដរជាតិឱ្យជួយបរិច្ចាគថវិកាទៅតាមលទ្ធភាពរបស់ខ្លួន ដើម្បីរួមចំណែកក្នុងបេសកកម្មរបស់មន្ទីរពេទ្យកុមារអង្គរ ក្នុងការជួយសង្គ្រោះជីវិតកុមារកម្ពុជាឱ្យរួចផុតពីក្រញំាជំងឺមហារីកដ៏កាចសាហាវ៕ ដោយ៖ កែវ កិរិយា
