បារាំងនៅតែគាំទ្រ និងបន្តផ្ដល់ជំនួយដល់កម្ពុជា សម្រាប់វិស័យប្រតិបត្តិសន្តិសុខ និងសន្តិសុខអន្តរជាតិ
ភ្នំពេញ៖ប្រទេសបារាំងនៅតែឈរក្បែរកម្ពុជា ក្នុងការផ្ដល់ជំនួយសម្រាប់វិស័យប្រតិបត្តិការរក្សាសន្តិភាព និងសន្តិសុខអន្តរជាតិ។ នេះបើតាមលោក Fabrice ETIENNE លេខាទី១ អមស្ថានទូតបារាំងប្រចាំកម្ពុជាបានថ្លែងកាលពីថ្ងៃទី២១ ខែតុលា ឆ្នាំ២០២២ក្នុងបិទវគ្គហ្វឹកហ្វឺនបំប៉នបន្ថែមជំនាញអាវុធហត្ថនៅឧដុង្គ ខេត្តកំពង់ស្ពឺ ។ ។លោកថា ប្រទេសបារាំងនឹងឈរក្បែរកម្ពុជាជានិច្ច ក្នុងគ្រាលំបាកដូចមានចែងក្នុងប្រវត្តិសាស្ត្រ ហើយប្រទេសបារាំង នឹងបន្តផ្ដល់ជំនួយដល់កម្ពុជា ជាពិសេសក្នុងវិស័យប្រតិបត្តិការរក្សាសន្តិភាព និងសន្តិសុខអន្តរជាតិ ដែលជាបញ្ហាអន្តរជាតិដ៏សំខាន់ក្នុងពេលបច្ចុប្បន្ននេះ។
នៅក្នុងពិធីនេះដដែល ឯកឧត្តម អ៊ុច បូររិទ្ធ រដ្ឋលេខាធិការប្រចាំការ ក្រសួងការបរទេស និងសហប្រតិបត្តិការអន្តរជាតិ និងជាអនុប្រធានគណៈកម្មាធិការជាតិក៏បានថ្លែងបន្ទាប់ពីមានការបញ្ជាក់របស់លោក Fabrice ETIENNE លេខាទី១ អមស្ថានទូតបារាំងប្រចាំកម្ពុជាថា ការថែរក្សាសន្តិភាព ជាការងារដ៏ថ្លៃថ្លូរមួយដែលត្រូវការ កម្លាំងយោធា លើសពីនេះក៏ត្រូវមានជំនាញផងដែរ។ យោធាត្រូវបានស្ម័គ្រចិត្តចេញ ទៅធ្វើការដើម្បីសន្តិភាព លះបង់កម្លាំងកាយចិត្ត និងសូម្បីតែជីវិតរបស់គាត់។ពួកគាត់រស់នៅក្នុងក្របខ័ណ្ឌនៃច្បាប់ និងបទបញ្ញត្តិដែលបានកំណត់។ សេចក្ដីត្រូវការបង្កប់ន័យ នូវភាពជឿជាក់ដ៏រឹងមាំ ហើយទាមទារឱ្យមានការប្ដេជ្ញាចិត្តខ្ពស់ ប៉ុន្តែមិនដាច់ខាត។
លើសពីនេះទៅទៀត ឯកឧត្តមបន្តថា អស់រយៈពេលជាច្រើនឆ្នាំកន្លងមកហើយ ដែលកងយោធពល ខេមរភូមិន្ទ និងមជ្ឈមណ្ឌលជាតិ បង្ហាញពីការរួមចំណែកយ៉ាងសំខាន់ ក្នុងប្រតិបត្តិការ រក្សាសន្តិភាព បរិមាណដ៏លើសលុប កម្ពុជាសព្វថ្ងៃមានកងកម្លាំងប្រមាណជាង៨០០នាក់ បានកំពុងមានវត្តមាននៅក្នុងតំបន់បេសកកម្ម ទន្ទឹមនឹងនោះគុណភាពនៃការហ្វឹកហ្វឺនក៏ត្រូវ បានពង្រឹងផងដែរ។
ឯកឧត្តម អ៊ុច បូររិទ្ធ បញ្ជាក់ថា៖ «ខ្ញុំសូមរំលឹកឡើងវិញនូវចំណងមិត្តភាពរឹងមាំ នៃប្រទេស យើងទាំងពីរ បារាំង-កម្ពុជា។ ប្រទេសបារាំងឈរក្បែរប្រទេសកម្ពុជាជានិច្ច ក្នុងគ្រាលំបាកដូចមានចែងក្នុងប្រវត្តិសាស្ត្រ បារាំងនឹងបន្តផ្ដល់ជំនួយដល់ប្រទេសកម្ពុជា ជាពិសេសក្នុងវិស័យ ប្រតិបត្តិការរក្សាសន្តិភាព សន្តិសុខអន្តរជាតិ ដែលជាបញ្ហាអន្តរជាតិ សំខាន់នាពេលបច្ចុប្បន្ន ប្រទេសកម្ពុជាក៏ដូចជាប្រទេសបារាំង ប្រទេសយើងទាំងពីរជាអ្នករួមចំណែកដ៏សំខាន់ក្នុងបុព្វហេតុសន្តិភាព។ ដូច្នេះ ហើយការប្ដេជ្ញាចិត្ត មិនប្រែប្រួល ប្រទេសរបស់ខ្ញុំ គឺផ្តល់ហិរញ្ញប្បទាន សម្ភារ និងប្រតិបត្តិការសម្រាប់រៀបចំវគ្គសិក្សា កងរាជអាវុធហត្ថនេះឡើង»។
លោកបន្តថា ប្រទេសបារាំង បានផ្ដល់ជំនួយដល់ NPMEC និងកងរាជ អាវុធហត្ថផ្ទៃប្រទេស វគ្គសិក្សាកងរាជអាវុធហត្ថនេះ បានបំពេញតាមតម្រូវការរបស់អង្គការសហប្រជាជាតិ ហើយវគ្គសិក្សានេះ ផ្តោតសំខាន់លើមូលដ្ឋានច្បាប់ បច្ចេកទេស អន្តរាគមន៍ និងជំនាញនគរបាលយុត្តិធម៌ សន្តិសុខ ស្របតាមយុទ្ធវិធី និងការងាររបស់មន្ត្រីប៉ូលិស អង្គការសហប្រជាជាតិ។
ដោយឡែកនៅឆ្នាំ២០២២នេះ ឯកឧត្តមរដ្ឋលេខាធិការបានបន្តថា គឺជាខួបលើកទី៣០ ដែលកម្ពុជាធ្លាប់ជាប្រទេសទទួលទាហានមួកខៀវរបស់អង្គការសហប្រជាជាតិ ដែលក្នុងនោះក៏មានកងកម្លាំងរក្សាសន្តិភាពបារាំង ដើម្បីចូលរួមចំណែកស្វែងរកសុខសន្តិភាពនៅលើទឹកដីដ៏កម្សត់ ដែលពោរពេញដោយជម្លោះ និងការហែកហួរដោយសង្គ្រាម។ ក្នុងអំឡុងពេលបំពេញបេសកកម្មទាហានបារាំងដ៏អង់អាចក្លាហានបួននាក់ បានពលីជីវិត ដើម្បីបុព្វហេតុសន្តិភាពនៅកម្ពុជា។
ក្នុងវគ្គហ្វឹកហ្វឺនដែលទើបនឹងបញ្ចប់នេះ មានតម្លៃមិនអាចកាត់ថ្លៃបានសម្រាប់កងយោធពលខេមរភូមិន្ទផង និងសម្រាប់ប្រជាជនកម្ពុជាផងនោះគឺទី១. ផ្ដល់ចំណេះដឹង និងចំណេះធ្វើបន្ថែមផ្នែកអាវុធហត្ថ និងទី២. បង្កើតបានសាមគ្គីភាព មិត្តភាព កិច្ចសហប្រតិបត្តិការរវាងប្រទេសនៃយើងទាំងពីរ កម្ពុជា-បារាំង។
លោកបន្ថែមថា៖ «នៅក្នុងឆ្នាំនេះនិងនាពេលអនាគត កម្ពុជានៅតែប្តេជ្ញាចិត្តខ្ពស់ បន្តសកម្មភាពមនុស្សធម៌ តាមរយៈការចូលរួមបេសកកម្ម រក្សាសន្តិភាពរបស់អង្គការសហប្រជាជាតិ នៅក្នុងពិភពលោកបន្តទៀត»។
សូមបញ្ជាក់ថា រយៈពេល១៦ឆ្នាំកន្លងមកនេះ កម្ពុជាបានបញ្ជូនកងកម្លាំងមួកខៀវទៅចូលរួមបំពេញ បេសកកម្មរក្សាសន្តិភាពក្រោមឆ័ត្រអង្គការសហប្រជាជាតិ ជាមួយប្រទេសចំនួន១២១ នៅលើពិភពលោក។ អ្វីដែលជាមោទនភាពនោះគឺមកដល់ពេលបច្ចុប្បន្ននេះ កម្ពុជាបានបញ្ជូនកងកម្លាំងចូលរួមបំពេញបេសកកម្មចំនួន៩ប្រទេសរួមមាន៖ សាធារណរដ្ឋស៊ូដង់ ស៊ូដង់ខាងត្បូង លីបង់ សាយប្រីស ស៊ីរី ឆាដ ម៉ាលី និងអាហ្វ្រិកកណ្តាល សរុបចំនួន ៨.៣០២នាក់ ក្នុងនោះនារី ចំនួន ៥៨០នាក់។
បច្ចុប្បន្ននេះ កងទ័ពមានចំនួន ៨០១នាក់ កំពុងបំពេញបេសកកម្មរក្សាសន្តិភាព នៅប្រទេសចំនួនបួន គឺ ម៉ាលី អាហ្វ្រិកកណ្ដាល លីបង់ និងស៊ូដង់ ក្នុងជំនាញបោសសម្អាតមីន បោសសម្អាតនិងកម្ទេចគ្រាប់មិនទាន់ផ្ទុះ វិស្វកម្មសំណង់ វិស្វកម្មព្រលានយន្តហោះ នាយទាហានសង្កេតការណ៍ និងនាយទាហានសនាធិការ៕ ដោយ៖ ជា សុខនី
