មន្ដ្រីជំនាញ៖ ការប្រើប្រាស់ពូជស្រូវ ថ្នាំបំប៉ន និងជីសម្លាប់សត្វចង្រៃច្រើន ធ្វើឱ្យថ្លៃផលិតស្រូវមានតម្លៃខ្ពស់
បាត់ដំបង៖ ការប្រើប្រាស់ពូជស្រូវច្រើន ថ្នាំបំប៉នច្រើន និងជីសម្លាប់សត្វចង្រៃក្នុងបរិមាណច្រើន ទំនងជាដើមចមដែលធ្វើឱ្យថ្លៃដើមនៃការផលិតស្រូវនៅភូមិគ្រួស ឃុំអន្លង់រុន ស្រុកថ្មគោល ខេត្តបាត់ដំបង មានតម្លៃថ្លៃ។ នេះគឺជាការវាយតម្លៃបឋមពីមន្ដ្រីជំនាញនៃក្រសួងកសិកម្ម និងមន្ទីរកសិកម្មប្រចាំខេត្តបាត់ដំបង នាឱកាសដែលឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម បានចុះទៅជួបសំណេះសំណាលជាមួយប្រជាកសិកររងគ្រោះដោយជំនន់ទឹកភ្លៀងនៅភូមិគ្រួស ឃុំអន្លង់រុនកាលពីថ្ងៃអាទិត្យ ទី២៣ ខែតុលា ឆ្នាំ២០២២។
ឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម នារសៀលថ្ងៃអាទិត្យ ទី២៣ ខែតុលា បានអញ្ជើញចុះជាក់ស្តែងនៅភូមិគ្រួស ឃុំអន្លង់រុនដើម្បីស្វែងយល់និងវាយតម្លៃពីផ្ទៃដីស្រែរបស់ប្រជាពលរដ្ឋដែលរងប៉ះពាល់ដោយសារជំនន់ទឹកភ្លៀងនៅតំបន់នេះ។
នៅក្នុងដំណើរចុះជួបសំណេះសំណាលរបស់ប្រជាកសិករនៅឃុំអន្លង់រុនឯកឧត្តម ងិន ឆាយ បានសាកសួរប្រជាពលរដ្ឋ ដើម្បីស្វែងយល់អំពីថ្លៃដើមនៃការផលិតដំណាំស្រូវរបស់ពួកគាត់ ដោយបានជួបជាមួយភាគីពាក់ព័ន្ធទាំងអស់ រាប់ចាប់តាំងពីប្រជាពលរដ្ឋរងផលប៉ះពាល់ សមាគមទទួលបន្ទុកផ្គត់ផ្គង់ទឹកដល់ដំណើរការកសិកម្ម ព្រមទាំងឈ្មួញអ្នកបញ្ជាទីញស្រូវពីប្រជាកសិករផងដែរ។
ស្ថានភាពជាក់ស្ដែងនៅក្នុងភូមិសាស្ត្រនៃស្រុកមង្គលបុរី ដែលក្រៅតែពីរងផលប៉ះពាល់ដោយសារជំនន់ទឹកភ្លៀងហើយ ក៏មានផងដែរ គឺបញ្ហាសត្វខ្យងក្រហមបំផ្លាញស្រូវ។ បើតាមការរៀបរាប់របស់ប្រជាកសិករ គឺដោយសារតែសត្វខ្យងក្រហមនេះ ពួកគាត់ត្រូវបង្ខំចិត្តប្រើពូជស្រូវច្រើន ដើម្បីកាត់កងជាមួយការបំផ្លាញរបស់សត្វខ្យងចង្រៃនេះ។ ជាលទ្ធផល ពួកគាត់ត្រូវចំណាយកាន់តែច្រើននៅក្នុងដំណាក់កាលដាក់ជីបំប៉ន ហើយនៅតែត្រូវប្រើថ្នាំកម្ចាស់សត្វល្អិតចង្រៃថែមទៀត។
តាមរយៈការស្ដាប់យ៉ាងយកចិត្តទុកដាក់ឯកឧត្តម ងិន ឆាយ បានផ្ដល់អនុសាសន៍ដល់ប្រជាកសិករអំពីបច្ចេកទេសនៃការដាំដុះដំណាំស្រូវប្រកបដោយប្រសិទ្ធភាព ដើម្បីទទួលបានប្រសិទ្ធផលខ្ពស់ ដើម្បីធ្វើយ៉ាងណាកាត់បន្ថយការចំណាយជាអតិបរមា និងទទួលបានមកវិញនូវផលចំណេញច្រើនជាងមុន។ អនុសាសន៍របស់ឯកឧត្តម ងិន ឆាយ គ្របដណ្ដប់តាំងពីការរើសពូជស្រូវ ការប្រើប្រាស់ជី ព្រមទាំងវិធីសាស្ត្រមួយចំនួនសម្រាប់កាត់បន្ថយប្រជាសាស្ត្រខ្យងក្រហមដោយពុំចាំបាច់ប្រើប្រាស់ថ្នាំសម្លាប់សត្វចង្រៃ ដែលប្រសិនបើធ្វើបាន វានឹងជួយកាត់បន្ថយការចំណាយរបស់ប្រជាកសិកររបស់យើងបានមួយកម្រិតដែរ៕
ដោយ៖កែវ កិរិយា
