ជប៉ុនពិចារណាទិញមីស៊ីលពីអាមេរិក ដើម្បីទប់ទល់នឹងការគំរាមកំហែងរបស់ចិននិងកូរ៉េខាងជើង
ជប៉ុន៖ ប្រទេសជប៉ុនកំពុងពិចារណាទិញមីស៊ីលស្វ័យប្រវត្តិ «តូម៉ាហក» (Tomahawk) ដែលផលិតដោយសហរដ្ឋអាមេរិក ដើម្បីទប់ទល់នឹងការគំរាមកំហែងនៅក្នុងតំបន់ដែលកំពុងកើនឡើង ក្នុងនោះរួមមាន ទាំងការគំរាមកំហែងពីកូរ៉េខាងជើងផងដែរ។ នេះបើតាមមន្ត្រីរដ្ឋាភិបាលជប៉ុន និយាយនៅថ្ងៃសុក្រ ទី២៨ តុលា ឆ្នាំ២០២២។
Tomahawks អាចវាយប្រហារគោលដៅពីចម្ងាយច្រើនជាង ១ ០០០ គីឡូម៉ែត្រ។ មីស៊ីលប្រភទនេះ ត្រូវបានដាក់ពង្រាយនៅក្នុងប្រតិបត្តិការយោធារបស់សហរដ្ឋអាមេរិក ដូចជានៅសង្រ្គាមឈូងសមុទ្រពែក្សឆ្នាំ ១៩៩១ និងសង្រ្គាមអ៊ីរ៉ាក់ឆ្នាំ ២០០៣។
មីស៊ីលរយៈចម្ងាយឆ្ងាយនេះ នឹងតំណាងឱ្យការបោះជំហានដ៏ធំមួយក្នុងពង្រឹងសមត្ថភាពរបស់ទីក្រុងតូក្យូក្នុងការរារាំងទប់ស្កាត់គូប្រជែងក្នុងតំបន់ដូចជាចិន និងកូរ៉េខាងជើង។ នាយករដ្ឋមន្ត្រីជប៉ុន លោក ហ្វូមីអូ គីស៊ីដាបាននិយាយថា លោកចង់ធ្វើឱ្យប្រសើរឡើងនូវសមត្ថភាពការពារខ្លួនរបស់ជប៉ុន ជាពិសេសបន្ទាប់ពីកូរ៉េខាងជើងបានបាញ់មីស៊ីលហោះលើប្រទេសជប៉ុនកាលពីដើមខែនេះ ហើយយោធារបស់ចិន បានបង្កើនសកម្មភាពនៅក្បែរប្រទេសជប៉ុន និងកោះតៃវ៉ាន់។
ប៉ុន្តែការទិញមីស៊ីលគឺរឿងចម្រូងចម្រាសមួយនៅក្នុងប្រទេសជប៉ុន ដែលបានប្រកាន់ជំហរស្វ័យការពារជាយូរណាស់មកហើយ ក្រោមរដ្ឋធម្មនុញ្ញក្រោយចាញ់សង្គ្រាមលោកលើកទី២។
មន្ត្រីជាន់ខ្ពស់ក្រសួងការពារជាតិជប៉ុនមួយរូប បានទទួលស្គាល់ថា ប្រទេសជប៉ុនពិតជាកំពុងគិតគូរអំពីការទិញមីស៊ីលពីអាមេរិកមែន ប៉ុន្តែលោកថាទិញបានឬមិនបាននោះ គឺវាអាស្រ័យលើថាតើសហរដ្ឋអាមេរិកនឹងព្រមលក់មីស៊ីលឲ្យជប៉ុនដែរឬអត់?។
ចំណែកអ្នកនាំពាក្យក្រសួងការបរទេសអាមេរិកវិញថា មិនអាចធ្វើអត្ថាធិប្បាយអ្វីលើការលក់ ឬបញ្ជូនអាវុធដែលមានសក្តានុពលទៅឱ្យជប៉ុននោះទេ មុនពេលសំណើនេះត្រូវបានបញ្ជូនជាផ្លូវការទៅកាន់សភាអាមេរិក។
គួរជ្រាបថា ការចំណាយលើវិស័យការពារជាតិរបស់ប្រទេសជប៉ុនបានកើនឡើងស្ទើរតែរៀងរាល់ឆ្នាំក្នុងរយៈពេលមួយទសវត្សរ៍កន្លងមកនេះ។ ជាពិសេស ជប៉ុនបានគិតគូរលើការចំណាយលើវិស័យការពារជាតិកាន់តែខ្លាំង បន្ទាប់ពីការឈ្លានពានរបស់រុស្ស៊ីលើអ៊ុយក្រែន សម្ពាធកាន់តែខ្លាំងឡើងរបស់ចិនលើកោះតៃវ៉ាន់ និងការគំរាមកំហែងកាន់តែខ្លាំងឡើងពីកូរ៉េខាងជើង៕
ដោយ៖ លី លីយ៉ា
