ភ្នំពេញ៖ប៉ូលិសឥណ្ឌាបាននិយាយថា មនុស្សយ៉ាងតិចណាស់ ១៣២ នាក់បានស្លាប់ នៅពេលដែលស្ពានថ្មើរជើងមួយកន្លែង ដែលផ្ទុកទម្ងន់លើសបានបាក់ចូលទៅក្នុងទន្លេ។

អាជ្ញាធរបាននិយាយថា មនុស្សជិត៥០០ នាក់ កំពុងប្រារព្ធពិធីបុណ្យសាសនានៅបរិវេណ ស្ពានយោល ដែលមានអាយុជិត ១៥០ ឆ្នាំនៅទីក្រុង មូប៊ី(Morbi) ។ពេលកំពុងប្រារព្ធពិធីសាសនាខ្សែស្ពានយោលបានដាច់ ហើយអគ្គិសនីបានឆក់មនុស្សនៅទីនោះ។ ស្ពាននោះធ្លាក់ចូលទៅក្នុងទន្លេ ធ្វើឱ្យមនុស្សជាច្រើននាក់ ធ្លាក់ចូលទៅក្នុងទឹក ខណៈដែលអ្នកផ្សេងទៀតបានតោងជាប់នឹងបំណែកបាក់បែកហើយស្រែករកជំនួយ។

សាក្សីម្នាក់ដែលព្យាយាមជួយសង្គ្រោះមនុស្សបាននិយាយថា៖«ខ្ញុំបានឃើញស្ពានបាក់នៅចំពោះមុខខ្ញុំ។វា​ជា​ការ​ឈឺចាប់​ណាស់​នៅ​ពេល​ដែល​ស្ត្រី​ម្នាក់​បង្ហាញ​រូបថត​កូនស្រី​របស់​នាង  ឱ្យ​ខ្ញុំមើលហើយ​បាន​សួរ​ថា ​តើ​ខ្ញុំ​បាន​ជួយ​នាង​ដែរ​ឬ​អត់? ខ្ញុំ​មិន​អាច​ប្រាប់​នាង​បាន​ទេ​ ថា​កូនស្រី​របស់​នាង​បាន​ស្លាប់​»។

សាក្សី​ម្នាក់​ទៀត​ឈ្មោះ Supran បាន​ប្រាប់​ប្រព័ន្ធ​ផ្សព្វផ្សាយ​ក្នុង​ស្រុក​ថា មនុស្សបានកកកុញលើស្ពាននេះមុនពេលស្ពានបាក់។

លោក​បាន​ថ្លែង​ថា​៖ «​ ​ស្ពាន​បាន​ធ្លាក់​ចូលក្នុងទន្លេក្នុងមួយប៉ព្រិចភ្នែក ​ហើយមនុស្ស​ជាច្រើនក៏បាន​ធ្លាក់​ចូល​ទៅ​ក្នុង​ទន្លេ​ ហើយខ្សែភ្លើងក៏ទុស្សេហើយឆក់មនុស្សទៀតផង»។

Ranjanbhai Patel ដែលជាអ្នកស្រុក Morbi ម្នាក់ទៀតបានប្រាប់ប្រព័ន្ធផ្សព្វផ្សាយក្នុងស្រុកអំពីការលំបាកដែលគាត់ក្នុងការជួយសង្គ្រោះមនុស្ស។

លោកបាននិយាយថា ៖«យើងបានទាញមនុស្សដែលអាចហែលចេញពីច្រាំងបាន។ ដោយ​សារមនុស្សភាគច្រើនបានធ្លាក់ចូលទៅក្នុងទន្លេ យើងមិនអាចជួយសង្គ្រោះពួកគេបានទាំងអស់ទេ »។

មន្ត្រីប៉ូលិសជាន់ខ្ពស់លោក Ashok Kumar Yadav ប្រាប់ AFP ថា ចំនួនអ្នកស្លាប់នៅពេលនេះមានដល់ទៅ១៣២នាក់ខណៈ ជនរងគ្រោះភាគច្រើនជាស្ត្រី និងកុមារ។ ប្រភពដដែលបន្ថែមថា មនុស្ស​ប្រហែល ១៥​នាក់​ផ្សេង​ទៀត​កំពុង​សម្រាក​ព្យាបាល​នៅ​មន្ទីរពេទ្យ។

ស្ពានឆ្លងកាត់ទន្លេ Macchchhu ដែលជាកន្លែងទេសចរណ៍ដ៏ពេញនិយមមួយ បានបើកដំណើរការឡើងវិញប៉ុន្មានថ្ងៃមុននេះបន្ទាប់ពីការជួសជុលជាច្រើនខែ។របាយការណ៍​ព័ត៌មាន​បាន​បង្ហាញ​ពី​វីដេអូ​មនុស្ស​កំពុង​ឡើង​លើ​បំណែក​ស្ពាន ឬ​ព្យាយាម​ហែល​ទៅ​កន្លែង​សុវត្ថិភាព។

លោក P Dekavadiya ប្រធានប៉ូលីសនៅទីក្រុង Morbi បានប្រាប់ AFP តាមទូរស័ព្ទថា មនុស្សជាង ១៣០ នាក់ត្រូវបានជួយសង្គ្រោះ។

របាយការណ៍បាននិយាយថា ស្ពានព្យួរនេះមានប្រវែង២៣៣ ម៉ែត្រ និងទទឹង១.៥  ម៉ែត្រ ត្រូវបានសម្ពោធដាក់ឱ្យប្រើប្រាស់នៅឆ្នាំ១៨៨០ដោយអាជ្ញាធរអាណានិគមអង់គ្លេស និងសង់ឡើងដោយប្រើសម្ភារដឹកជញ្ជូនពីប្រទេសអង់គ្លេស។

ទូរទស្សន៍ NDTV បានរាយការណ៍ថា បន្ទាប់បន្ទាប់ពីការជួសជុលរយៈពេលប្រាំពីរខែ រួចមក ស្ពាននេះបានបើកដំណើរការឡើងវិញកាលពីថ្ងៃពុធសប្ដាហ៍មុន បើទោះបីជាមិនមានវិញ្ញា​បនបត្របញ្ជាក់សុវត្ថិភាពក៏ដោយ។ ខ្សែវីដេអូកាលពីថ្ងៃសៅរ៍បានបង្ហាញថា ស្ពាននេះយោលយ៉ាងខ្លាំង។

លោក Yadav បាន​និយាយ​ថា ប៉ូលិស​ស្រុក​បាន​បើក​ការ​ស៊ើប​អង្កេត​ប្រឆាំង​នឹង​អ្នក​ម៉ៅការ សង់ស្ពាននេះ។ រដ្ឋ​បាន​បង្កើត​ក្រុម​ការងារពិសេសមួយ​ដើម្បី​ស៊ើបអង្កេត​សោកនាដកម្ម​នេះ។

អាជ្ញាធរ​បាន​បើក​ប្រតិបត្តិការ​ជួយ​សង្គ្រោះ​ភ្លាមៗ​ ​ដោយ​មាន​ទូក​និង​អ្នក​មុជ​ទឹក​ដាក់​ពង្រាយអ្នកមុជទឹកដើម្បីស្វែងរកអ្នកដែលបាត់ខ្លួន។ក្រុមទាហាន និងនាវិក ឥណ្ឌា ក៏បាន ចូលរួមក្នុងប្រតិបត្តិការជួយសង្គ្រោះផងដែរ។

នាយករដ្ឋមន្ត្រី Narendra Modi ដែលកំពុងធ្វើដំណើរទៅ ស្រុកកំណើតរបស់លោក។លោក បានប្រកាសផ្តល់សំណងដល់អ្នកស្លាប់ និងរបួសក្នុងឧបទ្ទវហេតុនេះ។

ទោះជាយ៉ាងណា ឧបទ្ទវហេតុ​ពី​ហេដ្ឋារចនាសម្ព័ន្ធ​ចាស់ៗ និង​ថែទាំ​មិន​ល្អ រួម​ទាំង​ស្ពាន គឺ​ជា​រឿង​ធម្មតា​ក្នុង​ប្រទេស​ឥណ្ឌា។ ក្នុងឆ្នាំ ២០១៦ ការដួលរលំនៃស្ពានអាកាសទៅលើផ្លូវដ៏មមាញឹកមួយនៅក្នុងទីក្រុង Kolkata បានសម្លាប់មនុស្សយ៉ាងហោចណាស់២៦ នាក់។

ក្នុងឆ្នាំ ២០១១ មនុស្សយ៉ាងតិច ៣២ នាក់បានស្លាប់ នៅពេលដែលស្ពានមួយដែលប្រមូលផ្តុំទៅដោយក្រុមមនុស្សពិធីបុណ្យសាសនាដែរនោះបានដួលរលំនៅភាគឦសាននៃប្រទេសឥណ្ឌា។កាលពីសប្តាហ៍មុន មនុស្សប្រហែល៣០នាក់ត្រូវបានសម្លាប់នៅពេលដែលស្ពានថ្មើរជើងលើទន្លេក្នុងរដ្ឋ Arunachal Pradesh ភាគឦសានបានបាក់៕ ដោយ៖វណ្ណ ស័ក្ដិ