សេអ៊ូល៖សហរដ្ឋអាមេរិក និងកូរ៉េខាងត្បូងបានចាប់ផ្តើមសមយុទ្ធដែនអាកាសរួមគ្នាដ៏ធំបំផុតមួយរបស់ពួកគេនៅថ្ងៃចន្ទ ៣១ ខែតុលា ដោយប្រើយន្តហោះចម្បាំងរាប់រយគ្រឿង ដើម្បីបង្អួតសាច់ដុំនិងត្រៀមទប់ទល់ចំពោះការវាយប្រហារណាមួយពីសំណាក់កូរ៉េខាងជើង។

កងទ័ពអាកាសអាមេរិកបាននិយាយនៅក្នុងសេចក្តីថ្លែងការណ៍មួយ កាលពីសប្តាហ៍មុនថា ប្រតិបត្តិការដែលមានឈ្មោះថា Vigilant Storm នឹងដំណើរការពីថ្ងៃច័ន្ទដល់ថ្ងៃសុក្រសប្ដាហ៍នេះ  ដោយប្រើយន្តហោះចម្បាំងប្រហែល ២៤០គ្រឿង និងគ្រោងធ្វើលំហាត់ប្រតិបត្តិការប្រហែល១.៦០០ ប្រភេទ។

ក្រុង​ព្យុងយ៉ាង​បាន​ថ្កោលទោស​សមយុទ្ធ​រួម​ថា ​ជា​ការ​ហាត់សម​សម្រាប់​ការ​ឈ្លានពាន​និង​ជាភស្តុតាង​ ដែលបង្ហាញពី ​នយោបាយ​អរិភាព​ជាមួយខ្លួន សំណាក់​ក្រុង​វ៉ាស៊ីនតោន​និង​សេអ៊ូល។ ឆ្លើយតបចំពោះសមយុទ្ធនាពេលថ្មីៗនេះ កូរ៉េខាងជើងបានបាញ់មីស៊ីល ធ្វើសមយុទ្ធតាមអាកាស និងបាញ់កាំភ្លើងធំចូលទៅក្នុងសមុទ្រ។

សម្ព័ន្ធមិត្តនិយាយថា ការហ្វឹកហ្វឺនបែបនេះគឺចាំបាច់ដើម្បីទប់ទល់នឹងការគម្រាមកំហែងដ៏មានសក្តានុពលពីប្រទេសកូរ៉េខាងជើង ដែលបានបាញ់បង្ហោះកាំជ្រួចជាច្រើននៅឆ្នាំនេះ ដែលគេសង្ស័យថា កូរ៉េខាងជើងបានត្រៀមលក្ខណៈដើម្បីបន្តការសាកល្បងនុយក្លេអ៊ែរឡើងវិញ ។

សមយុទ្ធVigilant Storm នឹងរួមបញ្ចូលយន្តហោះចម្បាំងបំបាំងកាយ F-35 ពីសហរដ្ឋអាមេរិក និងកូរ៉េខាងត្បូង ក្នុងចំណោមយន្តហោះដទៃទៀត។ អូស្ត្រាលី​ក៏​នឹង​ដាក់​ពង្រាយ​យន្តហោះ​ ចាក់​ប្រេង​តាម​អាកាស​សម្រាប់​សមយុទ្ធ​នេះ​ដែរ។

កងទ័ពអាកាសអាមេរិកបាននិយាយថា ៖«កូរ៉េខាងត្បូង និងកងទ័ពអាកាសអាមេរិកនឹងធ្វើការរួមគ្នាជាមួយនឹងសេវាកម្មរួម ដើម្បីបំពេញបេសកកម្មដែនអាកាសសំខាន់ៗ ដូចជាការគាំទ្រអាកាសកិច្ចការការពារដែនអាកាស និងប្រតិបត្តិការផ្លូវអាកាសសង្គ្រោះបន្ទាន់២៤ ម៉ោងក្នុងមួយថ្ងៃ ក្នុងអំឡុងពេលហ្វឹកហាត់» ។ .

កាលពីថ្ងៃសុក្រ កងទ័ពកូរ៉េខាងត្បូងបានបញ្ចប់លំហាត់ហ្វឹកហ្វឺន Hoguk 22 រយៈពេល 12 ថ្ងៃ ដែលបង្ហាញពីការចុះចតបែបស្មុគ្រស្មាញ និងការឆ្លងកាត់ទន្លេ រួមទាំងសមយុទ្ធមួយចំនួនជាមួយកងកម្លាំងសហរដ្ឋអាមេរិកផងដែរ៕ ដោយ៖វណ្ណ ស័ក្ដិ