បៃដិនចោទក្រុមហ៊ុនប្រេងថាកេងចំណេញពីសង្រ្គាមនៅអ៊ុយក្រែនហើយគំរាមយកពន្ធឱ្យច្រើន
អាមេរិក៖ប្រធានាធិបតីអាមេរិក លោក ចូ បៃដិន កាលពីថ្ងៃចន្ទទី ៣១ ខែតុលា បានគំរាមយកពន្ធខ្ពស់លើប្រាក់ចំណេញថ្មីពីក្រុមហ៊ុនប្រេងនិងហ្គាសធំៗ លុះត្រាតែពួកគេបង្កើនផលិតកម្មដើម្បីទប់ស្កាត់ការហក់ឡើងនៃតម្លៃប្រេងដែលសំខាន់ខ្លាំងសម្រាប់រដ្ឋបាលបៃដិនមុនពេលការបោះឆ្នោតពាក់កណ្ដាលអាណត្តិប្រព្រឹត្តទៅនៅសប្ដាហ៍ក្រោយ។
លោកប្រធានាធិបតី បានរិះគន់ក្រុមហ៊ុនយក្ស ខណៈក្រុមហ៊ុនមួយចំនួនក្នុងចំណោមក្រុមហ៊ុនទាំងនោះបានរាយការណ៍ពីការកើនឡើងនៃប្រាក់ចំណេញចុងក្រោយបំផុត ដែលលោកបានហៅថាជាក្រុមហ៊ុនដ៏គួរឲ្យសង្វេគដែលកេងប្រវ័ញ្ចពី សង្គ្រាមរបស់រុស្ស៊ីលើអ៊ុយក្រែន។ លោកបានព្រមានពួកគេឲ្យប្រើប្រាស់ប្រាក់នេះដើម្បីពង្រីកការផ្គត់ផ្គង់ប្រេងឬប្រគល់វាឲ្យអ្នកប្រើប្រាស់វិញក្នុងទម្រង់នៃការកាត់បន្ថយតម្លៃប្រេង។
មិនត្រឹមតែប៉ុណ្ណេះ ខណៈដែលក្រុមហ៊ុនថាមពលយក្សមួយចំនួនរាយការណ៍ពីកំណើននៃប្រាក់ចំណូល លោក បៃដិន បានចោទប្រកាន់ថាទាំងនោះ ថាកេងយកផលប្រយោជន៍ពីសង្រ្គាមឈ្លានពានអ៊ុយក្រែនរបស់រុស្ស៊ី។ លោកព្រមានឱ្យក្រុមហ៊ុនប្រើប្រាស់ប្រាក់ចំណេញដើម្បីពង្រីកផលិតកម្មប្រេង ឬបន្ថយតម្លៃប្រេងនៅតាមស្ថានីយ៍ចាក់សាំង ឬហ្គាស។
លោក បៃដិន ថា៖ «ប្រសិនបើពួកគេ (បណ្ដាក្រុមហ៊ុន) មិនធ្វើទេ ពួកគេនឹងបង់ពន្ធខ្ពស់លើប្រាក់ចំណេញលើស ហើយប្រឈមមុខនឹងការរឹតបន្តឹងផ្សេងទៀត»។ លោកបន្តថា៖ «ក្រុមការងាររបស់ខ្ញុំ នឹងធ្វើការជាមួយសភា ដើម្បីពិនិត្យមើលជម្រើសទាំងនេះដែលមានសម្រាប់យើង និងអ្នកដទៃ។ វាដល់ពេលហើយ សម្រាប់ក្រុមហ៊ុនទាំងនេះ បញ្ឈប់ការកេងចំណេញពីសង្គ្រាម បំពេញទំនួលខុសត្រូវរបស់ខ្លួនចំពោះប្រទេស ឱ្យប្រជាជនអាមេរិកបានស្រួល ហើយនៅតែបំពេញតួនាទីយ៉ាងល្អ»។
គេមើលឃើញថា ការដាក់បន្ទុកថ្មីរបស់លោក បៃដិន ទៅលើឧស្សាហកម្មថាមពល បានធ្វើឱ្យអ្នកសេរីនិយមនៅក្នុងគណបក្សរបស់លោកដែលជំរុញឱ្យលោកចាត់វិធានការជាច្រើនខែមកហើយនោះ មានការពេញចិត្ត។ប៉ុន្តែវាមានវិធីជាច្រើនផ្សេងទៀតដើម្បីដាក់សម្ពាធលើក្រុមហ៊ុនប្រេងជាជាងបញ្ជាគោលនយោបាយជាក់ស្តែងសម្រាប់រយៈពេលខ្លី ខណៈភាពស្រពិចស្រពិលនឹងមានកាន់តែខ្លាំងនៅក្នុងសភាអាមេរិក ប្រសិនបើគណបក្សសារធារណៈរដ្ឋឈ្នះការបោះឆ្នោតពាក់កណ្ដាលអាណត្តិ។
នាពេលកន្លងមក លោក បៃដិន បានខ្នះខ្នែងយ៉ាងខ្លាំង ក្នុងការបង្វែរការខឹងសម្បារជាសាធារណៈដោយសារតែតម្លៃប្រេងខ្ពស់ ឱ្យដាក់បន្ទុកលើឧស្សាហកម្មប្រេងដែលមិនព្រមធ្វើការអំពាវនាវរបស់លោក ឱ្យបង្កើនផលិតកម្មបូមប្រេង។ ទោះបីជាតម្លៃប្រេងនៅស្ថានីយចាក់សាំង បានធ្លាក់ចុះយ៉ាងខ្លាំងពីជាង ៥ ដុល្លារនៅរដូវក្ដៅមកត្រឹមជាង ៣ ដុល្លារ នាពេលនេះក្ដី វានៅតែខ្ពស់ជាងពេលលោក បៃដិន ចូលកាន់តំណែង ហើយតម្លៃខ្ពស់នេះហើយដែលរួមចំណែកលើអត្រាអតិផរណាខ្ពស់នៅអាមេរិក មិនធ្លាប់មានជិត៤ទសវត្សរ៍។
ខណៈលោក បៃដិន ព្រមានលើក្រុមហ៊ុនប្រេង គណបក្សសាធារណរដ្ឋបានធ្វើការវាយប្រហារ ដោយលើកឡើងថា គោលនយោបាយរបស់លោក បៃដិន បំបាក់ទឹកចិត្តឧស្សាហកម្មថាមពល ពីការពង្រីកសមត្ថភាពរបស់ពួកគេ។
សភាតំណាងរដ្ឋតិចសាស់ និងជាមន្រ្តីកំពូលបក្សសាធារណរដ្ឋនៅគណៈកម្មាធិការវិធី និងមធ្យោបាយសភា លោក Kevin Brady បានថ្លែងថា៖ «តើក្រុមគ្រួសារជនជាតិអាមេរិក មិនទាន់រងទុក្ខគ្រប់ពីការវាយប្រហារបំផ្លាញថាមពលរបស់ប្រធានាធិបតីអាមេរិក លោក បៃដិន ទេឬ?»។ លោក បន្តថា៖ «ដោយសារតែត្រដាបត្រដួសក្នុងការបោះឆ្នោតពាក់កណ្តាលអាណត្តិ ឥឡូវនេះលោក (បៃដិន) កំពុងស្នើសុំគោលនយោបាយដ៏គ្រោះថ្នាក់មួយទៀត ដែលនឹងបង្កើនតម្លៃថាមពល និងភាពក្រីក្រដោយសារថាមពល ខណៈធ្វើឱ្យអាមេរិកកាន់តែងាយរងគ្រោះចំពោះបរទេស សម្រាប់តម្រូវការថាមពលប្រចាំថ្ងៃរបស់យើង»។
បន្ថែមពីលើនេះ ក្រុមអ្នកខាងឧស្សាហកម្មប្រេង បានចោទប្រកាន់លោក បៃដិន ថាយកបញ្ហាប្រេងធ្វើនយោបាយ ទោះបីជាតម្លៃប្រេងបានធ្លាក់ចុះ ១/៤ ពីចំណុចខ្ពស់បំផុតរួចហើយក្ដី។ ប្រធានវិទ្យាស្ថានប្រេងអាមេរិក ដែលជាក្រុមពាណិជ្ជកម្ម លោក Mike Sommers បានថ្លែងថា៖ «ជាជាងយកមុខមាត់លើការធ្លាក់ចុះតម្លៃ ហើយផ្លាស់ប្តូរការស្តីបន្ទោសចំពោះការកើនឡើងតម្លៃ រដ្ឋបាលបៃដិន គួរតែយកចិត្តទុកដាក់ចំពោះបញ្ហាអតុល្យភាពនៃការផ្គត់ផ្គង់ និងតម្រូវការ ដែលបង្កឱ្យតម្លៃប្រេងឡើងខ្ពស់ និងបង្កើតបញ្ហាប្រឈមថាមពលរយៈពេលវែង»។
គួរកត់សម្គាល់ផងដែរថា ការព្រមាននៅថ្ងៃចន្ទរបស់លោក បៃដិន បានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីបណ្ដាក្រុមហ៊ុនប្រេងយក្សក្នុងស្រុកអាមេរិក ចេញរបាយការណ៍អំពីប្រាក់ចំណេញរយៈពេល៣ខែរបស់ខ្លួន។ ក្រុមហ៊ុន Exxon Mobil រកប្រាក់ចំណេញជិត ២០ ប៊ីលានដុល្លារសម្រាប់ត្រីមាសទី៣ នៃឆ្នាំនេះ ដែលខ្ពស់ជាងត្រីមាសមុនរហូតដល់ ១០ ភាគរយ។ ចំណែកក្រុមហ៊ុន Chevron វិញ រកប្រាក់ចំណេញចំនួន ១១,២ ប៊ីលានដុល្លារ ខណៈក្រុមហ៊ុន Shell និង Total Energies ដែលមានប្រភពពីអឺរ៉ុប រាយការណ៍ពីប្រាក់ចំណូលស្រដៀងគ្នាថា ប្រាក់ចំណេញបានកើនឡើងទ្វេដងធៀបនឹងរយៈពេលដូចគ្នាកាលពីឆ្នាំមុន។
ក្រុមហ៊ុនប្រេងធំជាងគេទាំង៥នៅអាមេរិក រកបានប្រាក់ចំណេញជាង ៥០ ប៊ីលានដុល្លារក្នុងត្រីមាសទី២ ហើយទីភ្នាក់ងារថាមពលអន្តរជាតិបានរាយការណ៍ថា ប្រាក់ចំណូលសុទ្ធសរុបក្រុមហ៊ុនអ្នកផលិតប្រេង និងហ្គាសរបស់ពិភពលោក នឹងកើនឡើងទ្វេដងនៅឆ្នាំនេះ បើប្រៀបធៀបនឹងឆ្នាំមុន រហូតដល់ ៤ ទ្រីលានដុល្លារ។
ចំណែកមន្ត្រីសេតវិមានអាមេរិកវិញ បានអះអាងថា ក្រុមហ៊ុនធំៗជាងពាក់កណ្តាល ទទួលបានប្រាក់ចំណេញក្នុងរយៈពេល៦ខែកន្លងមកនេះ ច្រើនជាងប្រាក់ចំណេញដែលគេទទួលបានកាលពីឆ្នាំមុនទាំងមូល និងច្រើនជាង២ដងកន្លះ នៃប្រាក់ចំណេញដែលពួកគេទទួលបាននៅក្នុងត្រីមាសដូចគ្នានៃឆ្នាំ ២០២១។ លោក បៃដិន ថ្លែងថា ប្រសិនបើឧស្សាហកម្មប្រេងគ្រាន់តែរកប្រាក់ចំណេញ ក្នុងកម្រិតដូចគ្នាដែលខ្លួនមានរកបានក្នុងរយៈពេល ២០ ឆ្នាំមកនេះ នោះអ្នកប្រើប្រាស់នឹងចំណាយតិចជាង ៥០ សេនលើប្រេងមួយហ្គាឡុង។
គួរបញ្ជាក់ថា តម្លៃប្រេងនៅអាមេរិកនាពេលបច្ចុប្បន្នជាមធ្យមគឺ ៣,៧៦ ដុល្លារ/ហ្គាឡុង ពោលគឺតិចជាង ១,២៥ ដុល្លារ បើប្រៀបធៀបទៅនឹងតម្លៃកំពូលនៃខែមិថុនា ប៉ុន្តែវានៅតែលើសពីតម្លៃ ២,៣៩ ដុល្លារ/ហ្គាឡុង នៅពេលលោក បៃដិន ចូលកាន់ដំណែង។ នេះបើតាមការស្រង់ទិន្នន័យរបស់កាសែតញូវយកថែមស៍ ពីសមាគមរថយន្តអាមេរិក (AAA) ដែលវិភាគលើតម្លៃប្រេង។
បញ្ហាប្រឈមលើតម្លៃប្រេងសម្រាប់លោក បៃដិន ក៏កាន់តែតានតឹងផងដែរ បន្ទាប់ពីអង្គការសម្ព័ន្ធភាពនៃប្រទេសនាំចេញប្រេងអូប៉ិច ប្រកាសកាត់បន្ថយផលិតកម្មប្រេងឱ្យនៅត្រឹម ២លានបារ៉ែលក្នុងមួយថ្ងៃ ដែលធ្វើឱ្យមានការព្រមានពីការហក់ឡើងជាថ្មីនៃតម្លៃប្រេងពិភពលោករួមទាំងសហរដ្ឋអាមេរិក។ នាយកប្រតិបត្តិឧស្សាហកម្មខ្លះ បានអះអាងថា សំណើពីការតម្លើងពន្ធនៅថ្ងៃចន្ទរបស់លោក បៃដិននឹងមិនបង្កើនការផ្គត់ផ្គង់ទេ។ ប្រធានក្រុមហ៊ុនប្រេងអាមេរិក Montalban Oil and Gas លោក Patrick Montalban ប្រាប់កាសែតញូវយ៉កថែមស៍ថា៖ «វាជាគំនិតដ៏អាក្រក់មួយ ហើយការគិតមិនវែងឆ្ងាយ។ វា(ការបន្ថែមពន្ធ)នឹងធ្វើឱ្យក្រុមហ៊ុននានាដកខ្លួនចេញពីការរុករក និងផលិតប្រេង និងហ្គាសក្នុងស្រុក។ សរុបទៅ វាជារឿងនយោបាយ»។
យ៉ាងណាក៏ដោយ សមាជិកបក្សប្រជាធិបតេយ្យរបស់លោក បៃដិន បានសាទរចំពោះការស្នើរបស់លោក។ សមាជិកព្រឹទ្ធសភានៃរដ្ឋ Rhode Island លោក Sheldon Whitehouse បានថ្លែងថា៖ «វាដល់ពេលហើយ សម្រាប់សភាក្រោកឈរឡើងចំពោះក្រុមហ៊ុនប្រេងធំ ហើយនាំមកនូវភាពធូរស្បើយសម្រាប់អ្នកប្រើប្រាស់»។ យ៉ាងណាមិញ ក៏មានពួកសេរីនិយមខ្លះបង្ហាញពីការមិនពេញចិត្ត ដោយហេតុថា ការបង្កើនផលិតកម្មប្រេង ធ្វើឱ្យអាមេរិកកាន់តែពឹងផ្អែកលើឥន្ធនៈហ្វូស៊ីល ហើយមិនអាចសម្រេចបាននូវការប្ដេជ្ញាចិត្តអាកាសធាតុ៕
ដោយ៖ហួន ឌីណា
ប្រភព៖ Biden Accuses Oil Companies of ‘War Profiteering’ and Threatens Windfall Tax www.nytimes.com
Biden suggests extra tax on energy giants if they don’t reduce gas prices www.washingtonpost.com
Biden issues a warning as he accuses oil and gas companies of ‘war profiteering’ off Russia’s invasion of Ukraine edition.cnn.com
