អ្នកប្រើប្រាស់បណ្ដាញសង្គម Instagram រាយការណ៍អំពីការកើនឡើងនៃករណីផ្អាកគណនីរបស់ខ្លួន
អន្តរជាតិ៖អ្នកប្រើប្រាស់បណ្ដាញសង្គម Instagram ជាច្រើនមិនអាចចូលទៅកាន់គណនីរបស់ពួកគេបានទេ នៅព្រឹកថ្ងៃចន្ទ ទី៣១ ខែតុលាម្សិលមិញ ដោយបានទទួលការជូនដំណឹងពីក្រុមហ៊ុន Instagram ថា គណនីរបស់ពួកគេត្រូវបានផ្អាកលែងឱ្យដំណើរការ ដោយសារតែគណនីនោះបានបំពានគោលការណ៍ណែនាំសហគមន៍របស់ Instagram។
Instagram គឺជាបណ្ដាញសង្គមមួយ ដែលស្ថិតនៅក្រោមបុត្រសម្ព័ន្ធរបស់ក្រុមហ៊ុន Meta ដែលផ្ដោតសំខាន់ទៅលើការបង្ហោះរូបភាពនិងវីដេអូ និងអនុញ្ញាតឱ្យមានការឆ្លើយឆ្លងគ្នាតាមរយៈសារជាសំណេរនិងសារជាសំឡេងផងដែរ។ បន្ថែមពីលើនោះ Instagram ទើបតែបានបន្ថែមមុខងារទូរសព្ទជាសំឡេង និងវីដេអូ ទៅដល់គណនីរបស់អ្នកប្រើប្រាស់ ដែលមានចំនួនជិត១ពាន់៥រយប៊ីលានគណនី នៅទូទាំងពិភពលោក។
ជាការកត់សម្គាល់ ប៉ុន្មានម៉ោងបន្ទាប់ពីកើតបញ្ហានេះ អ្នកប្រើប្រាស់ដែលជួបបញ្ហាមួយចំនួន អាចចូលទៅកាន់គណនីរបស់ពួកគេឡើងវិញបាន ហើយក្រុមហ៊ុន Meta ដែលជាក្រុមហ៊ុនមេគ្រប់គ្រងបណ្ដាញសង្គម Instagram បានជូនដំណឹងនៅល្ងាចថ្ងៃចន្ទដដែលនោះថា ដំណើរការរបស់បណ្ដាញសង្គមរបស់ខ្លួន បានវិលត្រឡប់មកសភាពធម្មតាវិញហើយ បន្ទាប់ពីបញ្ហាទាំងអស់ត្រូវបានដោះស្រាយរួចរាល់។
នៅក្នុងសេចក្តីថ្លែងការណ៍របស់ខ្លួន ក្រុមហ៊ុន Meta បានគូសបញ្ជាក់ថា៖ «កាលពីព្រឹកថ្ងៃចន្ទនេះ បណ្ដាញសង្គម Instagram មានបញ្ហាបច្ចេកទេសខ្លះ ដែលបានបណ្តាលឱ្យអ្នកប្រើប្រាស់មួយចំនួន មិនអាចចូលប្រើគណនី Instagram របស់ពួកគេបាន។ គណនីមួយចំនួនតូច បាត់បង់ជាបណ្ដោះអាសន្ននូវចំនួនមនុស្សតាមដានពួកគេ។ យើងបានដោះស្រាយបញ្ហានេះឱ្យបានលឿនតាមដែលអាចធ្វើទៅបានសម្រាប់អ្នករាល់គ្នាដែលរងផលប៉ះពាល់ ហើយយើងសូមអភ័យទោសចំពោះការរអាក់រអួលនេះ»។
ជាការកត់សម្គាល់ ភាពរអាក់រអួលនៃប្រព័ន្ធបណ្ដាញសង្គមបែបនេះ ជាធម្មតា មិនអូសបន្លាយយូរទេ។ កាលពីខែមុន នៅពេលបណ្ដាញសង្គម Instagram ជួបភាពរអាក់រអួលដោយសារតែការដាច់ភ្លើង ក្រុមហ៊ុនបានដោះស្រាយបញ្ហានេះនៅក្នុងរយៈពេលតែមួយម៉ោងប៉ុណ្ណោះ៕
ដោយ៖កែវ កិរិយា
