ទូតបារាំងបង្ហាញឆន្ទៈធ្វើកិច្ចសហការជាមួយកម្ពុជា ក្នុងការប្រយុទ្ធប្រឆាំងបទល្មើសជួញដូរមនុស្សនៅខេត្តព្រះសីហនុ
ភ្នំពេញ៖ឯកអគ្គរដ្ឋទូតបារាំងប្រចាំកម្ពុជាបានបង្ហាញឆន្ទៈចូលរួមធ្វើកិច្ចសហប្រតិបត្តិការ ប្រយុទ្ធប្រឆាំង និងបង្ក្រាបបទល្មើសជួញដូរមនុស្សនៅក្នុងខេត្តព្រះសីហនុឱ្យទទួលបាន ជោគជ័យនិងប្រសិទ្ធិភាពខ្ពស់ ខណៈករណីនេះរាជរដ្ឋាភិបាលកម្ពុជាកំពុងចាត់វិធានការក្ដៅគគុក ។
ការបង្ហាញឆន្ទៈនេះ របស់លោក ហ្សាក់កេស ប៉េឡែត(Jacques PELLET) ឯកអគ្គរដ្ឋទូតសាធារណរដ្ឋបារាំងប្រចាំព្រះរាជាណាចក្រកម្ពុជានេះធ្វើឡើងក្នុងជំនួបពិភាក្សាការងារជាមួយ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃកាលពីថ្ងៃទី ១ ខែវិច្ឆិកា ឆ្នាំ ២០២២ នៅវិមានរដ្ឋសភា ។លោក PELLET ថ្លែងថា ចំពោះប្រធានបទ ស្ដីអំពីកិច្ចខិតខំប្រឹងប្រែងរបស់អាជ្ញាធរមានសមត្ថកិច្ចកម្ពុជា លើការងារប្រយុទ្ធប្រឆាំង និងបង្ក្រាបបទល្មើសជួញដូរមនុស្ស ជាពិសេស កិច្ចប្រតិបត្តិការក្នុងរយៈពេលចុងក្រោយនៅខេត្តព្រះសីហនុ នេះ ក៏អាចជាប្រធានបទ មួយដែលភាគីទាំងពីរអាចកំណត់នៅក្នុងក្របខណ្ឌនៃការបង្កើតកិច្ចសហប្រតិបត្តិការជាមួយគ្នាក្នុងការបង្ការនិងប្រយុទ្ធប្រឆាំងនឹងបទល្មើសទាំងនេះបានដែរ។
ករណីខាងលើនេះ លោក Jacques PELLET ក៏ចង់ស្វែងយល់នូវវឌ្ឍនភាព ដែលអាជ្ញាធរកម្ពុជាបាននិងកំពុងអនុវត្តលើការងារនេះឱ្យបានស៊ីជម្រៅផងដែរ ។
ជាការឆ្លើយតបសម្ដេចក្រឡាហោម ស ខេង ថ្លែងថា រហូតមកដល់ពេលនេះ អាជ្ញាធរកម្ពុជាបាននិងកំពុងអនុវត្តកិច្ចការនេះយ៉ាងសកម្ម ហើយរាជរដ្ឋាភិបាលកម្ពុជា ក៏មានការប្ដេជ្ញា ចិត្តខ្ពស់ក្នុងការប្រយុទ្ធប្រឆាំងអំពើជួញដូរមនុស្សគ្រប់ទម្រង់ដែរ។
លោកថា តាមរយៈលទ្ធផលអនុវត្តកន្លងមក គឺទទួលការសាទរពីមជ្ឈដ្ឋានផ្ទៃក្នុង និងបណ្ដាប្រទេសជាមិត្តក្នុងតំបន់។ លោកបន្ថែមថា៖« កិច្ចការនេះ ទាមទារឱ្យមាន កិច្ចសហប្រតិបត្តិការជិតស្និតរវាងបណ្ដាភាគីពាក់ព័ន្ធទាំងអស់ទាំងក្នុងប្រទេសមានជនរងគ្រោះត្រូវបានគេឆបោកមកកាន់កម្ពុជានិងទាំងក្នុងប្រទេសកម្ពុជាដើម្បីកាត់ផ្ដាច់ទំនាក់ទំនង និងឬសគល់នៃការរត់ពន្ធ ការជួញដូរ និងការឆបោកនាំមនុស្សឆ្លងដែនខុសច្បាប់»។
អភិបាលខេត្តព្រះសីហនុឯកឧត្តម គួច ចំរើន ថ្លែងថា ខេត្តព្រះសីហនុមានការជួញដូរមនុស្ស ជួញដូរកម្លាំងពលកម្ម និងពលករបរទេសខុសច្បាប់ នៅ ពេលដែលកម្ពុជាមានសន្តិសុខពេញលេញ មានការអភិវឌ្ឍរីកចម្រើន។លោកបន្តថា ៖«ពួកឧក្រិដ្ឋជនឆ្លៀត ឱកាសចូលមកធ្វើការដោយខុសច្បាប់ ដើម្បីទាញយកផលចំណេញប៉ះពាល់ (ស្តីពីសេរីភាព) ហើយយើងក៏បានបើកយុទ្ធនាការបង្ក្រាបតាមផ្លូវច្បាប់របស់កម្ពុជា និងច្បាប់អន្តោប្រវេសន្ត»។
លោកអះអាងថា អាជ្ញាធរបានបញ្ជូនជនសង្ស័យចំនួន ៦០នាក់ ផ្តន្ទាទោសតាមផ្លូវច្បាប់ និងបញ្ជូនជនអន្តោប្រវេសន្តជាង ១ ០០០នាក់ទៅប្រទេសវិញ មាន ១២សញ្ជាតិបន្ទាប់ពីប្រតិបត្តិការបង្ក្រាបការជួញដូរមនុស្សនៅឆ្នាំនេះ៕
ដោយ៖យុទ្ធ វីរៈ
