ចូបៃដិន ថាការបោះឆ្នោតពាក់កណ្ដាលអាណត្តិជាពេលកំណត់ប្រជាធិបតេយ្យអាមេរិក
អាមេរិក៖ប្រធានាធិបតីសហរដ្ឋអាមេរិកលោក ចូ បៃដិន បានថ្លែងកាលពីថ្ងៃពុធទី២ ខែវិច្ឆិកា នេះថា ការបោះឆ្នោតពាក់កណ្តាលអាណត្តិ គឺជាពេលវេលាកំណត់សម្រាប់លទ្ធិប្រជាធិបតេយ្យរបស់អាមេរិក ខណៈដែលការគំរាមកំហែងនៃអំពើហិង្សាផ្នែកនយោបាយ និងការបំភិតបំភ័យអ្នកបោះឆ្នោត បានកើតមានឡើងជុំវិញការបោះឆ្នោតដែលនឹងប្រព្រឹត្តទៅនៅសប្ដាហ៍ក្រោយ។
ក្នុងពេលជាមួយគ្នានោះ លោក បៃដិន បានហៅអ្នកដែលប្រឆាំងនឹងលទ្ធផលបោះឆ្នោតកាលពីឆ្នាំ ២០២០ ថាជាការគំរាមកំហែងចំពោះលទ្ធិប្រជាធិបតេយ្យ ដោយភ្ជាប់ការបះបោរនៅវិមានកូពីតូលថ្ងៃទី ០៦ ខែមករា ទៅនឹងការវាយប្រហារកាលពីសប្តាហ៍មុន ទៅលើលោក ប៉ូល ប៉េឡូស៊ី ដែលជាប្ដីរបស់លោកស្រីប្រធានសភា ណាន់ស៊ី ប៉េឡូស៊ី។
លោកប្រធានាធិបតី បៃដិន ថ្លែងយ៉ាងដូច្នេះថា៖ «យើងត្រូវតែឈរជាមួយនឹងសំឡេងដ៏លើសលប់ប្រឆាំងនឹងអំពើហិង្សាផ្នែកនយោបាយ និងការបំភិតបំភ័យអ្នកបោះឆ្នោត។ សូមក្រោកឈរឡើង ហើយនិយាយប្រឆាំងនឹងបញ្ហានេះ»។ លោកបន្តថា៖ «យើងមិនដោះស្រាយភាពខុសគ្នារបស់យើងនៅអាមេរិកជាមួយនឹងការប្រមូលផ្ដុំហ្វូងមនុស្ស ឬការប្រើគ្រាប់កាំភ្លើង ឬញញួរនោះទេ។ យើងដោះស្រាយដោយសន្តិវិធីនៅប្រអប់ឆ្នោត។ យើងត្រូវតែស្មោះត្រង់ជាមួយខ្លួនយើង។ យើងត្រូវប្រឈមមុខនឹងបញ្ហានេះ ហើយមិនអាចងាកចេញពីវាបានទេ។ យើងមិនអាចធ្វើពុតថា ថាវានឹងដោះស្រាយដោយឯងៗបាននោះទេ»។
គួរបញ្ជាក់ថាសុន្ទរកថារបស់លោក បៃដិន លើកនេះ គឺជាការបន្ទបន្ថែមពីលើអ្វីដែលលោកបានព្រមាននាពេលកន្លងមក អំពីការគំរាមកំហែងដែលបង្កឡើងដោយអ្នកដែលផ្សព្វផ្សាយព័ត៌មានមិនពិតអំពីសុពលភាពនៃការបោះឆ្នោតឆ្នាំ២០២០និងអំណះអំណាងរបស់លោកដែលថាអ្នកគាំទ្រគណបក្សសាធារណរដ្ឋជាច្រើនរបស់អតីតប្រធានាធិបតី ដូណាក់ ត្រាំ កំពុងលើកជំរុញ ភាពជ្រុលនិយម។
លោក បៃដិន ថ្លែងយ៉ាងដូច្នេះទៀតថា៖ «យើងកំពុងប្រឈមមុខនឹងពេលវេលាកំណត់ យើងត្រូវតែប្រើសំឡេងបង្រួបបង្រួមដ៏លើសលប់មួយ ក្នុងនាមជាប្រទេសមួយ ហើយនិយាយប្រឆាំងនឹងការបំភិតបំភ័យអ្នកបោះឆ្នោត ឬអំពើហិង្សានយោបាយនៅអាមេរិក មិនថាវាសំដៅទៅលើគណបក្សប្រជាធិបតេយ្យ ឬគណបក្សសាធារណរដ្ឋនោះទេ»។
ទោះបីជាយ៉ាងណាក៏ដោយ លោកស្រី Taylor Budowich អ្នកនាំពាក្យរបស់លោក ត្រាំ បានប្រតិកម្មនឹងការលើកឡើងបែបនេះ ដោយអះអាងថា៖ «គោលនយោបាយរបស់ លោក បៃដិន កំពុងបំផ្លាញអាមេរិក ហើយសកម្មភាពរបស់លោក កំពុងធ្វើឱ្យប្រទេសរបស់យើងបែកបាក់គ្នាជាងអ្វីដែលយើងធ្លាប់មាន»។
យ៉ាងណាមិញ លោក បៃដិន ដែលថាការបោះឆ្នោតពាក់កណ្ដាលអាណត្តិមានសារៈសំខាន់ ក្នុងការរក្សាតម្លៃលទ្ធិប្រជាធិបតេយ្យរបស់ប្រទេសក្នុងរយៈពេលវែង នោះ បានថ្លែងថា៖ «លទ្ធិប្រជាធិបតេយ្យអាមេរិក កំពុងរងការវាយប្រហារ ដោយសារតែអតីតប្រធានាធិបតីអាមេរិក ដែលចាញ់ឆ្នោត បានបដិសេធមិនទទួលយកលទ្ធផលនៃការបោះឆ្នោតឆ្នាំ ២០២០ ដែលស្មើនឹងការបដិសេធមិនទទួលយកឆន្ទៈរបស់ប្រជាជន។ លោក(ត្រាំ)បដិសេធមិនទទួលយកការពិតដែលលោកចាញ់ ដោយដាក់ភក្ដីភាពចំពោះខ្លួនឯងមុនរដ្ឋធម្មនុញ្ញ»។
ឆ្លើយតបនឹងការលើកឡើងបែបនេះ មន្រ្តីបក្សសារធារណរដ្ឋបានលើកឡើងថា លោក បៃដិន កំពុងត្រដាបដ្រដួលក្នុងការផ្លាស់ប្ដូរការចាប់អារម្មណ៍ពីអតិផរណា ឧក្រិដ្ឋកម្ម និងព្រំដែនបើកចំហ ហើយឥឡូវនេះ អះអាងថា លទ្ធិប្រជាធិបតេយ្យដំណើរការបាន លុះត្រាតែគណបក្សរបស់ខ្លួនឯងឈ្នះ៕
ដោយ៖ហួន ឌីណា
