ប្រទេសប្រេស៊ីលឈានទៅនាំចេញកសិផលពោតទៅកាន់ទីផ្សារប្រទេសចិន ក្រោយការអនុម័តរបស់រដ្ឋបាលគយចិន
ប្រេស៊ីល៖កាលពីថ្ងៃពុធ ទី០២ ខែវិច្ឆិកា ឆ្នាំ២០២២ រដ្ឋបាលគយចិនបានធ្វើបច្ចុប្បន្នភាពបញ្ជីឈ្មោះក្រុមហ៊ុនប្រេស៊ីល ដែលទទួលបានការអនុញ្ញាតឱ្យនាំកសិផលពោតទៅកាន់ទីផ្សារប្រទេសចិន។ សម្រាប់មន្ដ្រីកសិកម្មប្រេស៊ីល តាមរយៈការអនុម័តនេះ ប្រេស៊ីលសង្ឃឹមថា នឹងអាចជំរុញការនាំចេញពោតរបស់ខ្លួន ខណៈប្រទេសចិនគឺជាប្រទេសដែលជាប្រទេសដែលមានកិច្ចធំជាងគេលំដាប់ទី២នៅលើពិភពលោក។
ការជ្រៀតចូលនៃកសិផលពោតទៅក្នុងទីផ្សារប្រទេសចិន ទំនងជានឹងធ្វើឱ្យមានការផ្លាស់ប្ដូរលំហូរពាណិជ្ជកម្មសកល ជាពិសេស វាអាចទាញទម្លាក់ការលក់ពោតរបស់អាមេរិក។ អាមេរិកដែលជាអ្នកផ្គត់ផ្គង់កសិផលពោតធំជាងគេសម្រាប់ទីផ្សារពិភពលោក។ កន្លងមក ប្រទេសចិនពឹងផ្អែកលើសហរដ្ឋអាមេរិកនិងអ៊ុយក្រែនសម្រាប់ការផ្គត់ផ្គង់ពោតភាគច្រើនរបស់ខ្លួន ប៉ុន្តែការនាំចេញពោតពីអ៊ុយក្រែនមកកាន់ប្រទេសចិនត្រូវបានរំខាន ចាប់តាំងពីអ៊ុយក្រែនរងការឈ្លានពានពីរុស្ស៊ីមក។
មន្ដ្រីកសិកម្មទទួលបន្ទុកផ្នែកកសិផលបន្លែនៃក្រសួងកសិកម្មប្រេស៊ីល លោក Glauco Bertoldo ថ្លែងថា វាគឺជារឿងដ៏ល្អមួយសម្រាប់ប្រទេសប្រេស៊ីល ដែលមានទីផ្សារនាំចេញកសិផលកាន់តែច្រើនឡើង។ លោកបន្តថា សព្វថ្ងៃនេះ រដ្ឋបាលគយចិនបានអនុញ្ញាតឱ្យក្រុមហ៊ុនប្រេស៊ីលចំនួន១៣៦ក្រុមហ៊ុន នាំចេញពោតទៅកាន់ទីផ្សារប្រទេសចិន។ និងថា ចំនួននេះអាចនឹងកើនឡើងបន្ថែមទៀតនាសប្ដាហ៍ក្រោយៗ។
បើតាមគម្រោង ការនាំចេញពោតរបស់ប្រេស៊ីលទៅកាន់ទីផ្សារប្រទេសចិនអាចនឹងចាប់ផ្តើមក្នុងពេលឆាប់ៗនេះ ប៉ុន្តែក្នុងទ្រង់ទ្រាយតូចប៉ុណ្ណោះ ខណៈការនាំចេញក្នុងទ្រង់ទ្រាយធំនឹងអាចធ្វើឡើងនៅក្នុងរដូវកាលប្រមូលផលបន្ទាប់ ដែល ចាប់ផ្តើមនៅដើមឆ្នាំ ២០២៣។ នៅពេលដែលប្រេស៊ីលចាប់ផ្ដើមនាំចេញពោតទៅកាន់ទីផ្សារប្រទេសចិន ប្រទេសមួយចំនួនដែលធ្លាប់ទិញពោតរបស់ប្រេស៊ីលនាពេលកន្លងមក ដូចជា អេស្ប៉ាញ និងអេហ្ស៊ីប ត្រូវបានអ្នកជំនាញផ្នែកសេដ្ឋកិច្ចមួយចំនួនព្យាករណ៍ថា អាចនឹងងាកទៅទិញពោតពីសហរដ្ឋអាមេរិកជំនួសវិញ។
សូមរំឭកថា ប្រទេសចិននិងប្រេស៊ីល បានចុះហត្ថលេខាលើពិធីសារសម្រាប់ការនាំចេញពោតពីប្រទេសប្រេស៊ីលទៅកាន់ប្រទេសចិន តាំងពីឆ្នាំ ២០១៤មកម្ល៉េះ ប៉ុន្តែការជួញដូរមានបរិមាណតិចតួចណាស់ ដោយសារតែលក្ខខណ្ឌភូតគាមអនាម័យដ៏ស្មុគស្មាញ។
ទិន្នន័យប៉ាន់ស្មានបង្ហាញថា ប្រទេសចិនមានតម្រូវការនាំចូលពោតចំនួន ១៨លានតោន ចាប់ពីខែតុលាឆ្នាំ២០២២តទៅ សម្រាប់ការប្រើប្រាស់ក្នុងឆ្នាំ ២០២២ និង២០២៣។ ការនាំចូលពោតពីប្រទេសអ៊ុយក្រែនទៅក្នុងទីផ្សារប្រទេសចិន បានធ្លាក់ចុះមកនៅត្រឹមតិចជាង ២,០០០ តោន ក្នុងខែកញ្ញាឆ្នាំនេះ ដែលជាហេតុធ្វើឱ្យប្រទេសចិន ត្រូវពឹងផ្អែកលើសហរដ្ឋអាមេរិកសម្រាប់ការផ្គត់ផ្គង់កសិផលពោតភាគច្រើនរបស់ខ្លួន៕
ដោយ៖កែវ កិរិយា
