អ.ស.ប ព្រមានថា ផ្ទាំងទឹកកកនៅឧទ្យាន Yosemite និងអាហ្វ្រិក នឹងរលាយបាត់រូបរាងនៅឆ្នាំ២០៥០
អន្តរជាតិ៖ផ្ទាំងទឹកកកយ៉ាងហោចណាស់១ភាគ៣នៃតំបន់បេតកភណ្ឌពិភពលោក Yosemite ដែលឧទ្យានជាតិរបស់សហរដ្ឋអាមេរិកដែរនោះ នឹងរលាយបាត់រូបរាងនៅពាក់កណ្ដាលសតវត្សរ៍នេះ បើទោះបីជាការបំភាយឧស្ម័នផ្ទះកញ្ចក់ត្រូវបានទប់ស្កាត់ក៏ដោយ។ នេះបើតាមការរកឃើញនៅក្នុងរបាយការណ៍របស់អង្គការយូណេស្កូ ចេញផ្សាយនៅថ្ងៃព្រហស្បតិ៍ ទី៣ ខែវិច្ឆិកានេះ។ របាយការណ៍ដដែលបញ្ជាក់ថា ផ្ទាំងទឹកកកទាំងអស់នៅឧទ្យាន Yosemite ក៏ដូចជាឧទ្យានជាតិ Yellowstone ព្រមទាំងផ្ទាំងទឹកកកមួយចំនួនដែលនៅសល់ក្នុងទ្វីបអាហ្វ្រិក នឹងត្រូវបាត់បង់ដោយចៀសមិនរួច បើទោះបីជាការឡើងកម្ដៅនៃភពផែនដី មានត្រឹមតែ ១,៥ អង្សា ក៏ដោយ។
អង្គការយូណេស្កូដែលមានមូលដ្ឋាននៅទីក្រុងប៉ារីស បានព្រមាននៅក្នុងរបាយការណ៍របស់ខ្លួនថា ពិភពលោកអាចរក្សាផ្ទាំងទឹកកកទុកបាន ដរាបណាការបញ្ចេញឧស្ម័នផ្ទះកញ្ចក់ត្រូវបានកាត់បន្ថយយ៉ាងខ្លាំង។
លោក Audrey Azoulay អគ្គនាយកអង្គការយូណេស្កូ ថ្លែងតាមរយៈសេចក្តីថ្លែងការណ៍មួយថា៖ «របាយការណ៍នេះគឺជាការអំពាវនាវឱ្យចាត់វិធានការបន្ទាន់ចំពោះបញ្ហាឡើងកម្ដៅនៃភពផែនដី» និងថា សន្និសីទស្ដីពីការប្រែប្រួលអាកាសធាតុរបស់អង្គការសហប្រជាជាតិ COP27 ដែលត្រូវបើកធ្វើនៅក្នុងប្រទេសអេហ្ស៊ីបនាសប្ដាហ៍ក្រោយ មានតួនាទីសំខាន់ណាស់ក្នុងការជួយស្វែងរកដំណោះស្រាយចំពោះបញ្ហានេះ។ នេះបើតាមលោក Audrey Azoulay។
សូមជម្រាបជូនថា នៅក្នុងចំណោមតំបន់បេតិកភណ្ឌពិភពលោកចំនួន ១,១៥០ ក្នុងបញ្ជីរបស់អង្គការយូណេស្កូ មានតំបន់ចំនួនជាង៥០កន្លែង ជាទីតាំងដែលគ្របដណ្ដប់ដោយផ្ទាំងទឹកកក ដែលស្មើនឹង១ភាគ១០នៃតំបន់ទឹកកកសរុបរបស់ពិភពលោក។ បើតាមអង្គការយូណេស្កូ ផ្ទាំងទឹកកកជិត ១៩,០០០ ដែលមានទីតាំងនៅតំបន់បេតិកភណ្ឌទាំងនេះ កំពុងបាត់បង់ទឹកកកច្រើនជាង ៦០ពាន់លានតោនក្នុងមួយឆ្នាំ ដែលស្មើនឹងការប្រើប្រាស់ទឹកប្រចាំឆ្នាំរបស់ប្រទេសអេស្ប៉ាញ និងបារាំងរួមបញ្ចូលគ្នា ហើយមានចំនួនប្រហែល ៥ភាគរយនៃការកើនឡើងនៃកម្រិតទឹកសមុទ្រពិភពលោក។
របាយការណ៍របស់អង្គការពិភពលោកនេះ បញ្ជាក់បន្ថែមថា ផ្ទាំងទឹកកកតូចៗនៅរយៈកម្ពស់ទាប ឬមធ្យម នឹងរលាយបាត់មុនគេ ហើយអត្រានៃការបាត់បង់ទឹកកកនៅក្នុងតំបន់ទឹកកកតូចៗនេះ បានកើនឡើងទ្វេដងចាប់ពីដើមទសវត្សរ៍ឆ្នាំ ២០០០ ដល់ចុងទសវត្សរ៍ឆ្នាំ ២០១០៕
ដោយ៖កែវ កិរិយា
