ភ្នំពេញ៖ ដំណើរការនៃការចុះឈ្មោះនិងពិនិត្យឈ្មោះបោះឆ្នោតឆ្នាំ២០២២ បានប្រព្រឹត្តទៅរយៈពេល២៤ថ្ងៃហើយដោយស្ថានភាពនៃការចុះឈ្មោះនិងពិនិត្យឈ្មោះនេះ មានដំណើរការដោយរលូនល្អ ប្រកបដោយសន្តិសុខ និងសណ្តាប់ធ្នាប់ល្អ នៅគ្រប់ការិយាល័យចុះឈ្មោះបោះឆ្នោត សរុបទាំង ១ ៦៥២ ការិល័យ ដោយចំនួនអ្នកចុះឈ្មោះមានចំនួន ៣៣៤ ១២៤ នាក់។

ឯកឧត្តម សោម សូរីដា ទីប្រឹក្សា និងជាអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) បានប្រាប់ឱ្យដឹងនៅថ្ងៃទី១៣ ខែវិច្ឆិកាថា ការចាប់ផ្តើមនៃការចុះឈ្មោះនិងពិនិត្យឈ្មោះបោះឆ្នោតឆ្នាំ២០២២ បានចាប់ផ្តើម កាលពីថ្ងៃទី២០ ខែតុលា ដែលរហូតមកដល់ថ្ងៃទី១២ ខែវិច្ឆិកា មានរយៈពេល២៤ថ្ងៃហើយ។

លោកបានថ្លែងថា ៖ «ចាប់ពីថ្ងៃទី២០ ខែតុលាមកដល់ថ្ងៃទី១២ ខែវិច្ឆិកា ដំណើរការនៅគ្រប់ការិយាល័យសម្រាប់ឃុំ-សង្កាត់ ទាំង១ ៦៥២ ឃុំ-សង្កាត់ មានការប្រព្រឹត្តទៅដោយរលូន ក្នុងបរិយាកាសសន្តិសុខ សុវត្ថិភាព និងសណ្តាប់ធ្នាប់សាធារណៈល្អ»។

ជាមួយគ្នានោះដែរ តាមការប៉ាន់ស្មានរបស់គណៈកម្មាធិការជាតិរៀបចំការបោះឆ្នោត គឺចំនួនប្រជាពលរដ្ឋគ្រប់អាយុដែលត្រូវបោះឆ្នោតនិងត្រូវមកចុះឈ្មោះបោះឆ្នោតនៅឆ្នាំ២០២២នេះ គឺមានប្រមាណជិត ៤១ ម៉ឺននាក់ ហើយដែលគ.ជ.បបានកំណត់រយៈពេលឱ្យចំនួន៥០ថ្ងៃ។

ឯកឧត្តម សោម សូរីដា បានបញ្ជាក់ថា ៖ «ប្រជាពលរដ្ឋដែលបានមកចុះឈ្មោះក្នុងរយៈពេលតែ២៤ថ្ងៃមកនេះ មានចំនួនរហូតដល់ ៣៣៤ ១២៤ នាក់ ដែលនេះជាតួលេខមួយដ៏ល្អប្រសើរ ដែលគួរឱ្យចាប់អារម្មណ៍នោះគឺទើបតែ២៤ថ្ងៃប៉ុណ្ណោះ អ្នកមកចុះឈ្មោះគឺស្ទើរជិតគ្រប់ចំនួនប៉ាន់ស្មានរបស់យើងផងដែរ»។

អគ្គលេខាធិការរង គ.ជ.ប រូបនេះ ក៏បានប្រាប់ដែរ បញ្ហាប្រឈមក្នុងពេលចុះឈ្មោះបោះឆ្នោតនោះគឺមិនមានអ្វីគួរឱ្យកត់សម្គាល់នោះទេ។

យោងតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត ស្តីពីលទ្ធផលបណ្តោះអាសន្ននៃការពិនិត្យបញ្ជិឈ្មោះ និងការចុះឈ្មោះបោះឆ្នោតឆ្នាំ២០២២ គិតត្រឹមថ្ងៃទី១២ ខែវិច្ឆិកា បានឱ្យដឹងផងដែរថា អ្នកដែលនឹងត្រូវលុបឈ្មោះចេញពីបញ្ជីបោះឆ្នោតមានចំនួន ១៥៤ ៩៥០ នាក់។

សេចក្តីប្រកាសបានបន្ថែមថា អ្នកដែលបានកែតម្រូវទិន្នន័យ មានចំនួន ៣០, ០២៣ នាក់ និងអ្នកដែលបានផ្ទេរទីលំនៅចូលក្នុងឃុំ សង្កាត់ថ្មី មានចំនួន ៥៤ ៥១៤ នាក់។

នាដើមខែវិច្ឆិកា កន្លងទៅនេះ សម្តេចតេជោនាយករដ្ឋមន្រ្តី ហ៊ុន សែន បានស្នើឱ្យប្រជាពលរដ្ឋគ្រប់និន្នាការនយោបាយនិងយុវជនដែលទើបគ្រប់អាយុបោះឆ្នោត ទៅចុះឈ្មោះបោះឆ្នោតឱ្យបានគ្រប់ៗគ្នា ទើបការអនុវត្តសិទ្ធិក្នុងការបោះឆ្នោត អាចធ្វើទៅបាន។

សម្តេចតេជោក៏បានជំរុញឱ្យបណ្តាបក្សនយោបាយដែលចូលរួមបោះឆ្នោតក្តី ដែលមិនចូលរួមបោះឆ្នោតក្តី ប្រាប់សមាជិករបស់ខ្លួន ឱ្យទៅចុះឈ្មោះបោះឆ្នោត ដើម្បីឱ្យអ្នកទាំងនោះមានឈ្មោះបោះឆ្នោត។

សម្តេចតេជោ ហ៊ុន សែន បានថ្លែងថា ៖ ដំណើរការប្រជាធិបតេយ្យមួយត្រូវធ្វើដោយទៀងទាត់សម្រាប់ប្រទេសកម្ពុជាគឺជាកាបោះឆ្នោតដែលត្រូវរៀបចំឡើងក្នុងរយៈពេលឆ្នាំម្ដង។ ការចុះឈ្មោះបោះឆ្នោតលើកនេះគឺ មានបច្ចេកទេសកាន់តែទំនើបដែលនឹងផ្ដល់ឱកាសងាយសម្រាប់ប្រជាពលរដ្ឋយើង»។

សូមបញ្ជាក់ថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២ ប្រព្រឹត្តទៅចាប់ពីថ្ងៃទី២០ ខែតុលា ដល់ថ្ងៃទី៨ ខែធ្នូ ឆ្នាំ២០២២ គិតទាំងថ្ងៃសៅរ៍និងថ្ងៃអាទិត្យ។ ប្រជាពលរដ្ឋដែលទើបគ្រប់អាយុ ១៨ ឆ្នាំ គិតដល់ថ្ងៃបោះឆ្នោតជ្រើសតាំងតំណាងរាស្ត្រថ្ងៃទី ២៣ ខែកក្កដា ឆ្នាំ ២០២៣ គឺអ្នកដែលកើតមុន ឬត្រឹមថ្ងៃទី ២៤ ខែកក្កដា ឆ្នាំ ២០០៥។ សម្រាប់អ្នកលើសអាយុ ដែលមិនធ្លាប់បោះឆ្នោតសោះក៏អាចចុះឈ្មោះបានដែរ៕ ដោយ៖ នាង សុគន្ធា