ភ្នំពេញ ៖ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងការបរទេសនិងសហប្រតិបត្តិការអន្តរជាតិ តាមរយ:ផេកហ្វេសប៊ុកផ្លូវការរបស់ ឯកឧត្តម កាលពីថ្ងៃទី១៣ ខែវិច្ឆិកា ឆ្នាំ២០២២បានរៀបរាប់ថា៖ ពីរថ្ងៃចុងក្រោយនៃកិច្ចប្រជុំកំពូលអាស៊ានឆ្នាំ២០២២ មានភាពមមាញឹកខ្លាំង ដោយសារកម្មវិធីផ្លូវការ ព្រឹត្តិការណ៍អម និងជំនួបទ្វេភាគី។ សម្តេចតេជោនាយករដ្ឋមន្ត្រី ក៏បានផ្ទេរតំណែងប្រធានអាស៊ានជូនដល់ ឯកឧត្តម ចូកូ វីដូដូ ប្រធានាធិបតីឥណ្ឌូនេស៊ី សម្រាប់ឆ្នាំ២០២៣។

អាចថាជាសំណាងរបស់ខ្ញុំដែរ ដែលបានចូលរួមចំណែកក្នុងការកសាងភាពជោគជ័យថ្មីមួយទៀតសម្រាប់ប្រទេសកម្ពុជា ក្នុងឋានៈជារដ្ឋអធិបតេយ្យ និងជាសមាជិកសហគមន៍អន្តរជាតិដែលមានទំនួលខុសត្រូវខ្ពស់ ជាពិសេសក្នុងអាស៊ាន។ ខ្ញុំក៏សូមថ្លែងអំណរគុណយ៉ាងជ្រាលជ្រៅចំពោះទំនុកចិត្តដែលថ្នាក់ដឹកនាំ សហសេវិក សហការី និងភាគីពាក់ព័ន្ធទាំងអស់ បានផ្តល់ជូនខ្ញុំ ខណៈដែលយើងរួមគ្នាតាក់តែងជំពូកប្រវត្តិសាស្ត្រមួយនេះ របស់ប្រទេសយើង។

ក៏សូមអរគុណដល់គណៈប្រតិភូទាំងអស់ និងសូមជូនពរដំណើរមាតុភូមិនិវត្តន៍ប្រកបដោយសុវត្ថិភាព។ ទន្ទឹងថានឹងបានជួបគ្នាម្តងទៀតនាពេលខាងមុខ៕ លីដា