អាមេរិកដាក់ទណ្ឌកម្មលើបណ្តាញផ្គត់ផ្គង់ឱ្យយោធារុស្ស៊ី
អាមេរិក៖សហរដ្ឋអាមេរិកកាលពីថ្ងៃចន្ទ បានកំណត់គោលដៅខ្សែចង្វាក់ផ្គត់ផ្គង់ឱ្យយោធារុស្ស៊ី ដោយដាក់ទណ្ឌកម្មលើបុគ្គលចំនួន ១៤ រូប និងអង្គភាពចំនួន ២៨ ដែលអាមេរិកអះអាងថា ជាផ្នែកមួយនៃបណ្តាញឆ្លងដែន ដែលផ្គត់ផ្គង់បច្ចេកវិទ្យាដើម្បីគាំទ្រទីក្រុងម៉ូស្គូក្នុងការឈ្លានពានអ៊ុយក្រែន។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ជុំវិញវិធានការចុងក្រោយនេះ រដ្ឋមន្ត្រីការបរទេសអាមេរិក លោក អ៊ែនថូនី ប្ល៊ីងកែន លើកឡើងនៅក្នុងសេចក្តីថ្លែងការណ៍មួយថា ៖ «សហរដ្ឋអាមេរិកនឹងបន្តរំខានដល់ខ្សែចង្វាក់ផ្គត់ផ្គង់យោធារបស់រុស្ស៊ី និងដាក់សម្ពាធឱ្យធ្ងន់ធ្ងរលើអ្នកជួយជ្រោមជ្រែងអំណាចឱ្យប្រធានាធិបតី ពូទីន ក៏ដូចជាអ្នកដែលគាំទ្រអំពើឃោរឃៅរបស់រុស្ស៊ី ប្រឆាំងនឹងអ្នកជិតខាងរបស់ខ្លួន(អ៊ុយក្រែន)»។
លោក ប្ល៊ីងកែន បានបន្តថា គ្រប់ធុរកិច្ចនៅទូទាំងពិភពលោក ទទួលបានការណែនាំដើម្បីឱ្យជៀសវាងការក្លាយខ្លួនជាគោលដៅទណ្ឌកម្ម។
ក្រោមកញ្ចប់ទណ្ឌកម្មដដែល រតនាគារសហរដ្ឋអាមេរិកបានបញ្ចូលក្រុមហ៊ុន Milandr ដែលជាក្រុមហ៊ុនមីក្រូអេឡិចត្រូនិករបស់រុស្ស៊ី ទៅក្នុងបញ្ជីខ្មៅ ដោយទីក្រុងវ៉ាស៊ីនតោននិយាយថា ក្រុមហ៊ុននេះជាផ្នែកមួយនៃរចនាសម្ព័ន្ធស្រាវជ្រាវ និងអភិវឌ្ឍន៍យោធារបស់រុស្ស៊ី។ ក្រសួងរតនាគារក៏បញ្ចូលទាំងអង្គភាពចំនួនបី ដែលជាប់ទាក់ទងនឹងក្រុមហ៊ុននេះ និងនាយកប្រតិបត្តិក្រុមហ៊ុនមួយចំនួនទៀតផងដែរ។
ក្នុងនោះផងដែរ រតនាគារសហរដ្ឋអាមេរិកបានដាក់ទណ្ឌកម្មដល់ក្រុមហ៊ុនឧស្សាហកម្មយោធាសំខាន់ៗនៅក្នុងប្រទេសរុស្ស៊ី ដោយក្រសួងពាណិជ្ជកម្មបានកាត់ផ្តាច់ការនាំចេញសមាសធាតុផលិតដោយអាមេរិក និងបច្ចេកវិទ្យារបស់អាមេរិក ដែលរុស្ស៊ីអាចប្រើក្នុងការអភិវឌ្ឍន៍វិស័យយោធារបស់ខ្លួន។
បន្ថែមពីលើនោះ ទណ្ឌកម្មរបស់ក្រសួងរតនាគារសហរដ្ឋអាមេរិក ក៏បានកំណត់គោលដៅលើសមាជិកគ្រួសារនៃមហាសេដ្ឋីរុស្ស៊ី លោក Suleiman Kerimov ផងដែរ រួមទាំងបុគ្គលដែលអាមេរិកនិយាយថា ធ្វើការជាអ្នកសម្របសម្រួលផ្នែកហិរញ្ញវត្ថុនៅក្នុងបណ្តាញរបស់លោក Suleiman ។
សូមរំឭកថា នេះមិនមែនជាលើកទី១ទេ ដែលសហរដ្ឋអាមេរិកគោលដៅបែបនេះ។ កន្លងមក រុស្ស៊ីបានគ្រប់គ្រងការទិញយន្តហោះគ្មានមនុស្សបើក(ដ្រូន)ពីប្រទេសអ៊ីរ៉ង់ ដើម្បីយកទៅវាយប្រហារទីក្រុង និងហេដ្ឋារចនាសម្ព័ន្ធថាមពលក្នុងប្រទេសអ៊ុយក្រែន។ ឆ្លើយតបនឹងបញ្ហានេះ អាមេរិកបានដាក់ទណ្ឌកម្មប្រឆាំងនឹងអង្គភាព និងឧស្សាហ៍កម្មយោធាអ៊ីរ៉ង់ដែលពាក់ព័ន្ធ ទោះបីជាស្ថាប័នទាំងនោះ ស្ថិតនៅក្រោមទណ្ឌកម្មរបស់អាមេរិករួចទៅហើយក្ដី ដោយសារតែកម្មវិធីអភិវឌ្ឍន៍នុយក្លេអ៊ែររបស់ទីក្រុងតេអេរ៉ង់៕
ដោយ៖ហួន ឌីណា ប្រភព៖ US Imposes Sanctions on Military Procurement Network Aiding Russia
