ភ្នំពេញ៖ផលិតផល​បំប៉នសុខភាព ផលិតផល​គ្រឿងសម្អាង និង​ឱសថ ចំនួន​៤​ ប្រភេទ ត្រូវ​បាន​ក្រសួង​សុខាភិបាល​​ជូន​ដំណឹង​ទៅ​ដល់​ប្រជាពលរដ្ឋទាំងអស់បញ្ឈប់ការ​ប្រើប្រាស់និង​ទិញ​ផលិត​ផលទាំងនេះ ដោយ​សារ​គ្មាន​លេខប្រវេទន៍​ និង​លេខបញ្ជិការទទួលស្គាល់ពី​ក្រសួង​នោះឡើយ។

យោង​តាម​សេចក្តីជូនព័ត៌មានរ​បស់​ក្រសួង​សុខាភិបាល​ ដែលចេញ​កាល​ពី​ថ្ងៃទី​៣០ ខែវិច្ឆិកា បាន​ឱ្យ​ដឹងថា ក្រសួង​​បាន​ហាម​ឃាត់​ការ​ផ្សព្វផ្សាយ​លក់​ផលិតផល​បំប៉ន​សុខភាព​ L.G.K, ឱសថឈ្មោះ MIRACLES, ឱសថឈ្មោះ KAMIN CHUN និងគ្រឿងសម្អាងឈ្មោះ I Care & Tcare Pharma ដែលផលិតផល និងឱសថទាំងនេះ​គ្មានលេខបញ្ជិកា និង​លេខប្រវេទន៍​ពី​ក្រសួង​ឡើយ។

អនុលោមតាមច្បាប់ ស្តីពីការគ្រប់គ្រងឱសថ និងច្បាប់ស្ដីពីវិសោធនកម្មច្បាប់ ស្តីពីការគ្រប់គ្រងឱសថ តម្រូវឱ្យរាល់ការចរាចរផលិតផលបំប៉នសុខភាពក្នុងប្រទេសកម្ពុជា ត្រូវមានលេខបញ្ញិកាពីក្រសួងសុខាភិបាល។

ក្រសួង​សុខាភិបាលបានបញ្ជាក់ថា ៖ «ដូច្នេះ សូមប្រជាពលរដ្ឋមុននឹងទិញផលិតផលបំប៉នសុខភាពគ្រប់ប្រភេទ សូមពិនិត្យមើលលតាបត្របញ្ញិកាដែលមាន បិទលើសំបកវេចខ្ចប់ ហើយលតាបត្រដែលត្រឹមត្រូវគឺមានពីរផ្នែក ​គឺ​​មានឈ្មោះគ្រឹះស្ថានអាហរ័ណ នីហរណឱសថ និង​មានលេខបញ្ជិកា ដែលទទួលស្គាល់ដោយក្រសួង​សុខាភិបាល»។​

ទន្ទឹមនឹងនេះដែរ ក្រសួងសុខាភិបាលក៏បានអំពាវនាវទៅដល់​ប្រជាពលរដ្ឋទាំងអស់មិនត្រូវជឿលើការផ្សព្វផ្សាយផលិតផល បំប៉នសុខភាពគ្មានលេខបញ្ញិកាទាំងនេះជាបន្តទៀតឡើយ និងមិនត្រូវប្រើប្រាស់ផលិតផលទាំងនេះទេ ដោយសារ​ផលិតផលទាំងនេះមិន​អាចធានាបាននូវគុណភាព និងអាចធ្វើឱ្យ​ប៉ះពាល់សុខភាពរបស់អ្នកប្រើប្រាស់ទៀតផង។

ក្រសួងសុខាភិបាលក៏​តម្រូវឱ្យម្ចាស់គណនីបណ្តាញសង្គមហ្វេសប៊ុក​ និងជនពាក់ព័ន្ធដទៃទៀតត្រូវបញ្ឈប់ការនាំចូល ចែកចាយ ឬផ្សព្វផ្សាយ លក់ផលិតផលបំប៉នសុខភាពដែលគ្មានលេខបញ្ញិកា និងលេខប្រវេទន័ទាំងនេះ​ជាបន្ទាន់។

សេចក្តី​ជូន​ព័ត៌មាន​របស់​ក្រសួងបាន​បញ្ជាក់ថា ៖ «ក្រសួងសុខាភិបាលនឹងមានវិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីបណ្តាញសង្គមហ្វេសប៊ុក​ និងជនពាក់ព័ន្ធទាំងឡាយណាដែលនាំចូល ចែកចាយ ឬផ្សព្វ​ផ្សា​យលក់ ផលិតផលដែលគ្មានលេខបច្ឆិកាខាង លើ ទៅតាមច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថជាធរមាន»។​

លោក ​ហេង ប៊ុនគៀត ប្រធាននាយកដ្ឋានឱសថ ចំណីអាហារ បរិក្ខាពេទ្យ និងគ្រឿងសំអាង ធ្លាប់បាន​លើកឡើង​ថា គ្រប់ឱសថ​ទាំងអស់​មុននឹងការចរាចរនៅ​ក្នុង​ប្រទេសកម្ពុជា គឺត្រូវ​ការ​ចុះបញ្ជិកាឱ្យ​បាន​១០០ភាគរយ គឺ​មុននឹងដាក់​លក់​នៅ​លើទីផ្សារ។

លោក​បាន​ថ្លែងថា ៖ «សូមកុំមានការគិតថា ឱសថនៅ​ក្នុង​ប្រទេសកម្ពុជាយើងអន់ ឬប្រទេសណាផ្សេងល្អនោះទេ គឺសុទ្ធតែឱសថមានគុណភាពដូចគ្នាទាំងអស់មុននឹងធ្វើការដាក់​លក់នៅលើទីផ្សារ។ សុំ​កុំឱ្យ​មានការ​យល់ឃើញថាទាល់តែឱសថនៅ​បរទេសទើបល្អនោះទេ​​»។

លោក​ ហេង ប៊ុនគៀត បាន​លើកឡើងដែរថា រាជរដ្ឋាភិបាល​កម្ពុជា និង​រដ្ឋមន្រ្តី​ក្រសួងសុខាភិបាល ឯកឧត្តម ម៉ម ប៊ុនហេង តែងតែយកចិត្តទុកដាក់ និងខិតខំលើបញ្ហានេះ ហើយ​មួយវិញទៀតមិនមែន​ក្រសួង​ទុកចោលនោះទេនៅពេលដែល​ឱសថ​ទាំងអស់​បានដាក់​លក់នៅលើទីផ្សារហើយនោះ។

លោកថា ៖ «យើងនៅតែបន្ត​ធ្វើការពិនិត្យ និង​យកឱសថដែលដាក់លក់ ទៅពិនិត្យ​ដើម្បី​ផ្ទៀងផ្ទាត់ថា តើ​ផលិត​ផលឱសថនោះនៅតែរក្សាគុណភាព១០០ភាគរយដូចដើមឬទេ?។ យើងតែងតែធ្វើជារៀងរាល់ឆ្នាំ​ ហើយសុំកុំភ័យព្រួយពីគុណភាព​របស់​ឱសថ​»៕ ដោយ៖នាង សុគន្ធា