ប្រធានាធិបតីប៉េរូត្រូវបានគេទម្លាក់ចេញពីតំណែង និងចាប់ខ្លួន បន្ទាប់ពីប៉ុនប៉ងរំលាយសភា
ប៉េរូ៖ ប្រធានាធិបតីប៉េរូ លោក ពេដ្រូ ខាស្ទីឡូ (Pedro Castillo) ត្រូវបានសមាជិកសភាបោះឆ្នោតទម្លាក់ចេញពីតំណែងកាលពីថ្ងៃពុធទី ០៧ ខែធ្នូ និងត្រូវបានចាប់ខ្លួនភ្លាមៗបន្ទាប់ពីនោះ ក្រោមបទចោទប្រកាន់ឧក្រិដ្ឋកម្មនៃការបះបោរ បន្ទាប់ពីលោកប៉ុនប៉ងរំលាយសភា។
ប៉ុន្មានម៉ោងក្រោយមក លោកស្រី ឌីណា បូលូអាត (Dina Boluarte) ដែលជាអនុប្រធានាធិបតី បានស្បថចូលកាន់តំណែងបន្តនៅសភាដែលមានសមាជិក ១៣០ រូប ហើយតំណែងនេះធ្វើឱ្យលោកស្រីក្លាយជាប្រធានាធិបតីទី៦របស់ប្រទេសប៉េរូក្នុងរយៈពេលតិចជាងប្រាំឆ្នាំ។
សូមបញ្ជាក់ថា សភាប៉េរូចំនួន ១០១ រូប បានបោះឆ្នោតសម្រេចចិត្តទម្លាក់លោក ខាស្ទីឡូ ដែលបានប្រកាសពីផែនការរំលាយសភា និងដាក់រដ្ឋាភិបាលក្នុងគ្រាអាសន្ន និងអំពាវនាវឲ្យមានការបោះឆ្នោតសភាដើម្បីធ្វើការលើបង្កើតរដ្ឋធម្មនុញ្ញថ្មី កាលពីថ្ងៃពុធដដែល។
ចំណាត់ការរបស់លោក ខាស្ទីលូ ដែលគ្រប់អ្នកជំទាស់ហៅថាជា «ការប៉ុនប៉ងការធ្វើរដ្ឋប្រហារ» បានបង្កឱ្យមានការលាលែងពីបណ្ដាគណៈរដ្ឋមន្ត្រីជាបន្តបន្ទាប់ ប្រតិកម្មយ៉ាងខ្លាំងក្លាពីមន្ត្រីកំពូលៗ និងការថ្កោលទោសពីប្រទេសជិតខាងក្នុងតំបន់ រួមទាំងអាហ្សង់ទីន ប្រេស៊ីល និងសហរដ្ឋអាមេរិក។
ចំណែកឯកងកម្លាំងប្រដាប់អាវុធប៉េរូវិញ បានច្រានចោលការប៉ុនប៉ងរបស់លោក ខាស្ទីលូ ក្នុងការរំលាយសភា ដោយហៅវាថាជាការរំលោភលើរដ្ឋធម្មនុញ្ញ។ មិនខុសពីគ្នានេះដែរ លោកស្រីប្រធានាធិបតីថ្មីថ្មោង បូលូអាយ ផ្ទាល់ បានរិះគន់ផែនការរបស់លោក ខាស្ទីលូ នៅលើធ្វីតធ័រដោយសរសេរថា ៖ «រដ្ឋប្រហារដែលធ្វើឱ្យវិបត្តិនយោបាយ និងស្ថាប័ន មានលក្ខណៈកាន់តែធ្ងន់ធ្ងរទៅ ដែលសង្គមប៉េរូនឹងត្រូវយកឈ្នះដោយការប្រកាន់ខ្ជាប់យ៉ាងតឹងរ៉ឹងចំពោះច្បាប់»។
ក្នុងព្រឹត្តិការណ៍នៃវិបត្តិនយោបាយដ៏ភ្ញាក់ផ្អើលនេះផងដែរ លោក ខាស្ទីលូ ត្រូវបានប៉ូលិសក្រុងលីម៉ាចាប់ខ្លួនភ្លាមៗបន្ទាប់ពីត្រូវសភាទម្លាក់ពីតំណែង ដោយអគ្គមេធាវីប៉េរូ អះអាងថា អតីតប្រធានាធិបតីថ្មីថ្មោងរូបនេះ ត្រូវបានចាប់ខ្លួនពីបទឧក្រិដ្ឋកម្មនៃការបះបោរ «ចំពោះការរំលោភលើបទបញ្ជារដ្ឋធម្មនុញ្ញ»។
ខណៈក្រុមការពារផ្នែកច្បាប់របស់លោក ខាស្ទីលូ មិនទាន់ចេញសេចក្ដីថ្លែងការណ៍យ៉ាងណានោះ អគ្គមេធាវីប៉េរូ លោក Patricia Benavides បានមានប្រសាសន៍ក្នុងសេចក្តីថ្លែងការណ៍ថា៖ «យើងថ្កោលទោសចំពោះការរំលោភលើបទបញ្ជារដ្ឋធម្មនុញ្ញ។
រដ្ឋធម្មនុញ្ញនយោបាយនៃប្រទេសប៉េរូ បានកំណត់ការបំបែកអំណាច និងកំណត់ថាប៉េរូជាសាធារណរដ្ឋប្រជាធិបតេយ្យ និងអធិបតេយ្យភាព។ គ្មានអំណាចណាមួយអាចដាក់ខ្លួនឯងឱ្យធំជាងរដ្ឋធម្មនុញ្ញនោះទេ ហើយត្រូវតែគោរពតាមរដ្ឋធម្មនុញ្ញ»។
គូសបញ្ជាក់ថា ប៉េរូបានឆ្លងកាត់ភាពចលាចលនយោបាយជាច្រើនឆ្នាំ ដោយមេដឹកនាំជាច្រើនរងការចោទប្រកាន់ពីបទពុករលួយ ការប៉ុនប៉ងទម្លាក់ចេញពីតំណែងជាញឹកញាប់ និងការកាត់បន្ថយអាណត្តិដឹកនាំជាដើម។ ភាពចលាចលចុងក្រោយបំផុតនេះ បានចាប់ផ្ដើមកាលពីខែតុលា នៅពេលការិយាល័យរបស់រដ្ឋអាជ្ញាបានដាក់ពាក្យបណ្តឹងរដ្ឋធម្មនុញ្ញប្រឆាំងនឹងលោក ខាស្ទីលូ ដោយចោទប្រកាន់ថា លោកដឹកនាំ «អង្គការឧក្រិដ្ឋកម្ម» ដើម្បីរកប្រាក់ចំណេញពីកិច្ចសន្យារបស់រដ្ឋ និងបានរារាំងការស៊ើបអង្កេតឧក្រិដ្ឋកម្មផ្សេងៗប្រឆាំងនឹងលោក និងក្រុមគ្រួសាររបស់លោក។
កាលពីសប្តាហ៍មុន សភាបានកោះហៅលោក ខាស្ទីលូ ដើម្បីឱ្យឆ្លើយតបទៅនឹងការចោទប្រកាន់ដែលថាលោកគ្មានសីលធម៌គ្រប់គ្រាន់ក្នុងការដឹកនាំ។ យ៉ាងណាមិញ អតីតប្រធានាធិបតីរូបនេះ បានវាយបកទៅវិញថា ការចោទប្រកាន់ទាំងអស់នេះ គឺជាការ «បង្កាច់បង្ខូច» របស់ក្រុមអ្នកដែលស្វែងរកផលប្រយោជន៍ និងចង់ដណ្តើមអំណាច។
សូមរំឭកផងដែរថា អ្នកនយោបាយឆ្វេងនិយមវ័យ ៥៣ ឆ្នាំរូបដដែល បានឡើងកាន់តំណែងក្នុងខែកក្កដាឆ្នាំ ២០២១ ហើយធ្លាប់បានរួចខ្លួនពីការប៉ុនប៉ងទម្លាក់ចេញពីដំណែងចំនួន២ដងរួចមកហើយ៕
ដោយ៖ហួន ឌីណា ប្រភព៖ Peru’s President impeached and arrested after he attempts to dissolve Congress
