សម្ដេចក្រឡាហោម ស ខេង ៖ ប្រជាជនមួយចំនួនខ្លាចប៉ូលិសជាងខ្លាចច្បាប់
ភ្នំពេញ៖ ឧបនាយរដ្ឋមន្រ្តី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មការជាតិសុវត្ថិភាពចរាចរណ៍ផ្លូវគោក (គ.ស.ច.គ) សម្ដេចក្រឡាហោម ស ខេង បានថ្លែងបញ្ជាក់ថា តាមការសង្កេតរបស់សម្ដេច ឃើញថាប្រជាពលរដ្ឋមួយចំនួនខ្លាចប៉ូលីស ជាងខ្លាចច្បាប់ ដោយសារនៅពេលដែលសមត្ថកិច្ចចរាចរណ៍រឹតបន្តឹងពួកគាត់ខ្លាច។ ប៉ុន្តែនៅពេលលែងរឹតបន្តឹង ពួកគាត់ក៏លែងខ្លាំងដែរ។
សម្ដេចបានថ្លែងឡើងដូចនេះ នាទិវាអន្តរជាតិរំលឹកដល់ជនរងគ្រោះ ដោយគ្រោះថ្នាក់ចរាចរណ៍ផ្លូវគោក លើកទី១៧ កាលពីថ្ងៃទី៧ ខែធ្នូ ឆ្នាំ២០២២។ សម្តេចក្រឡាហោមបានថ្លែងថា ប្រសិនបើជិះឡានពាក់ខ្សែក្រវាត់ និងពាក់មួកសុវត្ថិភាព នោះនឹងមិនមានគ្រោះថ្នាក់ធ្ងន់ធ្ងរនោះឡើយ នៅពេលមានគ្រោះថ្នាក់កើតឡើង។
សម្តេចមានប្រសាសន៍ថា ៖ «ទាក់ទងនឹងចំណុចនេះ តាមការសង្កេតរបស់ខ្ញុំឃើញថា ពេលដែលប៉ូលីស សមត្ថកិច្ចចរាចរណ៍រឹតបន្តឹងបន្តិចទៅពួកគាត់ខ្លាច តែបើប៉ូលីសលែងស្រែក គាត់ក៏លែងខ្លាចដែរ។ ដូចនេះប្រែមកថា ពួកគាត់មិនខ្លាចច្បាប់ទេ តែពួកគាត់ខ្លាចប៉ូលីស»។
សម្តេចក្រឡាហោម ស ខេង បានបន្ថែមថា ៖ «ចំណុចនេះ ខ្ញុំសុំឱ្យពួកគាត់ដូរនូវការយល់ឃើញនេះ ដូរនូវទស្សនៈយល់ឃើញនេះចេញ ដោយត្រូវខ្លាចច្បាប់ជាងខ្លាចប៉ូលីស។ យើងត្រូវម្ចាស់ការដើម្បីការពារខ្លួនឯង ស្រលាញ់ខ្លួនឯង»។
សម្ដេចក្រឡាហោមបានឱ្យដឹងទៀតថា ករណីគ្រោះថ្នាក់ចរាចរណ៍កើតមាននៅពេលយប់ នៅតែមានច្រើនគួរឱ្យបារម្ភផងដែរ ដែលធ្វើឱ្យលោកអំពាវនាវ និងជំរុញឱ្យប្រជាពលរដ្ឋមានការភ្ញាក់រលឹកលើបញ្ហានេះផងដែរ។
ទាក់ទងនឹងករណីគ្រោះថ្នាក់ចរាចរណ៍នេះដែរ លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា បានប្រាប់ឱ្យដឹងថា ចំនួនយានយន្តដែលចុះបញ្ជី មានកាន់តែច្រើន ហើយអ្នកបើកបរក៏មានកាន់តែច្រើនទាំងអ្នកប្រើប្រាស់រថយន្ត និងម៉ូតូ ដែលអ្នកបើកបរម៉ូតូភាគច្រើនមិនទទួលបានការបណ្ដុះបណ្ដាលត្រឹមត្រូវនោះទេ។
លោកបានប្រាប់ថា ៖ «ដោយយើងមើលឃើញថាពីមួយថ្ងៃទៅមួយថ្ងៃមានចំនួនយានយន្តកាន់តែច្រើន ហើយម៉ូតូក្រោម ១២៥C គឺមិនតម្រូវឱ្យមានប័ណ្ឌបើកបរផងនោះ ដូច្នេះហើយធ្វើឱ្យឥរិយាបថបើកបររបស់ពួកគាត់នៅតាមដងផ្លូវមានលក្ខណៈប្រថុយប្រថានច្រើន»។
លោក គឹម បញ្ញា បានបន្ថែមថា វិធានការចំនួនបី ដែលរួមមាន វិធានការអប់រំផ្សព្វផ្សាយ វិធានការរដ្ឋបាល និងវិធានការច្បាប់ គឺលោកចង់ធ្វើឱ្យស្ថានភាពនៃចរាចរណ៍ល្អប្រសើរឡើងក្នុងរយៈពេលយូរអង្វែង ដោយមិនចង់ធ្វើឲ្យមានតែក្នុងរយៈពេលភ្លាមៗនោះទេ។
ទន្ទឹមនឹងនេះ លោកក៏បានបន្ថែមទៀត ៖ «ពាក់ព័ន្ធទៅនឹងហេដ្ឋារចនាសម្ព័ន្ធផ្លូវថ្នល់ ដូចជាផ្លាកសញ្ញាបន្ថយល្បឿន កែលម្អផ្លូវ ការធ្វើបែបនេះ គឺជួយបានច្រើន។ យើងបំពាក់គំនូសសញ្ញា អីផ្សេងៗគឺជួយកុំឱ្យមានគ្រោះថ្នាក់ចរាចរណ៍»។
ប៉ុន្តែទោះជាយ៉ាងណាក៏ដោយ ក៏គួរតែមានការជួបជុំ ដោយស្ថាប័នពាក់ព័ន្ធរៀងរាល់ ៣ខែម្ដង ពីសង្គមស៊ីវិល អ្នកសារព័ត៌មានជាដើម ដែលអាចរកដំណោះស្រាយដ៏សមស្របក្នុងរូបភាពយូអង្វែងសម្រាប់ធ្វើឱ្យចរាចរណ៍មានភាពប្រសើរ។
យោងតាមរបាយការណ៍របស់ គណៈកម្មាធិការជាតិសុវត្ថិភាពចរាចរណ៍ផ្លូវគោក បានឱ្យដឹងថា រយៈពេល៩ខែដំបូងនៃឆ្នាំ ២០២២ មានករណីគ្រោះថ្នាក់ចរាចរណ៍ចំនួន ២ ២៨៦ កើនឡើង ២១ ភាគរយ ដែលក្នុងនោះមានអ្នកស្លាប់ចំនួន ១ ៣៤២នាក់ កើនឡើង ២៧ ភាគរយ៕ ដោយ៖ហោ សុវិទ្យា
