រញ្ជួយដីកម្រិត ៦,១ រ៉ិចទ័រ វាយប្រហារនៅខេត្តជ្វាខាងលិចនៃប្រទេសឥណ្ឌូនេស៊ី
ឥណ្ឌូនេស៊ី៖ ទីភ្នាក់ងារភូគព្ភសាស្ត្រឥណ្ឌូណាស៊ី (BMKG) បានអះអាងថា គ្រោះរញ្ជួយដីកម្រិត ៦,១ រ៉ិចទ័រ បានវាយប្រហារនៅខេត្តជ្វាខាងលិចនៅថ្ងៃព្រហស្បតិ៍ ទី៨ ខែធ្នូ ដែលបានបង្កជាការភិតភ័យសម្រាប់ប្រជាជនរស់នៅក្នុងតំបន់។
ទីភ្នាក់ងារនេះបាននិយាយថា ការរញ្ជួយដីដែលមានចំណុចកណ្តាល ២២ គីឡូម៉ែត្រពីទីក្រុងសូកាប៊ូមី មិនមានកម្លាំងដែលអាចបង្កឱ្យមានរលកយក្សស៊ូណាមិនោះទេ ហើយវាកើតឡើងនៅជម្រៅ ១០៤ គីឡូម៉ែត្រនៃស្រទាប់ផែនដី។
ការរញ្ជួយដីនៅព្រឹកថ្ងៃព្រហស្បតិ៍នេះ ក៏បង្កជារំញ័រដល់រដ្ឋធានីហ្សាកាតា និងតំបន់ជុំវិញផងដែរ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
មន្ត្រីនៅទីភ្នាក់ងារកាត់បន្ថយគ្រោះមហន្តរាយឥណ្ឌូនេស៊ី (BNPB) លោក Abdul Muhari បានប្រាប់រ៉យទ័រ ថា គិតត្រឹមនៅព្រឹកថ្ងៃព្រហស្បតិ៍ មិនទាន់មានរបាយការណ៍អំពីការខូចខាតនៅឡើយទេ។ យ៉ាងណាមិញ ប្រធាន BNPB លោក Suharyanto បានស្នើឱ្យប្រជាជនរក្សាភាពស្ងប់ស្ងាត់ ប្រុងប្រយ័ត្ន ដោយបន្ថែមថាក្រុមឆ្លើយតបកំពុងបញ្ជូនទៅវាយតម្លៃតម្រូវការ។
សូមរំឭកថា កាលពីខែមុន គ្រោះរញ្ជួយដីកម្រិត ៥,៦ រ៉ិចទ័រ បានវាយប្រហារទីក្រុង Cianjur ដែលនៅខេត្តជ្វាខាងលិចដូចគ្នា ដោយបានសម្លាប់មនុស្សជាង ៣០០ នាក់ និងបង្កការខូចខាតដល់ផ្ទះរាប់ពាន់ខ្នង។
ឥណ្ឌូណេស៊ីស្ថិតនៅលើខ្សែក្រវ៉ាត់ភ្នំភ្លើងប៉ាស៊ីហ្វិក ដែលធ្វើឱ្យតំបន់នេះរងនូវគ្រោះរញ្ជួយដី និងបន្ទុះភ្លើងញឹកញាប់។ នៅឆ្នាំ ២០០៤ ការរញ្ជួយដីកម្រិត ៩,១ រ៉ិចទ័រនៅក្បែរកោះស៊ូម៉ាត្រា ភាគខាងជើងប្រទេសឥណ្ឌូនេស៊ី បានបង្កឲ្យ មានរលកយក្សស៊ូណាមិ ដែលបោកទៅលើប្រទេសចំនួន ១៤ និងសម្លាប់មនុស្សជិត ២៣០ ០០០ នាក់៕
ដោយ៖ហួន ឌីណា
ប្រភព៖ Magnitude 6.1 quake rattles Indonesia’s West Java
