ឡូ អាន់ជីឡេស៖ យ៉ាងហោចណាស់មានអ្នកជំងឺប្រមាណ ១៨លាននាក់នៅទូទាំងសហរដ្ឋអាមេរិក ដែលកើតជំងឺគ្រុនផ្តាសាយក្នុងរដូវកាលនេះ ក្នុងនោះ ១៩០,០០០នាក់សម្រាកព្យាបាលនៅមន្ទីរពេទ្យ និង ១២,០០០នាក់ទៀតបានស្លាប់។ នេះបើយោងតាមការប៉ាន់ស្មានចុងក្រោយបំផុត ដែលចេញផ្សាយក្នុងថ្ងៃសុក្រសប្តាហ៍នេះ ដោយមជ្ឈមណ្ឌលគ្រប់គ្រង និងបង្ការជំងឺសហរដ្ឋអាមេរិក (CDC)។

មជ្ឈមណ្ឌល CDC បានឱ្យដឹងថា ការរីករាលដាលនៃជំងឺផ្តាសាយតាមរដូវនៅតែមានកម្រិតខ្ពស់ ប៉ុន្តែកំពុងធ្លាក់ចុះនៅក្នុងតំបន់ភាគច្រើន។ ទិន្នន័យរបស់ CDC បានបង្ហាញថា មនុស្សជាង ២០,៧០០នាក់ត្រូវបានបញ្ជូនទៅព្យាបាលនៅមន្ទីរពេទ្យ ដោយសារជំងឺផ្តាសាយនៅសហរដ្ឋអាមេរិក ក្នុងសប្តាហ៍ចុងក្រោយ ដែលបញ្ចប់នៅថ្ងៃទី១៧ ខែធ្នូនេះ។

ករណីស្លាប់របស់កុមារដែលទាក់ទងនឹងជំងឺគ្រុនផ្តាសាយមានចំនួន ១៧នាក់ត្រូវបានរាយការណ៍នៅសប្តាហ៍នេះ ធ្វើឱ្យចំនួនកុមារស្លាប់ដោយសារជំងឺគ្រុនផ្តាសាយសរុបចំនួន ៤៧នាក់ ដែលត្រូវបានរាយការណ៍មកទល់ពេលនេះក្នុងរដូវកាលនេះ។ ទន្ទឹមគ្នា មជ្ឈមណ្ឌល CDC បានជំរុញឱ្យសាធារណៈជនត្រូវទៅចាក់វ៉ាក់សាំងបង្ការជំងឺគ្រុនផ្តាសាយជារៀងរាល់ឆ្នាំ ដើម្បីការពារការឆ្លង និងឈឺធ្ងន់ធ្ងរ៕ ប្រភព៖ ស៊ីនហួរ ដោយ៖ ទីណា និងបុត្រា