កំពត៖ នៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវពីរ គឺផ្លូវជាតិលេខ៣១ និងលេខ៣៣ ស្ថិតក្នុងភូមិសាស្ត្រខេត្តកំពត និងខេត្តកែប នៅព្រឹកថ្ងៃទី៣០ ខែធ្នូ ឆ្នាំ២០២២ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា គណបក្សប្រជាជនកម្ពុជា មិនធ្វើឱ្យប្រជាជនខកចិត្ត ដោយសារការខ្វះការទទួលខុសត្រូវនោះឡើយ។

សម្ដេចតេជោ ហ៊ុន សែន បានបញ្ជាក់ដែរថា យ៉ាងហោចណាស់ គណបក្សប្រជាជនកម្ពុជា អាចថែរក្សាបាននូវសុខសន្តិភាព និងមិនឱ្យប្រជាជនជួបប្រទះចម្បាំងរាំងជល់គ្រោះថ្នាក់ដល់អាយុជីវិតនោះទេ។

សម្ដេចតេជោ នាយករដ្ឋមន្ត្រី បានបន្តថា សម្រាប់ពួកប្រឆាំងមួយចំនួននោះ តែងតែប្រើប្រាស់នយោបាយអគុណធម៌ចោទប្រកាន់មកលើការដឹកនាំរបស់គណបក្សប្រជាជនកម្ពុជា ដូចជា ចោទថា បាត់បង់ដីធ្លីជាដើម ដែលចំណុចនេះពុំមែនជាការពិតនោះទេ៕ ដោយ វណ្ណលុក