វ៉ាស៊ីនតោន៖ អ្នកនាំពាក្យរដ្ឋាភិបាលអាមេរិក បានបញ្ជាក់ថា ប្រមុខការទូត និងការពារជាតិរបស់ប្រទេសជប៉ុន និងសហរដ្ឋអាមេរិក គ្រោងនឹងជួបប្រជុំគ្នានៅរដ្ឋធានីវ៉ាស៊ីនតោន ក្នុងថ្ងៃពុធសប្តាហ៍ក្រោយនេះ (ម៉ោងក្នុងតំបន់)។

អ្នកនាំពាក្យក្រសួងការបរទេសអាមេរិក លោក ណេត ប្រាយដ៍ បានប្រកាសពីកិច្ចពិភាក្សា “ពីរបូកពីរ” ខាងលើនេះ នៅក្នុងសន្និសីទសារព័ត៌មានមួយ នៅថ្ងៃព្រហស្បតិ៍សប្តាហ៍នេះ។ លោកបន្តថា រដ្ឋមន្ត្រីការបរទេសអាមេរិក លោក អាន់ថូនី ប្លីងគែន និងរដ្ឋមន្ត្រីការពារជាតិអាមេរិក លោក ឡូយដ៍ អូស្ទីន នឹងជួបជាមួយរដ្ឋមន្ត្រីការបរទេសជប៉ុន លោក ហាយ៉ាស៊ី យ៉ូស៊ីម៉ាសា និងរដ្ឋមន្ត្រីការពារជាតិជប៉ុន លោក យ៉ាម៉ាដា យ៉ាស៊ូកាស៊ុ។

លោក ប្រាយដ៍ បន្ថែមថា សម្ព័ន្ធភាពជប៉ុន-អាមេរិកនៅតែជាមូលដ្ឋានគ្រឹះនៃតំបន់ឥណ្ឌូ-ប៉ាស៊ីហ្វិកសេរី និងបើកចំហ។ លោកថា ប្រទេសទាំងពីរនឹងពិភាក្សាគ្នាអំពីចក្ខុវិស័យរួមរបស់ខ្លួន អំពីសម្ព័ន្ធភាពទំនើបកម្ម ដែលនឹងដោះស្រាយបញ្ហាប្រឈមក្នុងសតវត្សទី២១ នៅក្នុងតំបន់ និងជុំវិញពិភពលោក។

គួរបញ្ជាក់ផងដែរថា រដ្ឋមន្ត្រីការបរទេសអាមេរិក លោក អាន់ថូនី ប្លីងគែន គ្រោងនឹងធ្វើទស្សនកិច្ចទៅកាន់ប្រទេសចិននៅដើមឆ្នាំនេះ។ ប្រការនេះបង្ហាញថា រដ្ឋាភិបាលអាមេរិកទំនងជាមានបំណងបញ្ជាក់ឡើងវិញ នូវកិច្ចសហប្រតិបត្តិការជាមួយជប៉ុន មុនដំណើរទស្សនកិច្ចនោះកើតឡើង៕

ប្រភព៖ NHK ប្រែសម្រួលដោយ៖ ទីណា