បាងកក៖ គណៈកម្មាធិការជាតិរៀបចំការបោះឆ្នោតនៃប្រទេសថៃ (EC ) ត្រូវការ ‘៤៥ ថ្ងៃ’ ដើម្បីរៀបចំការបោះឆ្នោត ហើយបានច្រានចោលពាក្យចចាមអារ៉ាមដែលថា មានការឃុបឃិតជាមួយនាយករដ្ឋមន្ត្រីថៃ លោក ប្រាយុទ្ធ ចាន់អូចា។

គណៈកម្មាធិការរៀបចំការបោះឆ្នោត បាននិយាយកាលពីថ្ងៃចន្ទថា ខ្លួនត្រូវការពេលយ៉ាងតិច ៤៥ ថ្ងៃ ដើម្បីរៀបចំសម្រាប់ការបោះឆ្នោតសកល នៅពេលដែលអាណត្តិសភាបានបញ្ចប់ ស្របតាមច្បាប់ពាក់ព័ន្ធថ្មី ចំនួនពីរ។

អគ្គលេខាធិការ គណៈកម្មាធិការរៀបចំការបោះឆ្នោត លោក សាវ៉ាអេង ប៊ុមមី ( Sawaeng Boonmee) បាននិយាយទៅកាន់អ្នកសារព័ត៌មានបែបនេះ បន្ទាប់ពីបានជួបជាមួយឧបនាយករដ្ឋមន្ត្រី វីសានុ គ្រីងង៉ាម (Wissanu Krea-ngam) អស់រយៈពេលមួយម៉ោង នៅវិមានរដ្ឋាភិបាល។

សកម្មភាពបោះឆ្នោតសមាជិកសភា និងគណបក្សនយោបាយបានចូលជាធរមាន នៅថ្ងៃសៅរ៍ ដោយដាក់មូលដ្ឋានគ្រឹះផ្លូវច្បាប់សម្រាប់ គណៈកម្មាធិការរៀបចំការបោះឆ្នោត ដើម្បីធ្វើការរៀបចំការបោះឆ្នោត។

គណៈកម្មាធិការ EC បានកំណត់ពេលវេលាបណ្តោះអាសន្ន នៅថ្ងៃទី៧ ខែឧសភាជាថ្ងៃបោះឆ្នោតដែលផ្តល់ឱ្យសភាតំណាងរាស្រ្តបញ្ចប់អាណត្តិ ៤ ឆ្នាំ នៅថ្ងៃទី ២២ ខែមីនា។

នៅពេលសួរដើម្បីអត្ថាធិប្បាយលើការចោទប្រកាន់ថា EC កំពុងទិញពេលវេលាដើម្បីអនុញ្ញាតឱ្យគណបក្ស United Thai Nation (UTN) របស់លោក ប្រាយុទ្ធ នាយករដ្ឋមន្ត្រីបច្ចុប្បន្ន រៀបចំសម្រាប់ការស្ទង់មតិជាតិនោះ លោក អគ្គលេខាធិការ បានឆ្លើយតបថា “មនុស្សអាចនិយាយអ្វីក៏បានដែលពួកគេចូលចិត្ត ប៉ុន្តែ EC ធ្វើការឱ្យប្រទេសថៃ” ។

លោកថា ការពិភាក្សារបស់លោកជាមួយលោក ឧបនាយករដ្ឋមន្ត្រី ដែលជាអ្នកជំនាញច្បាប់របស់រដ្ឋាភិបាល គឺមានគោលបំណងធានាឲ្យការបោះឆ្នោតប្រព្រឹត្តទៅដោយរលូន៕ ប្រភពពី The Nation ប្រែសម្រួលដោយ៖ សារ៉ាត