ប៉ាណាម៉ា៖ គ្រោះថ្នាក់រថយន្តក្រុង នៅក្នុងរដ្ឋធានីប៉ាណាម៉ា នៃប្រទេសប៉ាណាម៉ា បានបណ្តាលឲ្យស្លាប់ជនចំណាកស្រុក ចំនួន៣៩នាក់ និង២០នាក់ទៀត សម្រាកព្យាបាល នៅមន្ទីរពេទ្យ។ យ៉ាងហោចណាស់ មនុស្ស ៣៩នាក់បានស្លាប់ នៅក្នុងប្រទេសប៉ាណាម៉ា បន្ទាប់ពីរថយន្តក្រុងដឹកជនចំណាកស្រុកជាង ៦០ នាក់បានធ្លាក់ពីលើច្រាំងថ្មចោទ កាលពីថ្ងៃពុធ ទី១៥ ខែកុម្ភៈ ដែលជាការកត់សម្គាល់គ្រោះថ្នាក់ចំណាកស្រុកដ៏អាក្រក់បំផុត នៅក្នុងប្រវត្តិសាស្ត្ររបស់ប្រទេសនៅអាមេរិកកណ្តាលមួយនេះ។

ប្រព័ន្ធផ្សព្វផ្សាយក្នុងស្រុកបានបង្ហាញពីទិដ្ឋភាពពីលើអាកាសនៃកន្លែងកើតហេតុ ដោយមានផ្នែកខ្លះនៃរថយន្តក្រុងដែលខូច បានដេកដួលនៅតាមដងផ្លូវ និងក្រុមជួយសង្គ្រោះជាច្រើន នៅក្នុងតំបន់កើតហេតុ។

ឡានក្រុងដឹកជនចំណាកស្រុក ដែលបានធ្វើដំណើរឆ្លងកាត់ តំបន់ដារ៉ែន ហ្គេប (Darien Gap) ដែលជាព្រៃដ៏គ្រោះថ្នាក់ដែលតភ្ជាប់ប្រទេសកូឡុំប៊ី ទៅអាមេរិកកណ្តាល កំពុងធ្វើដំណើរឆ្ពោះទៅកាន់ទីជំរកដែលមានទីតាំងនៅខេត្ត ឈីរីគ្វិ (Chiriqui) ឆ្នេរសមុទ្រភាគខាងលិចដែលមានព្រំប្រទល់ជាប់ប្រទេសកូស្តារីកា។

អាជ្ញាធរបាននិយាយថា ជាងពាក់កណ្តាលនៃអ្នកដំណើរចំនួន ៦៦នាក់ នៅក្នុងរថយន្តក្រុងនោះបានស្លាប់ ក្នុងឧបទ្ទវហេតុ នៅជិតជំរកជនចំណាកស្រុក ក្វាឡាកា (Gualaca) ដែលជាតំបន់ដែលមានផ្លូវកោងជាច្រើន។

អាជ្ញាធរសន្តិសុខសង្គមរបស់ ប្រទេសប៉ាណាម៉ា បានប្រាប់រ៉យទ័រថា មនុស្សប្រហែល ២០ នាក់ត្រូវបានបញ្ជូនទៅមន្ទីរពេទ្យ ដោយរបួស ក្នុងនោះ អ្នកខ្លះរងរបួសធ្ងន់ធ្ងរ។ អាជ្ញាធរចំណាកស្រុកមិនបានផ្តល់ព័ត៌មានលម្អិតអំពីសញ្ជាតិរបស់ជនរងគ្រោះទេ ដោយនិយាយថា ជាបឋម មានការទាក់ទងជាមួយសាច់ញាតិ និងស្ថានទូតរៀងៗខ្លួនរបស់អ្នកដំណើរ។

កាលពីឆ្នាំមុន ជនចំណាកស្រុកចំនួន ២៤៨០០០ នាក់បានឆ្លងកាត់ ដារ៉ែន ហ្គេប (Darien Gap) ដែលភាគច្រើន ជាជនជាតិវេណេស៊ុយអេឡា។ គោលនយោបាយការធ្វើចំណាកស្រុកដ៏តឹងរ៉ឹងថ្មីរបស់សហរដ្ឋអាមេរិកបានបណ្តាលឱ្យមនុស្សជាច្រើនត្រូវត្រឡប់ទៅប្រទេសប៉ាណាម៉ាវិញ ដែលជារឿយៗ ពួកគេមិនអាចមានលទ្ធភាព ដឹកជញ្ជូនត្រឡប់ទៅប្រទេសវេណេស៊ុយអេឡាបានទេ។

ក្រសួងការបរទេស ប៉ាណាម៉ា បាននិយាយ កាលពីថ្ងៃអង្គារថា ចាប់តាំងពីដើមឆ្នាំ ២០២៣ មក មានជនចំណាកស្រុក ចំនួន៣២៨០០ នាក់បន្ថែមទៀត បានឆ្លងកាត់ តំបន់ដារ៉ែន ហ្គេប (Darien Gap) ៕ ប្រភពពី Reuters ប្រែសម្រួលដោយ៖ សារ៉ាត